Gálatas 1

1Li'á, Pablo neca apóstol Jesucristo, pero lá cañi bee bene li'á, nu lá xe'la beella li'á sino que Jesucristo uxe'la li'á nu cuna Pa'ahua Diose enu uri'i nú uhuañi zeca Jesucristo lu eluti. 2Ye bee sa'ahua enu nzeli arqui' Jesucristo enu nzucu'nua ca'a xe'laru carta quie' lu yehua enu nzeli arqui' Jesucristo lu iliu Galacia. 3Pa'ahua Diose cuna Jesucristo ri'i nú cha nze'ca lu cuenda'hua nu cuna nú nzuxe arqui'hua. 4Jesucristo unguti equie stula'ahua para nú tsila'ahua lu ye beenú necha neca nu' lu iliulabequie' tucu nú uri'i Pa'ahua Diose elliebacu'. 5¡Enze'e riala nú lu'cuahua ula'na lu Diose diqui tiembu! 6Chiqui' nzenu arquia nú terratutsia sana' arqui'hua Stichia' Diose, li'inu enu ucañi li'ihua equie elu seca' Jesucristo. Pero li'ihua a'la stucu bedichia' rene rri'i casohua, 7nú ni' laca sitichia' Diose. Sino que neli nú nu' bee bene enu rla'na nú zequienu li'ihua nu niarqui' nú che'e xa neca bedichia' nze'ca' Jesucristo. 8Pero tunu nu' bee bene enu sete' li'ihua stucu bedichia' rene luquelá bee bedichia' nze'ca' Jesucristo nú uzete'laru li'ihua. Nze'e riala castiya' Diose, lecaxiri'i tunu neca nze'e titse bene urre neca nze'e li'á urre neca nze'e tucu ángele enu nze'ta enza liñibe. 9Tucu nú unilaa luhua, nu nee rni zeca luhua stucu bese: Tunu nu'ti sete' li'ihua stucu bee bedichia' rene nú laca xi neca stichia' Jesucristo nú uchilila arqui'hua, nze'e rialala castiya' Diose. 10La la'naa nú xa modo ya'na nze'ca lubee bene sino que rla'naa nú ya'na nze'ca lu Diose. Xne tunu la'naa nú ya'na nze'caa lubee bene chequie la zucua'a stichia' Jesucristo. 11Bee sa'a enu nzeli arquia'ahua Jesucristo niarquia nú ri'ihua beya' nú stichia' Jesucristo nú uzeteláhua lacane nú ullelatsia arqui' bee bene iliulabe. 12Né ni bee benene lua nu lecati uzete'e li'á sino que Jesucristo neca enu uzete'e li'á. 13Li'ihua ubene'la'hua lu cuendaa chenu uyalí arquia tucu nú nzeli arqui' bee bene Israel Diose, nu siempre necha uri'inua bee bene enu nzeli arqui' stichia' Jesucristo nu ula'naa xneca modo tsana' arqui'beella nú nzeli arqui'beella Jesucristo. 14Nu li'á máse utsuta' arquia lunú xa nzeli arqui' bee bene Israel luquela beelá bee bene enu tucutse lana nzenua xne uzucua yebee costumbre nú uri'i bee bene'ru enu udetela. 15Pero lunú chiqui' seca Diose li'á, enze'e desde ante nú alaa ucañilanu li'á. Nu chenu niarqui'nu, 16che ulube'lu lli'ñinu lua, para nú ixiule'a bedichia' nze'ca'nu lubee bene enu laca bee bene Israel. Nu chenu ungae scua lecatilu unacudichia'a, 17nu le'ca né cha'a Jesucristo lubee bene enu necala apóstol ante nú acaa apóstol'nu, sino que chu uya'a lu iliu Arabia nu cheelá ubenchila' zeca eyeche Damasco. 18Chenu udete chuna lana che uya'a Jerusalén para nú chulua Pedro nu uzucua'a lulla chiñu' bichia. 19Pero né lañia beelá bee apóstol ulañitsia Jacobo bichi Jesucristo. 20Ye beenú rnia luhua neli nu Diose nediya' nze'ca' nú la nequichia'a. 21Luze'elá uya'a lu iliu Siria cuna lu iliu Cilicia. 22Pero bee bene enu nzeli arqui' Jesucristo enu nucua'a lu iliu Judea lá chulubeella li'á tiembu ze'e. 23Ubene'tsia beella lunú rni bee bene equie cuendaa: “Bene enu necha uri'inu lia'ahua hua'tu nee rixiule'elalla stichia' Jesucristo añinzuca nú hua'tu ula'nalla nú xneca modo tsana' arquia'ahua nú nzeli arquia'ahua Jesucristo.” 24Nu rdete' beella che'tsa lu Diose equie cuendaa xne nzelila arquia Jesucristo.

will be added

X\