Efesios 6

1Le'ca esquie li'ihua bee endu', uzu'cu'hua nú rni bee uzana'hua xne scua rialane, equie nú nzeli arqui'hua Jesucristo. 2Nu mandamiento rluti nú rni nú yucu cuenda'ahua lunú ucuaqui u'na Diose lua'ahua tunu zucua'ahua mandamiento nú rni: “Ulu'cu ula'na lu pa'lu cuna lu na'lu, 3para nú huañi nze'calu nu huañixeelu lu iliulabe quie'.” 4Nu le'ca esquie li'ihua bee paa cuna bee naa, la detehua lunú rri'inuhua bee endu'hua para nú la leebeei equie cuenda' nucua', mejora ubi'ya nze'cahua li'ibeei, uni'hua bezete' lubeei nu uze'tehua li'ibeei tucu nú niarqui' Diose. 5Nu li'ihua bee enu rri'i riña' bee bene, uzu'cu'hua nú rni bene enu rri'ihua riña'lu lu iliulabe quie', nu diquinu' arqui'hua ulu'cuhua ula'na lubeella, nu uzu'cu'hua nú rni beella, uri'ihua xineca nú rri'ihua riña' Jesucristo. 6Uri'ihua riña' beella, nu la ri'ihuane chenu ri'yatsia beella luhua para nú ya'na nze'cahua lubeella, sino que uri'ihua riña' beella xi neca nú sibi'hua lu Jesucristo, equie nú neli rri'ihua tucu nú niarqui' Diose nú ri'ihua. 7Uri'ihua riña' beella diquinu' arqui'hua, uri'ihuane xi neca nú rri'ihua riña' Jesucristo xne la necatsiae riña' bee bene. 8Nu li'ihua nediya'la'hua nú cada bee bene, mase nú necalla moso' urre lacalla moso', pero dete' Jesucristo lulla nú riala nú ati'lla equie nú neca nze'ca uri'illa. 9Le'ca esquie li'ihua bee patrón, aca nze'cahua lubee moso'hua, la ri'ihua nú nehuana zeca beella. Xne li'ihua nediya'hua nu li'inu enu rnibiya' lubeella nu luhua nzucunu liñibe nu ante lunu iguale neca ye bee bene. 10Le'ca nia luhua bee sa'a enu nzeli arquia'ahua Jesucristo nú utsuta' arqui'hua lunú neca tucu necatsela'ahua cuna li'inu, lunú chiqui' rnibiya'nu. 11Ubi'yahua li'ihua cuna elietsa' Diose para nú tsuta' arqui'hua, nu para nú la ri'i beze'lu ana luhua nú zequienui li'ihua. 12Xne la liunua'ahua bee bene lu iliulabe quie', sino que rliunua'ahua cuna yelu clasia' bee benechiqui', sia bee enu rlu'cu nú rnibiya', cuna enu rlu'cu elu usticia, cuna ye beelá bee espíritu' beze'lu nú nu', nu rnibiya' lu iliulabe quie'. 13Enze'e ubi'yahua li'ihua cuna poder nú rliqui' Diose luhua para nú riqui'hua lu xitse beenú nehuana nze'ta zecahua, nu utsuta' arqui'hua mase secahua lunú secahua. 14Utsuta' arqui'hua lunú neli neca nú nediya'la'hua, nu uyanalahua tucu nú riala nú huañihua. 15Ucua'a tsiñahua para nú ixiule'ehua lubee bene bee bedichia' nze'ca' Jesucristo nú rri'i nú nzuxe arqui' bee bene lu Diose. 16Nu lu yeene la zañi'hua lunú nzu tenelí arqui'hua, nú neca nú rri'i elietsa luhua luye beenú necha neca nú nze'ta lu beze'lu. 17Nu lunú utsila'a Diose li'ihua nucua' neca nú recanu' li'ihua, nu stichia'nu neca xi neca tucu espada nú rliqui' Espíritu Santo luhua. 18La tsana'hua nú rnacu'hua lu Diose. Uzequiehua lunu nu una'cuhua lunu yebichia cuna elietsa' Espíritu Santo. Utsutsiñahua una'cuhua lunu nu la llaca'hua, nu una'cuhua lunu equie cuenda' ye bee bene'nu. 19Le'ca una'cuhua lu Diose lu cuendaa para nú liqui'nu bee bedichia' nú riala nia para nú aca ixiule'ene lubee bene sin nú lliquia, nu nia bee bedichia' nze'ca' Jesucristo nú rni nú xneca tsila'a bee bene. 20Uxe'la Diose li'á para nú ixiule'a bee bedichia' nze'ca quie', enze'e nchiñia ni'cu' nee. Pero una'cuhua lu Diose para nú la lliquia nia equie cuenda'nu tucu nú riala nú nia. 21Tíquico, enu neca tucu bee sa'ahua enu chiqui' se'ca'ahua enu neli rri'i elietsa lua'ahua lunú sibia'ahua lu Jesucristo, li'illa ixiule'ella luhua lu ye nú xa nzucua'a ca'a nu xi rri'á. 22Xne para enze'e xe'lalla luhua para nú ixiule'ella luhua nú xa nellua'aru ca'a, nu scua du'lla ana arqui'hua. 23Nacua lu Diose nú ye bee sa'ahua enu nzeli arquia'ahua Jesucristo liqui'nu nú nzuxe arqui'hua, cuna eluseca, cuna nú chililá arqui'hua Pa'ahua Diose nu Jesucristo enu rnibiya'. 24Diose ri'i nú cha nze'ca lu cuenda' ye bee bene enu neli seca Jesucristo enu rnibiya'. Amén.

will be added

X\