Efesios 1

1Li'á Pablo, necaa tucu apóstol Jesucristo equie nú rnibiya' Diose. Rquie'a carta quie' luhua li'ihua enu neli nzeli arqui' stichia' Jesucristo, li'ihua enu necala bee bene' Diose eyeche Efeso. 2Diose Pa'ahua cuna Jesucristo enu rnibiya' lua'ahua ri'inu nú cha nze'cahua cuna nú nzuxe arqui'hua. 3Che'tsa Diose pa' Jesucristo enu rnibiya' lua'ahua nú chiqui' ñia necanu, xne nee equie nú neca tucunecatse'ahua cuna Jesucristo, uri'ile'yalanu lia'ahua desde liñibe nu chiqui' rri'inu elietsa lua'ahua para nú chequie'ahua stichia'nu. 4Li'inu ucañinu lia'ahua equie cuenda' Jesucristo hasta chenu lasca' acache' iliulabe para nú huañia'ahua nu lecaxi na'ahua lunu sin dula, 5xne equie nú seca Diose lia'ahua, uri'inu nú riala nú aca'ahua bee lli'ñinu equie cuenda' Jesucristo, tucu nú uri'inu elliebacu' nú acane. 6Enze'e, la tsana'ahua nú sucu' aya'ahua Diose equie nú chiqui' ñia necanu, xne uri'i le'yalanu lia'ahua equie cuenda' Lli'ñinu Jesucristo enu secanu. 7Xne udixiulanu equie cuenda' stula'ahua chenu uri'chia rene'nu lu cruse nu scua uri'ila Diose perdona stula'ahua enze'e rlube' nú chiqui' secanu lia'ahua. 8Enze'e chiqui' lia uliqui'nu lunú reca elliebacu'ahua cuna nú rria'ahua beya', 9nu ulube'lanu lua'ahua xa neca elliebacu'nu hasta hua'tu tucu nú uri'inu elliebacu' nú acane. 10Nu elliebacu'cua' tsalunu chenu riña bichia ze'e, Diose tsa'na ye nú nu' liñibe cuna beenú nu' lu iliulabe ya Jesucristo. 11Le'ca equie nú neca tucu neca'tse'ahua cuna Jesucristo, ucañila Diose lia'ahua para nú aca'ahua bee bene'nu tucu nú udu' arqui'nu nú ri'inu hasta chenu lasca acache' iliulabe, xne li'inu rrinu yeene tucu nú niarqui'nu nú acane. 12Nu li'inu uri'ilanu scua para nú lia'ahua enu rluti uyalí arqui' Jesucristo, aca'ahua enu zucu' ayaa Diose equie nú rnibiya'nu. 13Le'ca li'ihua chenu ubene'hua stichia'nu nú neli neca nú xa tsila'ahua, che uyalí arqui'hua Jesucristo nu unga tucu necatsehua cuna li'inu. Nu tucu nú uni Diose nú liqui'nu Espíritu Santo luhua, nu nee nú nzula Espíritu Santo cuna li'ihua, li'inu necanu xi neca tucu sello nú rlube' nú necalahua para Diose. 14Equie nú nzula Espíritu Santo cuna lia'ahua enze'e yucua'ahua erencia nú uni Diose nú liqui'nu lua'ahua, chenu ye bee bene'nu nucua'ala liñibe para nú la tsuxe'ahua nú sucu' aya'ahua Diose equie nú rnibiya'nu. 15Nu lunú nediyala nú nzeli arqui'hua Jesucristo enu rnibiya', nu le'ca secahua beelá bee bene' Diose, 16la tsuxea nú rdetea che'tsa lu Diose equie cuenda'hua cada chenu rnacua lunu. 17Nu li'inu enu neca Diose enu rnibiya' desde liñibe, nu li'inu necanu pa' Jesucristo enu rnibiya' lua'ahua. Le'ca nacua lunu nú ri'inu nú aca elliebacu'hua para nú ri'ihua beya' lunú lube'nu luhua para nú nze chululáhua li'inu. 18Le'ca nacua lu Diose nú xa'lanu elliebacu'hua para nú ri'ihua beya' xa neca equie nú nzuculuhua hasta chenu ucañinu li'ihua nu ri'ihua beya' nú le'ca chiqui' llene nu ñia neca erencia nú nu'che' Diose para bee bene'nu. 19Le'ca rnacua lunu nú ri'ihua beya' nú chiqui' llene neca poder, nú rri'i elietsa lua'ahua nú nzeli arquia'ahua li'inu. Le'ca li'i poder llenecua' nú chiqui' ulube' Diose lua'ahua, 20chenu uri'inu nú uhuañi zeca Jesucristo, nu uzucu' Diose li'inu cue'tse Diose chubee liñibe, 21elu udete'nu nú rnibiya'nu lunu nú máse seca lu ye elu rnibiya', cuna ye elu usticia cuna ye bee gobierno. Le'ca másela seca elu rnibiya'cua' lu ye bee elurnibiya' nú nu' cuna nú nze chu'ulá lu iliulabe quie'. 22Chequie utsa'na Diose ye bee elurnibiya' cua' ya Jesucristo enu ucañinu para nú nibiya'nu lu ye bee bene enu nzeli arqui' li'inu. 23Nu bee bene enu nzeli arqui' Jesucristo, li'inu neli nehuañinu cuna li'ibeella nu catse nzunu xne li'inu necanu enu rnibiya'li.

will be added

X\