Colosenses 4

1Le'ca esquie li'ihua bee patrón, uri'ihua tucu nú rialane lubee bene enu rri'i riña' luhua nu uri'i nze'cahua lubeei xne li'ihua nediya'hua nú liñibe nzucu li'inu enu rnibiya' luhua. 2Utsutsiñahua na'cu'hua lu Diose sin nú llaca'hua, nu ude'te'hua che'tsa lunu. 3Le'ca una'cuhua lu Diose equie cuenda'ru para nú xa'lanu inziu nú nzetixiule'eru stichia' Jesucristo nú lasca' chulu bee bene hasta hua'tu. Nu equie cuenda' bedichia' cua' nchiñia ni'cu'. 4Le'ca una'cuhua lu Diose para nú ixiule'e nze'caa bee bedichia' cua' lubee bene tucu nú riala nú ixiule'ene. 5Uhuañihua tucu nú riala nú huañihua lubee bene enu lasca' chili arqui' Jesucristo, nu uni'hua lubeei stichia'nu chenu nu' modoe. 6Chenu rdichia'hua, uni'hua lubee bene bee bedichia' nú nuya' resuna para nú yu' arqui'beei lunú rnihua para nú chenu nedichia' bee bene luhua acahua cuaquihua lubeei. 7Tíquico, enu neca tucu bee sa'ahua enu chiqui' se'ca'ahua, li'illa enu neli rri'i elietsa lua lunú sibi'ru lu Jesucristo, li'illa ixiule'ella luhua lu ye nú xa nzucu'a ca'a. 8Xne para enze'e xe'laalla luhua para nú ixiule'ella luhua nú xa nellua'aru ca'a, nu para nú du'lla ana arqui'hua. 9Nu cuna li'illa xe'la Onésimo, tucu sa'hua enu se'ca'ahua nu nehuañilla tucu nú rialane nu necalla bene lachihua. Li'ibeella ixiule'ebeella luhua lu ye beenú reca ca'a. 10Aristarco, enu nchiñinua ni'cu' xe'la saludo luhua. Le'ca esquie Marco bichi e'ne Bernabé xe'la saludo luhua, nu udixiule'elá luhua nú ti neca Marco tunu nze'tabi'yalla li'ihua, uyucuhua li'illa tucu nú rialane. 11Nu le'ca esquie Jesús enu le'ca lee Justo, xe'la saludo luhua. Leta ye bee bene Israel enu nzeli arqui' Jesucristo, li'itsia beella neca beella enu rri'i elietsa lua para nú rixiule'eru xa neca nú rnibiya' Diose, nu li'ibeella neca beella enu rdu' ana arquia. 12Le'ca Epafras bene lachihua xe'la saludo luhua. Li'illa sibi'lla lu Jesucristo, yee bichia rnacu'lla lu Diose equie cuenda'hua para nú tsuta' arqui'hua lunú nzequiehua inziu' Diose nu ri'ihua beya' yeene tucu nú niarqui' Diose. 13Li'á nediya nze'ca nú chiqui' nzenu arqui' Epafras lu cuenda'hua, cuna lu cuenda' bee bene Laodicea, cuna lu cuenda' bee bene Hierápolis. 14Lucas enu neca doctor enu chiqui' se'ca'ahua cuna Demas, xe'la beella saludo luhua. 15Uri'ihua saludar bee sa'ahua enu nzeli arqui' Jesucristo enu nucua'a eyeche Laodicea, nu le'ca uri'ihua saludar Ninfas cuna ye bee bene' Jesucristo enu riete' sa' ni'lla. 16Chenu laxu nú ulahua carta quie', che xe'lahuane lubee bene eyeche Laodicea enu nzeli arqui' Jesucristo para nú le'ca ula beella lue. Nu le'ca carta nú uxe'la lubeella rqui'ña nú xe'la beellae luhua para nú le'ca ulahuane. 17Nu uni'hua lu Arquipo nú tsalulla lunú ucañi Jesucristo li'illa nú ri'illa. 18Li'á Pablo, nu le'ca li'á rquie'a letra quie' para nú xe'la saludo luhua. Ullu'cu' arqui'hua nú nchiñia ni'cu'. Diose ri'i nú cha nze'ca lu cuenda' yeehua. Amén.

will be added

X\