Colosenses 3

1Enze'e nee lunú rlu'culahua elunehuañi nú necuqui neca cuna Jesucristo, ucua'nahua nú ri'ihua elliebacu' lu cuenda' beenú nu' liñibe elu nzucu Jesucrito cue'tse Diose chube. 2La ri'ihua elliebacu' beenú nu'tsia lu iliulabe, máse uri'ihua elliebacu' beenú nu' liñibe, 3xne neca xi neca nú ungutilahua lu cuenda' nú nu' lu iliulabe nu rlu'culahua elu nehuañi nú necuqui neca equie cuenda' Jesucristo, lu Diose. 4Nu chenu riña Jesucristo, li'inu enu rliqui' elunehuañi lua'ahua, le'ca nuhua yalahua nú huañihua cuna li'inu elurnibiya'nu. 5Nee, utsana'hua ye beenú necha neca nu' lu iliulabe quie'. La ri'ihua bee eluhuexe ni' beenú lecaxi zibi', ni' bee elliebacu' nú necha neca, ni' beenú necha neca nú riu'u ana arqui'hua rri'ihua, le'ca la cua'nahua nú ri'ihua elu neyi' nú lu'cuhua huaxi beenú lu'cuhua xne nucua' neca xi neca nú rlu'cuhua ula'na lunú la neca Diose. 6Nu equie cuenda' bee nucua' nze'ta castiya' Diose nú zeca bee bene enu la zucu' nú rninu, 7nu sa' beenú necha neca cua' uri'ihua ante nú chuluhua Jesucristo. 8Pero nee utsana'hua ye beenú necha neca. La aca nelachi nzu arqui'hua, la leehua lubee sa'hua, nu la ri'ihua beenú necha neca lubee sa'hua, la ze'tahua bee sa'hua, nu la nihua bee bedichia' chi'qui'. 9La nihua eluquichia' lubee sa'hua, xne la nehuañia'hua tucu nú uhuañihua hua'tu chenu uri'ihua beenú necha neca. 10Xne uche'ela Diose xa nehuañihua, necalahua xi neca tucu bene cuqui equie nú lle'naa lle'naa nze acahua tucu nú niarqui' Diose nú acahua para nú chulu nze'cahua Diose, li'inu enu ureche' lia'ahua. 11Nu chenu uyalila arqui' bee bene Jesucristo lecaxi ri'i lunú ti neca beella, tunu neca beella bee bene Israel urre la neca beella bee bene Israel nu tunu nequiee seña nú rquiee bee bene Israel li'ibeella, urre la nequiee seña cua' li'ibeella, tunu necabeella bee bene rene nu tunu necabeella bene ixi nu tunu necabeella enu neiqui lu stucu bene urre la necabeella enu neiqui. Pero lunú máse seca nú chili arqui' bee bene Jesucristo, li'inu enu rnibiya' nu nzu cuna ye'ahua. 12Diose seca li'ihua, enze'e ucañinu li'ihua para nú acahua bee bene'nu. Enze'e uhua'a arqui'hua bee bene, aca nze'cahua nu la aca nelachihua. La aca nelliñahua, utsuquie arqui'hua bee sa'ahua. 13Uriqui'hua bee sa'hua, nu uri'ihua perdona li'ibeella tunu nu' xi rri'ibeella luhua. Tucu nú uri'i Jesucristo perdona li'ihua le'ca esquie uri'ihua perdona bee bene. 14Lu cuenda' yeene máse rqui'ña nú seca bee bene sa'lla. Nu eluseca cua' neca nú rri'i elietsa para nú huañi bee bene nú neca tucu necatse beella. 15Utsana'hua nú nibiya' Jesucristo luhua para nú lu'cuhua nú nzuxe arqui'hua xne para nucua' ucañi Diose li'ihua para nú aca tucu necatsehua lubee sa'hua equie cuenda' Jesucristo, nu ude'tehua che'tsa lunu equie cuenda' nucua'. 16Chiqui' udu'equiehua bee stichia' Jesucristo. Uze'te'hua bee sa'hua nu uni'hua bezete' lubeella tucu nú rialane. Diquinu' arqui'hua ude'te'hua che'tsa lu Diose, cuna bee canto cuna bee salmos nú cuna bee canto nú neca para li'inu. 17Ye beenú rri'ihua urre rnihua, rluti ullu'cu arqui'hua Jesucristo enu rnibiya' lua'ahua nu equie cuenda' li'inu dete'ahua che'tsa lu Pa'ahua Diose. 18Li'ihua bee una'a enu nechiala, uzu'cu'hua nú rni bee niyu'hua xne scua riala nú ri'i bee bene enu nzeli arqui' Jesucristo. 19Nu le'ca esquie li'ihua bee niyu enu nechiala, uzecahua bee una'ahua nu la xitse ri'inuhua li'ibeella. 20Le'ca esquie li'ihua bee endu', lu yeene uzu'cu'hua nú rni bee pa'ahua cuna nú rni bee na'hua, xne scua riu' arqui' Diose nú ri'ihua. 21Nu le'ca esquie li'ihua bee paa cuna bee naa, la detehua lunú rri'inuhua bee endu'hua para nú la laca quieebeei lunú rri'inuhua beei. 22Li'ihua bee enu rri'i riña' bee bene, uzu'cu'hua ye nú rni bee bene enu rri'ihua riña'lu lu iliulabequie'. La ri'itsiahua nucua' chenu ri'yatsia beella luhua para nú ya'na nze'cahua lubeella, uri'ihua riña'beella diquinu' arqui'hua equie nú rlucuhua ula'na lu Jesucristo. 23Tatse beenú ri'ihua, uri'ihuane diquinu' arqui'hua. Uri'ihua nucua' xi neca nú sibi'hua lu Jesucristo, nu la zibi'hua lubee bene. 24Xne li'ihua nediya'hua nú scua yucuhua lunú liqui' Jesucristo enu rnibiya', equie nú sibi'hua lunu. 25Pero bee bene enu rri'i nú necha neca, li'ibeei yalabeei castiya lunú necha neca uri'ibeei, xne tucutse rri'i Diose elu usticia'nu lubee bene.

will be added

X\