Los Hechos 9

1Nu bee bichia ze'e, la tsuxe Saulo nú rleei lubee bene enu nzeli arqui' Jesucristo, nu uni nú úti li'ibeella. Enze'e uyani'i lu ule'ya enu máse neca equie nu rnibiya' lu ye bee ule'ya, 2para nú acache' tucu ichi' nú nu' modo chai liñi bee indu eyeche Damasco che cua'nai bee bene enu nzeli arqui' Jesucristo niyu si una'a para nú uya'i li'ibeella nu du'i li'ibeella ni'cu' eyeche Jerusalén. 3Pero chenu nze riñai axu eyeche Damasco, tu'natsia ulaca tucu ellie'e nú nze'ta enza liñibe nu udu'llie'e ellie'e ze'e diqui abenchila' elu nza Saulo. 4Nu chu uzana' Saulo luyuu, nu ubene'i tucu chii nú uni: ―Saulo, Saulo, ¿xinu rri'i condralu li'á? 5Nu uni Saulo: ―¿Tiilu, Detá? Nu ucuaquinu: ―Li'á neca Jesuse enu rri'i condralu, le'catsia li'ilu rri'ilu equiya lulu. Tucu nú rri'i u'na' nú subeí lli'i icu' aca rucha. 6Nu recatse'tse' Saulo xiquilla, nu unilla: ―Detá, ¿xi niarqui'lu nú ri'á? Chequie uni Jesucristo lulla: ―Uzetee, nu uquia eyeche Damasco, ze'e ni bene ta nú ri'ilu. 7Nu bee bene enu nzenu Saulo chiqui' ulliqui beella, xne ubene' beella chii nú uni lulla, pero lecalí ti ulañi' beella. 8Chenu utsuli Saulo la bi'ya'lla, che una'tse bee bene enu nuulla yalla nu unguya'beella li'illa eyeche Damasco. 9Ze'e uzuculla chuna bichia, sin nú bi'yalla nu sin nú aculla, nu lecaxi ungue'lla. 10Eyeche Damasco ze'e nzucu tucu bene enu nzeli arqui' Jesucristo enu lee Ananías, Ananías quie' ulube'lu Jesuse lulla nu uninu lulla: ―¡Ananías! Nu ucuaquilla: ―Ca'a nzua, Detá. 11Chequie uni Jesuse lulla: ―Utsuli nu uquia inziu llene nú lee chubee, chenu riñalu ni' Judas nedichia'lu tucu bene eyeche Tarso enu lee Saulo. Xne rnacu'lla lua nee, 12nu neca xi neca nú rni xcala'lla ulañi'lla nú uyu'u tucu bene enu lee Ananías nu uricu'lla yalla equie Saulo, para nú bi'ya zecalla. 13Chenu ubene' Ananías nucua', unilla: ―Detá, huaxi bee bene rni lu cuenda' niyu cua', cuna lu ye beenú necha neca rri'illa lubee bene enu nzeli arqui' li'ilu eyeche Jerusalén. 14Nu nee uriñalla ca'a cuna elurnibiya' nú udete' bee ule'ya enu máse neca equie nu rnibiya' lu ye bee ule'ya para nú na'tsella ye bee bene enu nzeli arqui' li'ilu. 15Nu uni Jesuse lulla: ―Uquia, xne ucañia niyu cua' para nú ixiule'ella stichia'a lubee bene enu la neca bee bene Israel, cuna lubee arre, nu le'ca cuna nuu lubee bene Israel. 16Li'á ixiule'a lulla nú chiqui' huaxi nú nehuana zecalla equie nú necalla benea. 17Chequie nza Ananías ni'i elu nzucu Saulo. Chenu uyu'ulla liñi ni'i ze'e, uricu'lla yaalla equie Saulo, nu unilla: ―Saulo, Jesucristo enu ulube'lu lulu lu inziu nú nze'talu, li'inu uxe'lanu li'á lulu para nú bi'ya zecalu, nu para nú ya'na Espíritu Santo cuna li'ilu. 18Hora ze'e uzana' nú nacu' i'cululla nú rna xi rna melu tsu' bela, nu ubi'ya zecalla. Che utsulílla nu urinzalla. 19Che udacu Saulo lle'na nú udaculla nu uyu'u zeca juerza'lla, nu uya'nalla chiucu chuna bichia cuna bee bene enu nzeli arqui' Jesucristo enu nucua'a eyeche Damasco. 20Nu chu uquixie Saulo rixiule'ella Stichia' Diose liñi bee indu' bee bene Israel, nu unilla nú neca Jesuse Lli'ñi Diose. 21Ye bee bene enu ubene' nú rnilla chiqui' nzenu arqui'beei, nu unibeei: ―¿Xie' laca benecua' enu utiliaca' bee bene enu nzeli arqui' Jesucristo eyeche Jerusalén la? ¿Lanu le'ca li'i nucua' enu uriña ca'a para nú na'tse nucua' bee bene enu nzeli arqui' Jesucristo nu cheyu nucua' li'ibeella lubee ule'ya enu máse rnibiya' lu ye bee ule'ya la? 22Pero bichia por bichia la lliqui Saulo rixiule'ella Stichia' Diose, nu rnilla nú neca Jesuse Cristo, hasta nú la ri'i bee bene Israel enu nucua'a eyeche Damasco beya' xa ri'ibeei chenu ubene'beei nucua'. 23Udetetsia huaxi bee bichia, unga tucu necatse bee bene Israel enu nucua'a eyeche Damasco para nú úti beei Saulo, 24pero uri'i Saulo beya' nucua'. Bichia si rula' nucua'a quiebeei li'illa ru'u puerta eyeche ze'e para nú útibeei li'illa, 25che bee bene enu nzeli arqui' Jesucristo rula' udu' beella Saulo liñi tucu llume nu ulaca beella li'illa enza di'chi barda nú nu' diqui abenchila' eyeche ze'e, nu scua uchiu'ulla eyeche Damasco. 26Chenu uriña Saulo eyeche Jerusalén, uniarqui'lla nú yete'lla cuna bee bene enu nzeli arqui' Jesucristo, pero ye beella xiqui beella li'illa xne la chili arqui'beella nú le'ca nulla nzelíla arqui'lla Jesucristo. 27Chequie unguya' Bernabé li'illa lubee apóstol. Nu udixiule'ella nú ulañi' Saulo Jesucristo cuna nú ubedichia'nulla li'inu chenu nzalla enza eyeche Damasco, nu la lliquilla udixiule'ella stichia' Jesucristo lubee bene eyeche ze'e. 28Scua uya'na Saulo eyeche Jerusalén, nu uyanzeenulla cuna li'ibeella. 29Lá lliquilla udixiule'ella stichia' Jesuse, cuna nú unixulla cuna bee bene Israel enu rni dialu griego, chequie niarqui'beei nú útibeei li'illa. 30Chenu ungabiya' bee bene enu nzeli arqui' Jesucristo nucua', unguya'beella Saulo eyeche Cesarea, nu ze'e uxe'la beella li'illa eyeche nú lee Tarso. 31Chequie bee bene enu nzeli arqui' Jesucristo enu nucua'a lu iliu Judea, cuna lu iliu Galilea, cuna lu iliu Samaria, uyu'u nú nzuxe arqui'beella, cuna nú nze ri'ilá beella beya' xa neca inziu' Diose, nu uzucu'beella stichia'nu, nu cuna elietsa' Espíritu Santo nze aca huaxilá bee bene enu nzeli arqui' Jesucristo. 32Chenu nzebi'ya Pedro bee bene enu nzeli arqui' Jesucristo, chequie le'ca uyabi'yalla bee bene enu nzeli arqui' Jesucristo enu nucua'a eyeche nú lee Lida. 33Ze'e ulañi' Pedro tucu niyu enu riti enu lee Eneas, nu ungala xunu lana nú nuxulla ritilla, nu la tsulílla. 34Nu uni Pedro lulla: ―Eneas, Jesucristo neca enu uri'iyecala li'ilu. Uzetee nu uletsa nú ungutalu. Nu hora ze'e utsuli Eneas. 35Chenu ulañi' ye bee bene enu nucua'a eyeche nú lee Lida cuna bee bene enu nucua'a enza Sarón nú uyeca'lla, che le'ca uchili arqui' bee bene ze'e Jesucristo. 36Tiembu ze'e nzucu tucu una'a enu nzeli arqui' Jesucristo eyeche Jope li'illa leella Tabita, nu dialu griego leella Dorcas. Una'a quie' uri'illa nú neca nze'ca, nu le'ca uri'illa elietsa lubee bene elitsi. 37Bee bichia ze'e ungariti Dorcas nu ungutilla, nu chenu ulaxu nú ungutsa bee bene li'illa uya ricuche'e bee bene li'illa liñi ni'i elu aya equie ni'i ze'e. 38Nu lunú axu eyeche Jope lu eyeche Lida, elu nzucu Pedro, chenu ungabiya' bee bene enu nzeli arqui' Jesucristo nú nzucu Pedro ze'e, uxe'la beella chiucu niyu enu uya ziquiee lulla, nu unibeella lulla: ―Uri'i faura yexetsia ucha eyeche Jope. 39Nu chu nza Pedro cuna li'ibeella. Chenu uriña beella eyeche Jope, unguya'beella Pedro liñi ni'i elu nchiucu' cuerpo' Dorcas, ze'e nucua'a bee una'a zaqui runa' beenchu, che uyabica beenchu lu Pedro nu ulube' beenchu bee laquie nú ureche'e Dorcas chenu nehuañisca'lla. 40Chequie unibiya' Pedro nú chiu'u ye bee bene eli'ya', nu chu utsulliquilla nu unacu'lla lu Diose, nu ubi'yalla lu benenguti ze'e nu unilla: ―¡Tabita, uzetee! Hora ze'e chu uya'la i'cululla, nu chenu ulañi'lla Pedro, chu uzuculla. 41Nu chu una'tse Pedro yalla nu utsulílla, che ubixia Pedro bee bene enu nzeli arqui' Jesucristo, cuna bee una'a zaqui para nú lañi' beella nú uhuañi zeca Dorcas lu eluti. 42Nu diqui lu eyeche Jope ungabiya' bee bene nucua', nu huaxi bee bene ze'e uyalí arqui' Jesucristo equie cuenda' nucua'. 43Uya'na Pedro chiucu chuna bichia eyeche ze'e, ni' tucu bene enu lee Simón enu rcu'chi iti.

will be added

X\