Los Hechos 8

1Nu para Saulo neca nze'ca nú unguuti bee bene Esteban. Nu le'ca bichia ze'e uquixie bee bene nú uri'ibeei nú nehuana seca bee bene' Jesucristo eyeche Jerusalén. Ye beella uri'chialetse beella diqui lubee iliu Judea, cuna lu iliu Samaria, uya'natsia bee apóstol'nu eyeche Jerusalén. 2Chequie chiucu chuna bee niyu enu nzenu cuenda nú nzucu Diose uyaca'chi' beella cuerpo' Esteban nu chiqui' unguna'nu beella li'illa. 3Nu uquixie Saulo nú una'tsei bee bene enu nzeli arqui' Jesucristo, nu riu'i ni' por ni' beella, nu ala juerza ruya'i niyu si una'a rdu'i ni'cu'. 4Pero bee bene enu uchiu'u eyeche Jerusalén udixiule'e beella bedichia' nze'ca' Diose catse elu nzuebeella. 5Felipe enu neca tucu bene leta beella, uyalla eyeche llene Samaria, nu uquixiella rixiule'ella stichia' Jesucristo lubee bene ze'e. 6Uyetesa' huaxi bee bene nu yebeella sucu'diaca beella lunú udixiule'e Felipe lubeella, cuna lunú ulañi'beella bee milagro llene nú uri'illa. 7Xne uri'iyecalla huaxi bee bene enu nchiñi benechiqui' arqui', nu rixiali bee benechiqui' ze'e xiu'u arqui'beei. Le'ca uri'iyecalla bee bene enu neati tucu parte cuerpo' cuna bee bene enu necuxu. 8Enze'e chiqui' ñia utsu arqui' ye bee bene eyeche ze'e. 9Pero eyeche ze'e nzucu tucu bene enu lee Simón, hasta hua'tu rri'i elu uliñi nu sequienui bee bene eyeche Samaria, nu rri'i nú necai tucu bene enu neca equie. 10Ye bee bene ze'e ubene'beei lunú uni Simón, desde bee endu' lla'na nu hasta bee bene uxu, nu unibeei: ―Niyu quie' chiqui' rlu'cu poder nú rlu'cu Diose. 11Chiqui' rri'i caso beei lunú rni, xne hasta hua'tu sequienui bee bene equie elu uliñi nú rri'i. 12Pero chenu uyalí arqui' bee bene lunú udixiule'e Felipe equie cuenda' poder nú rlu'cu Diose, cuna equie cuenda' Jesucristo. Che urinza beella niyu si una'a. 13Nu hasta li'i Simón quie' uyalí arqui'lla Jesucristo nu urinzalla, nu uquixie enzenulla Felipe, cuna nú nzenu arqui'lla lu ye clasia' bee milagro llene nú rlañi'lla rri'i Felipe. 14Chequie chenu ungabiya' bee apóstol' Jesucristo enu nucua'a eyeche Jerusalén nú uchili arqui' bee bene Samaria Stichia' Diose, uxe'la beella Pedro cuna Juan lubee bene ze'e. 15Chenu uriñabeella eyeche Samaria, unacu' beella lu Diose equie cuenda' bee bene enu uyalí arqui' Stichia' Diose para nú yucu arqui'beella Espíritu Santo. 16Xne ni' tucu beella lasca' yucu arqui'beella Espíritu Santo, urinzatsia beella cuna nú lee Jesucristo. 17Chequie uricu' Pedro cuna Juan ya beella equie bee bene ze'e para nú uyucu arqui'beella Espíritu Santo. 18Chenu ulañi' Simón nú uyucu arqui' bee bene ze'e Espíritu Santo equie nú uricu' bee apóstol ya beella equie bee bene ze'e, uniarqui'lla nú dete'lla dimi ya beella, 19nu unilla: ―Le'ca nua uli'qui' poder cua' lua para nú chenu ricua yaa equie tatse bene, le'ca yucu arqui' nze'e Espíritu Santo. 20Chequie uni Pedro lulla: ―Li'ilu cuna dimi'lu nitilulu, xne rri'ilu elliebacu' nú tsilu poder nú lia rliqui' Diose. 21Li'ilu ni'teme' la yala nú ri'ilu tucu nú rri'iru, xne ni'teme' la chequieelu inziu' Diose. 22Utsana' arqui' beenú necha neca rri'ilu nu uche'e elliebacu'lu, nu uziquiee lu Diose tunu tianu' xa ri'inu perdona lunú necha uri'ilu elliebacu' scua. 23Xne puro nú necha neca nu' arqui'lu, nu rnibiya'sca' dula lulu. 24Che ucuaqui Simón nú unilla: ―Una'cuhua lu Diose equie cuendaa para nú la zeca ni' tucu beenú unihua. 25Chenu ulaxu nú unibeella stichia' Jesucristo cuna nú unibeella Stichia' Diose lubee bene ze'e, cheelá ubenchila' zeca beella eyeche Jerusalén. Nu ye bee eyeche nú nchiucu' lu iliu Samaria elu udete beella udixiule'e beella Stichia' Diose lubee bene. 26Lulá bee nucua', uni tucu ángele' Diose lu Felipe: ―Uquia enza sur, inziu nú xiu'u enza Jerusalén nu nza enza eyeche nú lee Gaza. Inziu ze'e rdete lu dañi achi. 27Che uchiu'u Felipe nú nzalla, nu lu inziu ulluna'lla tucu niyu eyeche Etiopía. Neca benequie' enu chiqui' neca equie xne rricuche'ella ye dimi' reina Candace enu rnibiya' Etiopía, nu uyaalla eyeche Jerusalén udete'lla ula'na lu Diose. 28Nu nu' nziulalla nú nzialla enza lachilla, nzuculla equie acareta'lla rulalla lu ichi' Stichia' Diose nú uquie'e profeta Isaías. 29Che uni Espíritu Santo lu Felipe: ―Uquiabica lu acareta cua'. 30Chenu uyabica Felipe lu acareta ze'e, ubene'lla nú rula bene ze'e lu ichi' Stichia' Diose nú uquie'e profeta Isaías, nu unidichia'lla lu bene ze'e: ―¿Detá rri'ilu beya' lu ichi' nú rulalu la? 31Chequie ucuaqui bene ze'e nú unilla: ―¿Xa ri'á beya' nú rnii, tunu lecati ixiule'e lua xa rnii? Nu uni bene ze'e lu Felipe nú quieella equie acareta nu cua'a junto beella. 32Lu ichi' Stichia' Diose elu rulalla rni: Unguya' bee bene li'inu xi neca tucu sanchi, elu úti beei li'inu; nu lá ninu xi neca tucu sanchi enu lecaxi ri'i nuxu lu bene chenu xiecu' bene ichia tsu'í. 33Chenu xitse uri'inu bee bene li'inu. Lecati uri'i elu usticia lu cuenda'nu, ¿ti nii nú ti neca bee bene'nu enu udetela? Xne uchiu'ulanu lu iliulabe quie'. 34Chequie uni bene ze'e lu Felipe: ―Uri'i faura uni' lua, ¿ti lu cuenda' rni profeta cua', rnilla lu cuenda' li'itsialla la, urre rnilla lu cuenda' stucu bene la? 35Chequie uquixie Felipe nú udixiule'ella xi rni luhuare lu Stichia' Diose elu rulalla, nu uni Felipe equie cuenda' bedichia' nze'ca' Jesucristo lulla. 36Lu ze'elá chenu udete beella tucu luhuare elu nu' inza, uni bene ze'e lu Felipe: ―Ca'a nu' inza, ¿nu' modo rinzalu li'á ca'a nee la? 37Nu uni Felipe lulla: ―Nu' modoe, tunu diquinu' arqui'lu chili arqui'lu Jesuse. Che unilla: ―Chili arquia nú Jesucristo neca Lli'ñi Diose. 38Chequie unibiya'lla nú utsuxe acareta'lla, nu ulaca rucu beella equie acareta ze'e, nu uyu'u beella lu inza nu urinza Felipe li'illa. 39Chenu uchiu'u beella lu inza, hora ze'e tu'natsia uniti Felipe nu unguya' Espíritu Santo li'illa, nu né lañia' bene ze'e li'illa. Pero chiqui' ñia nzu arqui'lla nze ri'illa seidu inziu'lla. 40Chenu uri'i Felipe beya' nú hasta eyeche Azoto nzulalla, che eyeche por eyeche udixiule'ella bedichia' nze'ca' Jesucristo lubee bene, hasta nú uriñalla eyeche Cesarea.

will be added

X\