Los Hechos 6

1Bee bichia ze'e, chenu nze aca huaxilá bee bene enu nzeli arqui' Jesucristo, che bee bene enu rni dialu griego uquixiebeella nú xanabitsi beella lu cuenda' bee bene enu rni dialu hebreo. Unibeella nú yeye'e chenu ritsi' bee elubacu, lle'nalá nú riucu bee una'a zaqui enu rni dialu griego luquelá nú riucu bee una'a zaqui enu rni dialu hebreo. 2Chequie ye chi'chiucu bee apóstol uquiete' sa'beella ye bee bene enu nzeli arqui' Jesucristo, nu unibeella: ―La necanze'ca nú tsana' arqui'ru nú rixiule'eru Stichia' Diose para nú ritsi'ru nú acu bee bene. 3Enze'e bee sa'a enu nzeli arquia'ahua Jesucristo, ucañihua achi bee niyu letahua enu ri'i riña' cua', nu nediya'hua nú nehuañi beella tucu nú rialane, cuna nú neli nzu Espíritu Santo cuna li'ibeella, cuna nú rlu'cu beella lunú reca beella. 4Li'iru nzenacu'láru lu Diose cuna nú nze tixiule'eru stichia'nu lubee bene. 5Yebeella unga tucu necatse beella nú acane scua, nu ucañi beella Esteban, enu chiqui' nzeli arqui' Jesucristo, nu chiqui' nzu Espíritu Santo cuna li'illa, nu le'ca ucañi beella Felipe, Procoro, Nicanor, Timón, Parmenas, cuna Nicolás, enu neca bene eyeche Antioquía. Nicolás quie' la necalla bene Israel, pero uyalí arqui'lla tucu nú uyalí arqui' bee bene Israel ante nú chili arqui'lla Jesucristo. 6Chequie uriñayu beella achi bee niyu ze'e lubee apóstol para nú unacu' beella lu Diose lu cuenda' beella nu uricu' beella ya beella equie beella. 7Pero másela nzeri'chia Stichia' Diose lubee bene, cuna nú nze aca huaxilá bee bene enu nzeli arqui' Jesucristo eyeche Jerusalén, hasta bee ule'ya' bee bene Israel huaxi beella uyalí arqui'beella Jesucristo. 8Chiqui' uri'i Diose elietsa lu Esteban, nu udete'nu poder lulla nú rri'illa huaxilu bee milagro nú llene neca lubee bene. 9Chequie chiucu chuna bee bene liñi indu nú lee Esclavos Libertados, cuna bee bene eyeche Cirene, cuna bee bene eyeche Alejandría, cuna bee enu nze'ta enza Cilicia, cuna bee bene Asia, uquixiebeei nú unixu beei cuna Esteban. 10Pero bee benequie' lá ri'i stichia' beei ana lunú reca elliebacu' Esteban, equie nú rri'i Espíritu Santo elietsa lulla. 11Chequie udixiu beei chiucu chuna bee bene enu ni nú rni condra Esteban Moisés cuna Diose. 12Scua uri'ibeei para nú ulee bee bene eyeche ze'e, cuna bee bene enu neca equie, cuna bee ulaxcuela enu reca ley' Moisés lu Esteban. Che una'tse beei li'illa nu uyayu beei li'illa lubee ustichia' bee bene Israel. 13Nu le'ca ucua'na beei bee bene enu uni eluquichia' para nú uni bee nze'e: ―Niyu quie' la tsuxella nú se'talla ley' Moisés cuna indu' Diose. 14Li'iru ubene'ru nú rnilla nú Jesuse bene eyeche Nazaret nitilulla indu llene Jerusalén, nu che'ella bee custumbre nú utsa'na Moisés lua'ahua. 15Chequie bee usticia cuna ye bee bene enu nucua'a ze'e, chenu ulañi'beella lu Esteban, ulañi'beella nú rnaa lulla xi rnaa lu tucu ángele' Diose.

will be added

X\