Los Hechos 5

1Pero uhuañi stucu niyu enu lee Ananías, nu una'lla lee Safira, ungüiti beella tucu yu' beella. 2Pero unga tucu necatse beella nú uya'nanu beella lle'na dimi quie' nu lle'nae udete'lla ya bee apóstol. 3Che uni Pedro lulla: ―Ananías, ¿xinu uzelalu nú uri'i beze'lu ana lulu para nú unga niquichia'lu lu Espíritu Santo nú uya'nanulu lle'na dimi nú ungüitilu yu'lu? 4Ante nú utilu yuu ze'e, ¿xie' la neca yuu ze'e stene'lula? nu chenu ungüitilue, ¿xie' la neca dimi ze'e dimi'lu la? ¿Xinu ullela arqui'lu nú uri'ilu scua? Unga niquichia'lu lu Diose nu né aca nequichia'lu lubee bene. 5Chenu ubene' Ananías bee bedichia' quie' chu uyecatalla luyuu nu ungutilla. Che ye bee bene enu ungabiya' xi ulle'calla chiqui' ulliqui beella. 6Chequie uriña bee niyu e'ne' ze'e nu utela beei tucu laquie cuerpo'lla Che unguya'beei cuerpo'lla nu uyaca'chi' beei li'illa. 7Chenu udetela tucu chuna hora uriña una'a Ananías ze'e nu la ri'inchu beya' xi unga. 8Nu unidichia' Pedro lunchu: ―Uni', ¿neli nú ungüitihua yu'hua tucu nú uni niyu'lu la? Nu ucuaqui Safira nú uninchu: ―Esquie ungüitirune. 9Che uni Pedro lunchu: ―¿Xinu unga tucu necatse stichia'hua nu unga nequichia'hua lu Espíritu Santo? Lu'tsia enta bee bene enu uya ca'chi' niyu'lu, nu nee le'ca scua che cachi' beei li'ilu. 10Hora nú uni Pedro scua lunchu uyecatanchu lu Pedro nu ungutinchu. Chenu uyu'u bee niyu e'ne' liñi ni'i ze'e ulañi'beei nú ungutilanchu. Nu ulua beei li'inchu para nú nzecachi' beei li'inchu tucu chu cue'tse tuxie niyu'nchu. 11Ye bee bene enu nzeli arqui' Jesucristo, cuna ye bee bene enu ungabiya' lunú unga chiqui' ulliqui beella. 12Chequie uri'ilá bee apóstol huaxi bee milagro lubee bene eyeche ze'e; nu yebeella riete'sa'beella ru'u cordure nú lee cordure' Salomón. 13Bee bene eyeche ze'e chiqui' uni nze'ca beei lu cuenda' bee bene enu nzeli arqui' Jesucristo, pero xiqui beei nú ayete'sa'beei cuna li'ibeella. 14Scua unga huaxilá bee bene enu uyalí arqui' Jesucristo niyu si una'a. 15Nu hasta rlua bee bene bee bene enu riti labe inziu nu rixiu beei li'ibeella lu eda' urre lu camilla para nú chenu dete Pedro masia xca'lalla dete equie beella para nú yeca' beella. 16Nu le'ca bee bene enu nucua'a bee eyeche axu Jerusalén, huaxi bee bene ze'e uyanu beei bee bene enu riti cuna bee bene enu nchiñi benechiqui' arqui' eyeche Jerusalén nu yebeella uyeca' beella. 17Chequie ule'ya enu máse neca equie nu rnibiya' lu ye bee ule'ya cuna bee saduceo enu nucua'a cuna li'illa, chiqui' uye arqui'beei lubeella. 18Che unibiya' beei nú ulluna bee apóstol nu udu' beei li'ibeella ni'cu'. 19Pero rula' ze'e tucu ángele' Diose uxa'la ru'u bee puerta' ni'cu' ze'e. Nu ulua ángele ze'e li'ibeella liñi ni'cu', nu uninu lubeella: 20―Uquiahua liñi Indu llene Jerusalén nu udixiule'ehua lubee bene para nú ri'ibeei beya' xa lu'cu beei elunehuañi nú leca xunga laxu lu Diose. 21Chenu ubene'beella nú uni ángele ze'e scua. Silatu' stucu bichia uyu'u beella liñi indu ze'e, nu uquixiebeella uzete' beella Stichia' Diose lubee bene. Chequie ule'ya enu máse neca equie nu rnibiya' lu ye bee ule'ya cuna beelá bee bene enu nzu cuna li'illa ze'e, uquiete' sa'beei bee usticia cuna ye bee bene enu rnibiya' leta bee bene Israel, nu unibiya' beei nú chetucu bee sundado bee apóstol liñi ni'cu'. 22Pero chenu uriña bee sundado ru'u puerta ni'cu' ze'e, lá llela'beei bee apóstol, nu ubenchila' zeca beei nu udixiule'e beei lubee usticia. 23Nu unibeei: ―Chenu uriñaru ru'u ni'cu' nacuta' ru'u ni'cu', nu ze'e nucua'a bee sundado enu rriucu ru'u ni'cu'. Pero chenu uxa'laru ru'u ni'cu' ni'tucu leca' ti nu' liñi ni'cu'. 24Chequie ule'ya enu máse neca equie nu rnibiya' lu ye bee ule'ya cuna capitañi enu rnibiya' lubee sundado enu rriucu Indu llene Jerusalén cuna beelá bee ule'ya enu rnibiya', chenu ubene'beei nucua' uquixiebeei nú rri'ibeei elliebacu' xa laxulu bee nucua'. 25Hora ze'e uriña tucu niyu enu uni lubeei: ―Bee bene enu udu'hua ni'cu' nucua'ala beella liñi indu sete' beella bee bene. 26Chequie capitañi ze'e cuna bee sundado nzetucu beei bee apóstol, pero lecaxi uri'inu beei li'ibeella xne xiqui beei nú cá du' bee bene eyeche ze'e quiee li'ibeei. 27Chenu uriñayu beei bee apóstol udete'beei li'ibeella lubee usticia, chequie ule'ya enu máse neca equie nu rnibiya' lu ye bee ule'ya uni lubeella: 28―¿Xie'lanú ita unibiya'ru luhua nú la zetea'hua stichia' Jesuse lubee bene la? Nu nee uri'ihua nú yela bee bene Jerusalén ungabiya' bee bedichia' cua', nu le'ca niarqui'hua nú ricu'quiyahua li'iru nú ungutiru Jesuse cua'. 29Nu ucuaqui Pedro cuna beelá bee apóstol lubeella: ―Rluti rqui'ña nú zucu'xuru nú rni Diose cheela zucu'ru nú rni bee bene. 30Diose' bee bene'ahua enu udetela uri'inu nú uhuañi zeca Jesuse enu ungutihua lu cruse. 31Nu uzucu' Diose li'inu cue'tse Diose chúbe liñibe, nu li'inu necanu enu rnibiya' nu sila'anu bee bene lu dula, nu equie cuenda' li'inu nu' modo nú tsana' arqui' bee bene Israel stula beei nu scua ri'inu perdona li'ibeei. 32Li'iru nediya' nze'caru nú neli bee nucua' cuna Espíritu Santo nú rdete' Diose lu ye bee bene enu sucu' stichia'nu. 33Chenu ubene'beella nucua', chiqui' ulebeella nu niarqui'beella úti beella bee apóstol 34Pero leta bee usticia ze'e nzucu tucu fariseo enu lee Gamaliel, nu necalla ulaxcuela enu reca ley, nu chiqui' rlu'cu bee bene ze'e ula'na lulla. Benequie' utsulílla nu unibiya'lla nú chiu'u bee apóstol eli'ya' lle'na. 35Nu chu unilla lubee usticia ze'e: ―Bee bene Israel, uri'i nze'cahua elliebacu' xa ri'inuhua bee niyu quie'. 36Ullu'cu arqui'hua nú xa uri'i tucu bene enu lee Teudas hua'tu, uni nú necai tucu bene enu neca equie, nu neca tucu tacu ayu'u bee bene'i, pero chenu unguuti bee bene li'i, ye bee bene enu uyaquie li'i uri'chia letse beei, ze'e ulaxu ye nu uri'i. 37Le'ca bee bichia chenu unibiya' gobierno nú bacu' calu neca bee bene. Uchiu'u Judas enu neca bene Galilea, le'ca esquie ulu'cui huaxi bee bene'i, pero chenu unguuti bee bene li'i, uri'chia letse bee bene'i. 38Enze'e nia luhua nú utsana'hua bee niyu cua', nu ula'ahua li'ibeella. Xne tunu neca nucua' bezete' nú udete' bee bene lubeella nú ri'ibeella scua, laxu nucua'. 39Pero tunu equie cuenda' Diose rri'ibeella nucua', leca modo tsuxehua lunú rri'ibeella scua. Ubi'yahua tunu cá rri'i condrahua lunú neca cuenda' Diose. 40Che uri'i bee usticia ze'e caso lunú uni Gamaliel, nu ubixia beei bee apóstol nu uzeteche' beei li'ibeella, nu unibeei nú la chetixiulea' beella stichia' Jesuse lubee bene, nu chu ula'a beei li'ibeella. 41Nu chenu uchiu'u beella lubee usticia ze'e, chiqui' ñia nzu arqui'beella xne utsana' Diose nú nehuana ulle'ca beella equie cuenda' Jesuse. 42Nu ye bichia né tsana' arqui'beella udixiule'e beella cuna nú uzete' beella bedichia' nze'ca' Jesucristo lubee bene, sia liñi Indu llene Jerusalén cuna ni' bee bene.

will be added

X\