Los Hechos 25

1Chenu udete chuna bichia nú uriña Festo eyeche Cesarea para nú acalla gobernador, che uyalla Jerusalén, 2ze'e bee ule'ya enu rnibiya' lubee ule'ya cuna bee bene Israel enu neca equie uriñabeella lu Festo nu uxanabitsi beella lu cuenda' Pablo lulla. 3Nu uziquiee beella lulla nú xe'lalla Pablo Jerusalén. Scua niarqui'beella xne neca'la' beella nú úti beella Pablo lu inziu. 4Pero ucuaqui Festo lubeella nú eyeche Cesarea nchiñi Pablo ni'cu', nu la lea' nú benchila' Festo ze'e, 5nu unilla lubeella: ―Bee bene enu rnibiya' letahua, li'ibeella tsebeella Cesarea, nu tunu nu' xi uri'i benecua', ze'e nibeella lunú xi uri'illa. 6Stucu se xunu bichia urre se xi'i bichia uzucu Festo Jerusalén, cheela ubenchila'lla Cesarea. Stuculá bichia uzuculla elu rnibiya'lla. Nu unibiya'lla nú ye'ta yuu beella Pablo. 7Chenu uriña beella cuna Pablo, bee bene Israel enu nze'ta enza Jerusalén, ube'tabica beella lu Pablo nu rricu'quiya beella Pablo nú uri'illa huaxi beenu chiqui' necha neca añinzuca nú ni' tucu nú unibeella né aca beella alube' beella nú neli necane. 8Chequie ucuaqui Pablo lubeella: ―Ye nú rni ley' bee bene Israel sucua bee nucua', nu lá ri'á nú necha neca lu Indu llene Jerusalén nu ni' lu arre César. 9Pero niarqui' Festo nú ya'na nze'calla lubee bene Israel, chequie unidichia'lla lu Pablo: ―¿Xie' niarqui'lu nú chalu Jerusalén para nú ze'e hualurune lu cuenda'lu tunu neli urre la neli lunú rni beella lu cuenda'lu la? 10Chequie ucuaqui Pablo nú unilla: ―Lubee usticia Roma nzua elu riala nú chiu'ulue lu cuenda' nú xi uri'á, li'ilu nediya' nze'ca'lu nú lá ri'á ni' tucu nú necha neca lubee bene Israel. 11Tunu uri'á tucu nú necha neca nú riala nú atia, lacá nú atia. Pero tunu la neli ye lunú rnibeella nú uri'á, lecati riala dete' cuenda li'á lubeella mejora dete'a lu arre César. 12Chequie chenu ulaxu nú uni Festo lubee bene'lla enu rni nú xi riala aca, unilla lu Pablo: ―Li'ilu unacu'lu nú du'inzaa li'ilu lu arre César. Nee du'inzaa ali'ilu lulla. 13Chenu udete chiucu chuna bichia, uriña arre Agripa cuna Berenice Cesarea nu nze'ta bi'yabeella gobernador Festo. 14Nu lunú huaxi bichia ucua'a beella ze'e, che ubedichia'nu Festo arre Agripa lu cuenda' Pablo, nu uni Festo lulla: ―Ca'a utsa'na Felix tucu niyu ni'cu'. 15Chenu uya'a Jerusalén, bee ule'ya enu rnibiya' lubee ule'ya cuna bee bene enu rnibiya' lubee bene Israel uniquiya beella lu cuenda'lla lua, rnacu' beella nú nibiya'a nú atilla. 16Pero li'á unia lubeella nú bee usticia Roma la neca costumbre' beella nú nibiya' beella nú ati tucu bene ante nú detella lubee enu rri'i condra li'illa para nú nibeei tunu neli lunú uri'illa urre la nelii. 17Enze'e, chenu ube'ta bee bene Israel ca'a, la le'a, stucu bichia chu uzucua'a lu xleta elu rnibiya'a nu unibiya'a nú ube'tayu beei niyu cua' lua. 18Pero bee bene enu ube'ta para nú uxanabitsi beei xi uri'illa, né ricu' quiya beei nú necha neca li'illa tucu nú uri'á elliebacu'. 19Lunú uxana bitsitsiabeei lu cuenda'lla neca equie bee costumbre'beei, cuna lu cuenda' tucu bene enu lee Jesuse enu unguti, pero Pablo uni nú nehuañi Jesuse ze'e. 20Nu lunú la ri'á beya' xa ri'á equie cuenda' bee nucua', che unidichia'a lu Pablo tunu niarqui'lla nú chálla Jerusalén para nú tsúxcua'a bee nucua' ze'e. 21Pero li'illa unacu'lla nú detella lu arre César para nú tsúxcua'a lunú rnibeei lu cuenda'lla, enze'e unibiya'a nú nchiñiche'calla hasta nú aca ana nú xe'laalla lu arre César. 22Chequie uni arre Agripa lu Festo: ―Tunu nu' beya'e, le'ca nua niarquia yenea lunú rnilla. Nu ucuaqui Festo nú unilla: ―Ye'e yene'lu lunú nilla che. 23Stucu bichia, ñia utsuche' arre Agripa cuna Berenice uriña beella cuna bee bene enu rnibiya' lubee sundado cuna beelá bee bene enu neca equie eyeche ze'e, uyu'u beella liñi ni'i elu yene' beella lunú ni Pablo, che unibiya' Festo nú uyatucu beei Pablo, 24nu uni Festo: ―Arre Agripa, cuna yehua enu nellua'anuru ca'a. Bene enu nzuquie', ye bene Israel nu sia Jerusalén nu sia ca'a, nze'ta beei lua rnacu' beei nú atilla. 25Li'á la llela ni'tucu equiya nú uri'illa nú riala nú atilla. Nu li'illa unacu'lla nú detella lu arre César elu tsuxcua'e lu cuenda'lla, nu udu' arquia nú xe'lalla lu arre César. 26Pero lállelaa xi quie'a lu cuenda'lla lu ichi' nú xe'la lu arre César enu rnibiya' lua, enze'e detealla lu yehua, nu máse necane lulu arre Agripa para nú chenu ulaxu nú unidichia'hua lulla lunú rqui'ña nú nedichia'hua lulla, che nu' xi quie'a lu cuenda'lla. 27Xne se'ca nú la neca nze'ca nú xe'la tucu bene enu nchiñi ni'cu' lu arre César, tunu la nia xi uri'illa.

will be added

X\