Los Hechos 24

1Chenu udete ayu' bichia, ule'ya Ananías enu máse neca equie nu rnibiya' lu ye bee ule'ya, uriñalla eyeche Cesarea cuna chiucu chuna bee usticia' bee bene Israel nu cuna tucu abogado enu lee Tértulo. Nu uyabeella lu gobernador para nú uricu'qui'ya beella Pablo. 2Chenu uriñayu beei Pablo, uquixie Tértulo nu uniquiyalla lu cuenda' Pablo nu unilla lu gobernador Félix: ―Che'tsalu detá gobernador, equie cuenda' li'ilu nellua'a nze'caru, nu equie nú reca elliebacu'lu huaxi beenú sibi' recache' lachiru. 3Diqui bee luhuare neca conforme bee bene lu ye beenú rri'ilu detá gobernador Felix, li'ilu enu chiqui' neca equie, che'tsa dexquixiulu. 4Pero para nú la ri'i le'a li'ilu, ziquia lulu nú yene'lu tucu rratu lunú niru lulu. 5Niyu quie' ungabiya'ru nú necalla xi neca elichia leta bee bene Israel, nu diqui lu iliulabe enzeella nu rri'illa nú rliu bee bene, li'illa necalla enu rnibiya' lubee bene enu rri'chia bee bene Nazareno. 6Nu le'ca uniarqui'lla nú ri'illa nú aca indu'ru xi neca tucu luhuare nú la zibi', enze'e una'tseru li'illa nu niarqui'ru nú ari'iru elusticia tucu nú neca ley'ru. 7Pero chenu uriña comandante Lisias cuna bee sundado'lla nu uhuaxu'ulla Pablo leta yaru. 8Nu uni comandante ze'e nú lulu ye'ta bee enu rri'i condra Pablo, neequie li'i e'culu nu' modo nedichia'lu lubeella para nú ri'ilu beya' nú neli nú rricu' quiyaru li'illa. 9Nu bee bene Israel enu nucua'a ze'e unibeella nú neli ye bee nucua'. 10Nu chu uri'i gobernador ze'e seña lu Pablo para nú nilla, nu unilla: ―Equie nú nediyaa nú hua'tula rnibiya'lu lu nación Israel scua tucu nzutse arquia cuaquia lulu lunú rricu'quiya beella li'á. 11Lecaxi neriña' para nú ri'ilu beya' nu necatsia chi'chiucu bichia nú uriña Jerusalén, para nú detea ula'na lu Diose. 12Nu lecati uchu'u li'á nú rnixua cuna ni' tucu bee bene, nu la tsurechea bee bene liñi Indu llene Jerusalén, nu ni' liñi beelá bee indu, nu ni' leta eyeche ze'e. 13Bee benequie' lecaxi lube' beei nú neli lunú rricu'quiya beei li'á. 14Pero lunú neli neca, necane tucu nú nzeli arquia Jesucristo nu inziucua' neca nú nzequia nu sibi'a lu Diose' bee bene'ahua enu udetela, nu rni bee benequie' nú laca nucua' inziu' Diose, pero li'á rri'á scua equie nú nzeli arquia ye beenú nze'ta lu ley cuna beenú uquie'e bee profeta. 15Tucu nú nzeli arqui' bee benequie' Diose le'ca scua nzeli arquia li'inu, nú huañi zeca bee benenguti, masia nú neca beella enu uri'i nú necanze'ca nu masia nú neca beella enu uri'i nú necha neca. 16Enze'e rcua'na nú huañia tucu nú neli neca lu Diose para nú la nchiñi nú necha neca elliebacua lunu, nu ni' lubee bene. 17’Necala huaxi lana nú uchiu'a lachia, nu hasta neelá ubenchila' zeca lachia, nu ubelayua beenú uxe'la bee bene para bee bene elitsi, nu le'ca ubelayua u'na lu Diose. 18Nucua' neca nú rri'á liñi Indu llene Jerusalén chenu uchu'u bee bene Israel enu nze'ta enza Asia li'á, pero uri'ilá tucu nú rnibiya' ley para nú lecaxi naa. Nu leca huaxi bene ze'e nu le'ca lá tsurechea bee bene. 19Nee bee bene enu una'tse li'á, li'ibeei riala nú ye'ta beei ca'a lulu para nú nibeei xi uri'á nú rana arqui'beei li'á. 20Urre ni bee bene enu nucua'a ca'a xi equiya uchu'u beei nú uri'á chenu uya'a lubee usticia' bee bene Israel. 21Lunú uri'itsia chenu nzua lubeei nú juerte unia: “Equie nú nzeli arquia nú huañi zeca bee benenguti. Enze'e rri'i condra beei li'á nee.” 22Chenu ubene' gobernador Felix nucua', nu lunú nediya'la'lla xa neca inziu' Jesucristo nú necuqui neca, che utsa'nalla nucua' para stucu bichia nu unilla lubee bene ze'e: ―Chenu ye'ta comandante Lisias, che ri'i nze'caa beya' xa neca lu cuenda'hua. 23Chequie unibiya' gobernador ze'e lu capitañi nú ri'i uculá beei Pablo, pero zelabeei nú ri'illa lunú niarqui'lla nu la cábeei nú ye'tabi'ya bee bene enu rquiete'lla li'illa. 24Chenu udete chiucu chuna bichia, uriña zeca gobernador Felix cuna una'alla Drusila enu neca bene Israel. Chequie unibiya'lla nú ye'ta Pablo, nu ubene'beella lunú uni Pablo xa chili arqui' bee bene Jesucristo. 25Pero chenu uquixie Pablo nú unilla nú rqui'ña nú huañi bee bene tucu nú rialane, nu la tsana' bee bene nú ri'i elliebacu' nú necha neca ana lubeei, nu nze'ta bichia nú dete' bee bene cuenda lu Diose, chequie chiqui' ulliqui Félix nu unilla lu Pablo: ―Uquia'a. Bixiaca li'ilu stucu bese chenu llu'chaa. 26Pero Félix dimi le'ca nzuquieella nú dete' Pablo yalla para nú la'alla Pablo, enze'e ubixialla Pablo huaxi bese para nú nilla lulla. 27Scua udete chiucu lana, che uchiu'u Félix nú ungalla gobernador nu uyu'u Porcio Festo luhuare'lla. Nu lunú niarqui' Félix nú ya'na nze'calla lubee bene Israel, che néla'alla Pablo.

will be added

X\