Los Hechos 22

1―Yehua bee bene uxu cuna beelá bee bene enu nucua'a ca'a, uzu'cu' diacahua lunú nia luhua equie cuenda' li'á. 2Chenu ubene'beei nú rni Pablo hebreo lubeei, máse ucua'a chibeei, nu unilálla lubeei: 3―Li'á neca bene Israel, nu ungula eyeche Tarso nú nchiñi lu estado Cilicia, pero ca'a Jerusalén ube'ta ru'cua nu ulaxcuela Gamaliel uzete' li'á ye nú xa neca ley' bee benea'ahua enu udetela, nu diquinu' arquia udu'a ana arquia nú sibia'a lu Diose tucu nú le'ca rri'ihua nee. 4Chequie uri'i condraa bee bene enu nzeli arqui' Jesucristo, hasta nú ungutia li'ibeella, sia bee una'a urre sia bee niyu una'tsea beella udu'a beella ni'cu'. 5Ule'ya enu máse neca equie nu rnibiya' lu ye bee ule'ya cuna ye bee usticia' bee bene Israel nediya' beella nú neli nucua'. Xne li'ibeella uliqui' beella tucu ichi' lua para nú ulubea nucua' lubee sa'ahua bee bene Israel enu nucua'a eyeche Damasco para nú cua'na bee bene enu nzeli arqui' Jesucristo eyeche ze'e, nu na'tsea li'ibeella nu nzelayua li'ibeella Jerusalén para nú dete castiya li'ibeella. 6’Pero diqui nú nza'a lu inziu, chenu nze riñala eyeche Damasco, tucu rrebibichia tu'natsia ulaca tucu ellie'e enza liñibe nu udu'llie'e ellie'e ze'e diqui abenchila' elu sea, 7nu uzana'a luyuu. Che ubenea tucu chii enu uni: “Saulo, Saulo, ¿xinu rri'i condralu li'á?” 8Nu unidichia'a: ¿Tilu Detá? “Nu ucuaquinu: Li'á neca Jesuse Nazaret enu rri'i condralu.” 9Bee bene enu nzenua ulañi' beella ellie'e ze'e nu ulliqui beella, pero la ri'ibeella beya' lunú uni chii ze'e lua. 10Chequie unidichia'a: “Detá, ¿xi niarqui'lu nú ri'á?” Nu uni Jesucristo lua: “Uzetee. Nu uquiaa ri'i seidu inziu nú nzalu eyeche Damasco, ze'e nii bene lulu lu ye nú ri'ilu.” 11Nu lunú la bi'ya'a uri'i ellie'e ze'e, chequie bee bene enu nzenua una'tse beella yaa nu nza'aru eyeche Damasco. 12’Ze'e nzucu tucu niyu enu sucu' ye nú rnibiya' ley' Moisés li'illa leella Ananías, nu ye bee bene Israel enu nucua'a eyeche Damasco nu'lu li'illa nú nehuañilla tucu nú neli neca. 13Ananías quie' ube'ta bi'ya li'á, nu chenu uriñalla lua unilla: “Saulo, nee bi'ya zecalu. Hora ze'e ubi'ya zecaa nu ulañia li'illa.” 14Chequie unilla lua: “Diose' bee bene'ahua enu udetela ucañi li'ilu para nú ri'ilu beya' xa niarqui'nu nú ri'ilu, cuna nú lañi'lu Jesucristo nu yene'lu chiinu li'inu enu rri'i tucu nú neli neca. 15Para nú chálu chetixiule'elu stichia'nu lu ye bee bene iliulabe cuna nú ixiule'elu lubeei lunú ulañi'lu cuna lunú ubene'lu. 16Nee la lea'lu. Utsuli nu urinza, una'cu' lu Jesucristo para nú lecaxi naalu lu cuenda' stulalu.” 17’Chenu ubenchila'a ca'a Jerusalén uya'a liñi Indu llene uya'nacua lu Diose, nu ulle'ca xi neca nú uni xcala'a. 18Ulañia Jesucristo nu uninu lua: “Uquiene, yexetsia uchiu'u Jerusalén, xne la ri'i bee bene caso lunú niilu lubeei equie cuenda' li'á.” 19Che unia lunu: “Li'ibeei nediya' beei nú uya'a ye bee liñi indu nu una'tsea ye bee bene enu nzeli arqui' li'ilu, nu udua'a beella ni'cu' nu uzeteche'a li'ibeella. 20Nu chenu unguuti bee bene Esteban enu udixiule'e stichia'lu, ze'e nzua rnia nú neca nze'ca nú atilla, nu hasta nú ubi'yaa xucu bee enu unguuti li'illa.” 21Pero uninu lua: “Uquia, li'á xe'la li'ilu istu hasta lubee bene enu la neca bee bene Israel.” 22Hasta nucua'tsia uzelabeei ubene'beei nu uquixiebeei rixialibeei nú unibeei: ―¡Benequie' la yala nú huañilla! ¡Utihua li'illa! 23Nu lunú chu rixialilábeei utsi'qui beei xucu beei enza yaa, nu le'ca utsi'qui beei yuu be'cha' enza yaa, 24chequie unibiya' comandante ze'e nú du' bee sundado Pablo liñi cuartel, nu unibiya'lla nú zeteche'beei Pablo para nú tsiru'ulla xinu rixiali bee bene contra li'illa scua. 25Pero chenu ullica'cuu beei Pablo para nú zete'che'beei li'illa, unilla lu capitañi enu nzu ze'e: ―¿Xie' nu' modo zete'che'hua tucu bene Roma, sin nú chiu'ulue lunú xi uri'illa la? 26Chenu ubene' capitañi ze'e nucua', che uyatixiule'ella lu comandante ze'e nu unilla lulla: ―Ubi'yacuru xa ri'inulu benecua', xne bene Roma benecua'. 27Chequie uya comandante ze'e elu nzu Pablo, nu unidichia'lla lulla: ―¿Xie' neli nú bene Romalu? Nu ucuaqui Pablo nú unilla: ―Neli nucua'. 28Nu uni comandante ze'e lulla: ―Li'á huaxi dimi udixiua para nú neca bene Roma. Nu ucuaqui Pablo nú unilla: ―Pero li'á desde nú ungula neca bene Roma. 29Chenu ubene' bee sundado enu nze zeteche' Pablo nú necalla bene Roma chu ulluna'beei lulla. Nu hasta comandante ze'e ungabiya' nú neca Pablo bene Roma, nu ulliquilla xne unibiya'lla nú ullica'cuu bee sundado Pablo. 30Stucu bichia niarqui' comandante ze'e nú ri'i nze'calla beya' xinu rri'i condra bee bene Israel Pablo. Nu unibiya'lla nú yete'sa' bee ule'ya enu rnibiya' lubee ule'ya cuna bee usticia, nu uhualla Pablo utsulla ante lu yebeella.

will be added

X\