Los Hechos 21

1Ze'e utsa'naru li'ibeella, nu uyu'uru liñi barco nu nza'alíru enza lee Cos tucu yuu nú netse lu inzatu', nu stucu bichia uriñaru elu lee Rodas lu stucu yuu nú netse lu inzatu', nu ze'e chu nza'aru eyeche nú lee Pátara. 2Nu eyeche ze'e uchu'uru tucu barco nú nza enza Fenicia, nu uyu'uru liñi barco ze'e. 3Chenu nza'aru che enza cue'tseru chubeca ulañi'ru yuu nú lee Chipre nú netse labe inzatu', nu nza'aru enza Siria. Nu lunú rqui'ña nú laca beenú nuya' barco eyeche Tiro. Che uyu'uru eyeche ze'e, 4ze'e uchu'uru bee bene eyeche ze'e enu nzeli arqui' Jesucristo, nu ullua'aru cuna li'ibeella ze'e achi bichia. Nu bee benequie' equie cuenda' Espíritu Santo ungabiya'beella lunú zeca Pablo Jerusalén che unibeella lu Pablo nú la challa ze'e. 5Pero chenu ullu'cu' achi bichia, che uchiu'uru eyeche ze'e. Ye beella cuna bee una'beella cuna bee endu'beella uyatuinza beella li'iru hasta ru'u inzatu' ru'u eyeche ze'e, nu ru'u inzatu' ze'e utsulliquiru nú unacu'ru lu Diose. 6Che uniru lubeella nú nzia'aru nu uyu'uru liñi barco, nu che ubenchila' beella ni'beella. 7Chenu uchiu'uru eyeche Tiro uya'aru Tolemaida, ze'e ulaxu nú seeru barco, le'ca uyaniru lubee bene enu nzeli arqui' Jesucristo eyeche ze'e, nu ullua'aru cuna li'ibeella tucu bichia. 8Stucu bichia, Pablo cuna li'iru enu nellua'anuru li'illa uchiu'uru Tolemaida nu nza'aru eyeche Cesarea, nu uya'aru ni' Felipe enu rixiule'e stichia' Jesucristo. Felipe quie' neca lu achi bene enu uyañi para nú ritsi' beella lunú riala ritsi' beella lubee bene enu seca elitsi, nu uya'naru ni'lla. 9Felipe quie' rlu'culla tacu xinchiu'culla enu lá chia nu neca beenchu profeta' Diose. 10Nu necala huaxi bichia nú nellua'aru ni' Felipe, chenu uriña tucu bene enu lee Agabo ze'e, li'illa le'ca necalla profeta' Diose nu nze'talla enza Judea. 11Chenu uriñalla una'tsella sinchiu' Pablo nu ullica'cuullae cuchiu'lla cuna yalla nu unilla: ―Espíritu Santo unilua nú Jerusalén bee bene Israel singuie llica'cuu beei bene enu neca stene' sinchiu quie' nu dete' cuenda beei li'illa lubee bene enu la neca bee bene Israel. 12Chenu ubene'ru nucua', li'iru cuna bee bene ze'e uziquieru lu Pablo nú la chálla Jerusalén. 13Pero ucuaqui Pablo nú unilla: ―¿Xinu runa'hua nu rri'ihua nú nehuana nzu arquia? Para li'á lecaxi ri'i mase llica'cuu bee bene li'á, nu mase uti bee bene li'á Jerusalén equie cuenda' Jesucristo enu rnibiya'. 14Nu lunú lá ri'iru ana nú la challa, lá ria'ru juerza li'illa unitsiaru lulla: ―Acatsia nucua' tucu nú niarqui' Diose. 15Chenu udete bee bichia ze'e, uquieneru nu chu nza'aru Jerusalén. 16Nu nzenuru chiucu chuna bee bene Cesarea enu nzeli arqui' Jesucristo, li'ibeella unguya' beella li'iru elu uya'naru ni' tucu bene Chipre enu lee Nasón, nu necala huaxi tiembu nú nzeli arqui'lla Jesucristo. 17Nu bee bene Jerusalén enu nzeli arqui' Jesucristo, chiqui' ñia utsu arqui'beella uyucu beella li'iru. 18Stucu bichia uyanuru Pablo uyabi'yaru Jacobo, ze'e nucua'a ye bee bene enu rnibiya' lubee bene' Jesucristo. 19Chenu ulaxu nú uri'iru saludar li'ibeella chu udixiule'e Pablo lubeella lu ye nú uri'illa lubee bene enu la neca bee bene Israel equie poder' Diose. 20Chenu ubene' beella nucua', unibeella bedichia' nze'ca lu Diose. Chequie unibeella lu Pablo: ―Li'ilu nediya'lu nú leta bee bene Israel huaxi beella nzelíla arqui'beella Jesucristo, nu ye beella rni beella nú rqui'ña nú ria'ahua tucu nú rnibiya' ley' Moisés. 21Li'ibeella ubene'beella nú li'ilu sete'lu bee bene Israel enu la nucua'a Israel, nú la ri'i beella caso ley' Moisés, nu rnilu nú la qui'ña quiee seña nú rquiee bee bene Israel bee endu' beella, le'ca la qui'ña nú chequie beella costumbrea'ahua. 22Neequie, ¿xi riala nú aca? Li'ibeella itá yete'sa' beella chenu yene' beella nú uriñalálu. 23Enze'e máse neca nze'ca nú ri'ilu singuie: Nucua'a tacu niyu leta'ahua nu rqui'ña nú tsa'alubeei tucu nú ucuaqui u'na beei lu Diose. 24Uyanubeei nu ri'ihua tucu nú rnibiya' ley para nú lecaxi náhua lu Diose, nu ixiulu para nú recu' equie beei, scua ri'i ye bee bene beya' nú sucu'cálu tucu nú rnibiya' ley nu la neli nú ubene'beella lu cuenda'lu. 25Nu bee bene enu la neca bee bene Israel enu nzelila arqui' Jesucristo, uquie'elaru tucu carta lubeella nú la chenu xe'ta' arqui'beella lu cuenda' ley' Moisés. La qui'ña nú acu beella bee u'na nú rricu' bee bene lunú nzeli arqui'beella nú neca diose, nu la acu beella rene, ni' be'la' bee nañi enu la ti'chia rene chenu rati, nu la ri'i beella eluhuexe. 26Chequie unguya' Pablo dacu bee niyu ze'e, nu bichia rrucu uri'i beella tucu nú rnibiya' ley' Moisés nú ri'i beella para nú lecaxi nábeella lu Diose. Che uyu'u beella liñi Indu llene Jerusalén para nú udixiule'e beella lu ule'ya nú xunga ellu'cu' nú ri'i beella tucu nú rnibiya' ley bichia nú rqui'ña nú uya' cada tucua beella tucu nañi nu atií xi neca u'na lu Diose. 27Chenu nze llu'cula achi bichia nú rqui'ña nú ri'i beella tucu nú rnibiya' ley, chequie chiucu chuna bee bene Israel enu nze'ta enza Asia ulañi' beei Pablo liñi Indu llene Jerusalén nu utsureche beei nu una'tse beei li'illa, 28nu rixiali beei nú unibeei: ―¡Bee bene Israel, uri'ihua elietsa! Benequie' neca enu enzee catse se'ta bee bene Israel cuna indua'ahua cuna nú rni nucua' nú la ri'i bee bene tucu nú rnibiya' ley'ahua, nu la necane nucua'tsia, le'ca udu'la nucua' bene griego liñi indua'ahua nu rri'ila nucua' indua'ahua xi neca tucu luhuare nú la zibi' nu necane tucu luhuare elunecachi. 29Unibeei scua xne lunú ulañi'beei nú enzee Pablo eyeche ze'e cuna tucu bene Efeso enu lee Trófimo, chequie uri'ibeei elliebacu' nú uyanu Pablo benequie' liñi indu ze'e. 30Chequie utsureche ye bee bene eyeche ze'e, nu uriña xu'u beei una'tse beei Pablo, nu uxa' beei li'illa uhua beei li'illa liñi indu ze'e, nu chu utsacu' xu'u beei ru'u puerta indu ze'e. 31Yamero uti beei Pablo, chenu uriña resuna lu comandante enu rnibiya' lubee sundado, uyani'beei nú sureche ye bee bene Jerusalén. 32Che yexetsia uyetesa' bee sundado cuna bee capitañi nu xexu'u beei uya beei elu neyete'sa' bee bene ze'e. Chenu ulañi' beei nú uriñayu comandante ze'e bee sundado, che utsuxe beei nu lá iñia' beei Pablo. 33Chu uyabica comandante ze'e nu una'tsella Pablo, nu unibiya'lla nú uyaca'cuu Pablo cuna chiucu cadena, nu unidichia' comandante ze'e tilla nu xi uri'illa. 34Pero texcua'a bee bene ze'e urene urixialibeei nu texcua'a beei urene rixiali nu lunú rixiali beei scua, lá ri'i comandante ze'e beya' xi rnibeei, che unibiya'lla nú unguya' bee sundado Pablo liñi cuartel. 35Chenu uriña beella lu escalera cuartel ze'e, uricu' bee sundado ze'e Pablo ru'u xcuu beei equie nú chiqui' nelachi bee beneañi ze'e, nu nzequiee beei li'ibeella; 36nu ye bee beneañi ze'e rixiali beei nú unibeei: ―¡Uti nucua'! 37Chenu necala nú nzechu'u beella cuna Pablo liñi cuartel ze'e, unidicha'lla lu comandante ze'e: ―¿Nu' modo nia lulu lle'nala? Nu ucuaqui comandante ze'e ―¿Xie' recalu rnilu griego la? 38¿Xie' laca li'ilu bene Egipto enu uri'i condra gobierno, nu chu unguya'lu tacu mili bee bene'lu enza lu dañi achi, li'ibeei enu unguuti bee bene la? 39Che uni Pablo lu comandante ze'e: ―Li'á neca bene Israel, li'á ungula eyeche Tarso nú nchiñi lu estado Cilicia, tucu eyeche nu neca equie nu lle'na lu iliu ze'e. Uri'i faura uzela nú nia lubee benequie'. 40Chequie uzela comandante ze'e nu utsuli Pablo lu escalera ze'e, nu uri'illa seña cuna yalla lubee bene ze'e nú zaca beei. Nu chenu uzaca beei unilla hebreo lubeei nú unilla:

will be added

X\