Los Hechos 20

1Chenu utsuxe lunú sureche bee bene eyeche Efeso ze'e, ubixia Pablo bee bene enu nzeli arqui' Jesucristo nu udu'lla ana arqui'beella. Che unilla lubeella nú nzalla, nu nzalla enza lu iliu Macedonia. 2Uyalla diqui bee enza ze'e nu chiqui' udu'lla ana arqui' bee bene enu nzeli arqui' Jesucristo cuna stichia'lla, che uriñalla enza lu iliu Grecia, 3elu uzuculla chuna guu. Necala nú chu'ulla liñi barco para nú nzalla enza lu iliu Siria, chenu uri'illa beya' nú nu' nú niarqui' bee bene Israel ri'inu li'illa, che uri'illa elliebacu' nú ubenchila' zecalla enza lu iliu Macedonia. 4Nu unguya'lla tucu bene Berea enu lee Sópater lliana' Pirro, cuna bene enu lee Segundo, nu cuna Aristarco enu neca bee bene eyeche Tesalónica, le'ca unguya'lla Gayo bene Derbe, cuna Tiquico cuna Trófimo bene Asia cuna Timoteo. 5Yebeella uriculu beella nu utsuquie beella Pablo cuna li'á Lucas eyeche Troas. 6Nu li'iru, chenu udete eliñi nú racu bee bene pá nú la ucha levadura, che uchiu'uru eyeche Filipos nu uyu'uru liñi barco nu lu ayu' bichia uriñaru eyeche Troas elu nucua'a beella, nu ze'e ullua'aru achi bichia. 7Chenu uriña bichia rlu liñi tucu xmana uyetesa'ru para nú da'cu junturu pá tucu nú utsa'na Jesucristo, nu lunú uri'i Pablo elliebacu' nú chiu'ulla bichia rrucu, chenu uriña ulela' rula' lá laxusca' nú sete'lla bee bene. 8Nu equie ni'i elu ayaa nellua'aru, nu rulu huaxi bee quii liñi ni'i ze'e; 9che tucu niyu e'ne' enu lee Eutico nzucui ru'u ventana. Nu lunú chiqui' xee uzete' Pablo beella, che chiqui' uyu'u cala' lu niyu e'ne' ze'e, nu uri'i cala' ana lui nu uzana'i desde piso rriuna hasta luyuu nu ungutilai chenu uletsa beella li'i. 10Chequie ulaca Pablo elu nuxui, nu utsulliquilla uchi'chilla li'i, nu unilla lubee bene ze'e: ―La lliquihua, nehuañii. 11Che chu uquie zeca Pablo equie ni'i ze'e, nu ule'ella pá udacu beella, nu unilálla lubeella hasta nú uye'e lu yuu, chenu uye'e luyuu chu nzalla. 12Nu niyu e'ne' enu uzana' ze'e, nehuañii nzeyu beella li'i ni'i, nu chiqui' ñia nzu arqui'beella. 13Che uyu'uru liñi barco nu uricu'luru nú nza'aru eyeche Asón elu utsa'naru bedichia' lu Pablo nú lla'caru li'illa, xne uri'illa elliebacu' nú tsee e'yalla nzalla ze'e. 14Chenu ulla'caru Pablo eyeche Asón, che uyu'ulla liñi barco cuna li'iru, nu nza'aru lu eyeche nú lee Mitilene. 15Che uchiu'uru eyeche Mitilene, nu bichia rrucu udete'ru enza lee Quío, nu stucu bichia uriñaru elu lee Samos. Nu stucu bichia uriñaru Mileto, pero ante nú riñaru ze'e, utsuxeru elu lee Trogilio. 16Uri'i Pablo elliebacu' nú la challa eyeche Efeso, nu le'ca niarqui'lla nú la le'lla enza Asia, xne lunú niarqui'lla nú chu riñalla Jerusalén tunu nu' beya' nú riñalla ze'e bichia liñi pentecostés. 17Chenu nellua'aru eyeche Mileto, unibiya' Pablo nú ye'ta bee bene enu rnibiya' lubee bene enu nzeli arqui' Jesucristo eyeche Efeso, 18chenu uriña beella ze'e uni Pablo lubeella: ―Desde bichia rluu nú uriñaa ca'a Asia nu hasta nee li'ihua nediya' nze'ca'hua lunú rri'á. 19Ye bee bichia nú nzua cuna li'ihua sibi'a lu Jesucristo cuna nú nzuquie arquia, nu hasta runa nú huaxi beenú nehuana se'ca lunú niarqui' bee bene Israel ri'inu li'á. 20Pero añinzuca nú scua necane, ne tsana arquia unia luhua lunú neca nze'ca para li'ihua ante lu ye bee bene urre ni'hua uzetea li'ihua. 21Nu sia lubee bene Israel cuna lubee bene enu la neca bee bene Israel, unila lubeella nú che'e arqui'beella lu stula beella nu benchila' arqui'beella lu Diose, nu chili arqui'beella Jesucristo enu rnibiya'. 22Nee nú nza'a Jerusalén elu uxe'la Espíritu Santo li'á, la ri'á beya' xi nzu nú zeca ze'e. 23Lunú nediyatsia nú lu ye bee eyeche elu nza'a rni Espíritu Santo lua nú huaxi beenú nehuana zeca cuna nú cha'a ni'cu'. 24Pero la chenuarquia nucua' mase atia, pero ñia nzu arquia rri'á lunú riala ri'á hasta elu zelae, nu ri'á lunú uliqui' Jesucristo enu rnibiya', nu ixiule'a bedichia' nze'canu cuna nú xa neca eluseca' Diose. 25’Nu nee nediyaa nú ni' tucuhua enu udixiule'a xa neca lunú rnibiya' Diose lu, la lañia'hua li'á. 26Enze'e nia luhua nee, nú la neca' nucua' cuenda' li'á tunu la huañihua tucu nú neli neca, 27xne li'á udixiule'a luhua ye lunú xa neca Stichia' Diose, nu lecaxi utsacu arquia luhua. 28Ubi'yahua li'ihua, nu ubi'yahua bee bene enu nzeli arqui' Jesucristo, li'ibeella enu uliqui' Espíritu Santo luhua para nú bi'yahua li'ibeella xi neca bene enu rriucu bee sanchi, xne Jesucristo udixiulanu cuna rene'nu equie cuenda'ahua chenu ungutinu lu cruse. 29Li'á nediyaa nú chenu nzia'a, nze'ta stucu bene ti'chialetse bee nze'e bee bene enu nzeli arqui' Jesucristo, tucu nú rti'chialetse bee bichiuu bee sanchi. 30Nu le'ca letahua chiu'u bee bene enu zete' puro bee eluquichia' para nú ri'ibeei ana bee bene' Jesucristo, nu ri'ibeella caso stichia' beei luhuare nú ri'ibeella caso Stichia' Diose. 31Enze'e ucua'atsiñahua ubi'yahua li'ihua. Ullu'cu' arqui'hua nú diqui chuna lana, bichia si rula' né tsana arquia unia luhua hasta unguna unia bezete' luhua. 32’Nee bee sa'a enu nzeli arquia'ahua Jesucristo, ya Diose tsa'na li'ihua cuna bedichia' nze'ca'nu, nú rlu'cu poder para nú ri'i elietsa luhua nú nze chululáhua nú xa riala nú huañihua, nu liqui'nu luhua ye nú uninu nú dete'nu lubee bene enu neca bee bene'nu. 33Lecaxi unacua luhua ni' dimi nu ni' laquie. 34Li'ihua nediya' nze'ca'hua nú cuna yaa uri'á riña' para nú udacunua bee bene enu uya nzenu li'á. 35Ulubelá luhua nú scua rqui'ña ri'i bee bene riña' para nú ri'ibeella elietsa lubee bene enu seca elitsi, ullu'cu' arqui'hua stichia' Jesucristo enu rnibiya' chenu uninu: “Máse ñia nzu arqui' bene enu lia rdete' nú rdete' luquela bene enu riucue.” 36Chenu ulaxu nú uni Pablo scua, chequie utsulliquilla nu unacu'lla lu Diose cuna li'ibeella. 37Che yebeella unguna'beella nu uchi'chi beella Pablo nu udacu beella bichiu' xecalla. 38Nu chiqui' nehuana utsu arqui'beella lunú uni Pablo lubeella nú la lañia' beella li'illa. Nu chu uyayu beella li'illa hasta elu nzu barco.

will be added

X\