Los Hechos 2

1Chenu uriña bichia liñi nú lee Pentecostés, uyetesa' ye bee bene enu nzeli arqui' Jesuse tucutsia luhuare. 2Nu tu'natsia ubene nú rula enza liñibe xi rula chenu enta tucu bi juerte, nu ubene nú rula diquineca liñi ni'i elu nucua'a beella. 3Chequie ulube'lu beenú rnaa xi rnaa quii me'e nú rulu, nu ulacae equie cada tucua beella. 4Nu yebeella chiqui' uyucu arqui'beella Espíritu Santo, nu uquixie nú unibeella stucu bee dialu rene, tucu nú niarqui' Espíritu Santo nú ni beella. 5Bee bichia ze'e uriña bee bene Israel eyeche Jerusalén para nú dete' beella ula'na lu Diose, nu nze'ta beella diqui bee luhuare lu iliulabe. 6Chenu ubene'beella nú rula, uyetesa'beella para nú nze bi'ya beella xi nú rula scua, nu hasta la ri'ibeella beya' xi elliebacu' ri'ibeella, xne cada tucua beella ubene' beella nú rni bee bene' Jesuse dialu' cada tucua beella. 7Chiqui' nzenu arqui'beella hasta nú lá ri'ibeella beya' xa ni beella, nu uquixie beella nú unibeella lusa'beella: ―¿Xie' la neca ye bee bene enu rni cua' bee bene Galilea la? 8¿Xiquie nú riene'ahua nú rnibeella dialu' cada tucua'ahua? 9Ca'a leta'ahua nucua'a bee bene eyeche iliu Partia, cuna bee bene enu nze'ta lu iliu Media, cuna bee bene enu nze'ta lu iliu Elam, cuna bee bene enu nze'ta lu iliu Mesopotamia, cuna bee bene lu iliu Judea, cuna bee bene lu iliu Capadocia, cuna bee bene lu iliu Ponto, cuna bee bene Asia, 10cuna bee bene Frigia, cuna bee bene Panfilia, cuna bee bene Egipto, cuna bee bene lu iliu Africa, axu Cirene. Nu cuna bee bene Roma, chiucu chuna bee bene Roma quie' ungula lu iliu Israel nu nucua'a beei Roma. Le'ca chiucu chuna beei neca mero bene Roma enu nzeli arqui' tucu nú nzeli arqui' bee bene Israel Diose. 11Le'ca ca'a leta'ahua nucua'a bee bene lu iliu Creta cuna bee bene Arabia, pero ye'ahua riene'ahua bee milagro nú rri'i Diose xne rni bee bene cua' dialu' cada tucua'ahua. 12Chiqui' nzenu arqui' ye beei nu la ri'ibeei beya' xi elliebacu' ri'ibeei, nu uquixiebeei nú rnidichia' beei lu sa'beei: ―¿Xi nucua' nú reca ca'a scua? 13Pero nu' beei enu utsequichia' li'ibeella nú unibeei: ―¡Xuchi' bee bene cua'! 14Chequie utsuli Pedro cuna se chetu'cu bee apóstol nu juerte unilla: ―Bee bene Judea cuna ye bee bene enu nucua'a ca'a Jerusalén, uzu'cu' diacahua nu uri'ihua beya' nú nia luhua. 15La lluchi' bee bene quie' tucu nú rri'ihua elliebacu', xne apena neca rquiquie' sila' nee. 16Lunú reca ca'a, neca tucu nú uni profeta Joel chenu unilla: 17Uni Diose, riña bichia chenu xe'la Espíritu Santoa para nú llutsene arqui' ye bee bene; Nu bee lliana'hua cuna bee xinchiu'cuhua ixiule'e beei stichia'a, nu bee endu'hua huaxi beenú enta lube'lu lubeei, le'ca esquie bee bene uxu huaxi beenú ni xcala' beella. 18Bee bichia ze'e xe'la Espíritu Santoa lubee niyu cuna lubee una'a enu sibi' lua, che ixiule'e beella stichia'a lubee bene. 19Lubea luhua nú lañi'hua huaxi bee seña liñibe nu chiqui' chenu arqui'hua, nu lu yuu lubea luhua bee seña: Nu lañi'hua nú na xi na rene, cuna quii cuna llene nu na xi na xcabe. 20Che cabe lu bichia, nu aca nelu guu xi nelu rene, ante nú riña bichia llene nú ñia neca, chenu riña li'inu, enu rnibiya'. 21Nu tatse bee bene enu nacu' lu Diose, tsila'anu nze'e lu dula. 22’Nee nia luhua bee bene Israel, uzu'cu' diacahua, nú li'ihua nediya' nze'ca'hua nú Jesuse bene eyeche Nazaret, li'inu enu uxe'la Diose uri'inu bee milagro luhua nu cuna bee seña nú chiqui' uyanu arqui'hua para nú ri'i nze'cahua beya' nú Diose uxe'la li'inu. 23Hasta hua'tu utsula Diose nú xa zeca Jesuse, li'ihua una'tsehua li'inu nu udete' cuendahua li'inu lubee bene enu necha rri'i para nú ungutinu lu cruse. 24Pero uri'i Diose nú uhuañi zeca Jesuse lu eluti, nu utsila'a Diose li'inu lu eluti, xne másela reca Jesuse luquela eluti. 25Nu chenu uni arre David bedichia' equie cuenda' Jesuse, unilla: Siempre ulañia nú nzu Diose Pa liñibe cuna li'á. Nu nzunu cue'tsea chubee para nú lecaxi lliquia. 26Enze'e chiqui' ñia nzu arquia rnia bedichia' nze'ca lu Diose. Mase nú atia la chenuarquia, 27xne la tsana'lu nú ya'na cuerpoa liñi eluhua, nu le'ca la tsana'lu nú uchu cuerpo' Lli'ñilu enu la lu'cu dula. 28Ulube'lu lua inziu nú rliqui' nú nehuañia nu chiqui' ñia tsu arquia huañia cuna li'ilu. 29’Bee sa'a, nia luhua nú arre David ungutilalla nu uhuachi'lalla, nu eluhua'lla rlañi'scahua hasta nee. 30Pero arre David ungalla tucu profeta' Diose, nu nediya'la'lla nú ucuaqui u'na Diose nú leta bee bene'lla enu nze'ta enza luquiela ala Cristo enu nibiya'. 31Scua unga, chenu uhuañi David neca xi neca nú rlañi'lá'lla nú xi enta aca, nu unilla nú huañi zeca Cristo lu eluti nu la ya'na cuerpo'nu liñi eluhua, nu le'ca esquie la uchu cuerpo'nu. 32Nu nee uri'ila Diose nú uhuañi zeca Jesuse lu eluti, yeru ulañi'la'ru nú ungae scua. 33Nu nee nzucula Jesuse liñibe cue'tse Diose chúbe, nu udete'la Diose Espíritu Santo lunu tucu nú ucuaqui u'na Diose hasta hua'tu, nu uxe'la Jesuse Espíritu Santo quie' lu iliulabe nu equie cuenda' Espíritu Santo reca lunú riene'ahua nu rlañi'ahua. 34La neca David enu uquie liñibe, xne li'illa unilla: Diose Pa liñibe uni lu li'inu enu rnibiya' lua: “Uzucu cue'tsea chube, 35hasta nú riña bichia nú ri'á nú nibiya'lu lu ye bee bene enu rle lulu.” 36’Enze'e yehua bee bene Israel, uri'ihua beya' nú Jesuse enu uquie'ehua lu cruse, uri'i Diose nú necanu Cristo enu rnibiya' lua'ahua. 37Chenu ubene' bee bene cua' nú uni Pedro scua, nehuana utsu arqui'beella, chequie unidichia' beella lu Pedro cuna lubeelá bee apóstol' Jesucristo nú unibeella: ―Uni'hua, ¿xi rqui'ña nú ri'iru che? 38Nu ucuaqui Pedro lubeella: ―Utsana' arqui'hua stulahua, nu urinza cada tucuahua lu nú lee Jesucristo para nú ri'i Diose perdona stulahua, nu scua liqui'nu Espíritu Santo luhua. 39Xne nucua' ucuaqui u'na Diose, nu neca nucua' para li'ihua, nu necane para lu ye bee lli'ñihua nu para lu ye bee bene enu nucua'a istu, nu le'ca necane para lu ye bee bene enu ucañi Diose Pa liñibe para li'inu. 40Scua uni Pedro lubeella, nu unilla bee bezete' lubeella cuna beelá bee bedichia' nú unilla: ―¡Uchiu'uchuhua leta bee bene enu rri'i nú necha neca! 41Chequie bee bene enu uzucu' stichia' Pedro urinza beella, nu bichia ze'e uyalí arqui' tucu chuna mili bee bene Jesucristo. 42Yebeella utsuta' arqui'beella lunú uzete' bee apóstol' Jesucristo li'ibeella, nu uhuañinze'ca beella, nu unga tucu necatse beella nu rnacu' beella lu Diose, nu uyetesa'beella para nú udacu junto beella pá tucu nú unibiya' Jesucristo nú ri'i beella. 43Ye bee bene chiqui' uyanu arqui'beella, lu huaxi bee milagro cuna lubeela beenú uri'i bee apóstol. 44Ye bee bene enu uyalí arqui' Jesucristo neca tucu necatse beella nu uditsi' beella stene' beella lu sa'beella, 45nu ungüiti beella bee yu' beella cuna ye beenú rlu'cu beella, nu uditsi' beella dimi cua' lu sa'beella lunú xi seca la'cha' cada tucua beella. 46Ye bichia riete' sa'beella liñi Indu llene Jerusalén, nu cheelá nzuebeella ni'bee sa'beella enu nzeli arqui' Jesucristo nze tacu beella eta nu ñia nzu arqui'beella lu sa' beella cuna nú seca sa'beella. 47Unibeella bedichia' nze'ca lu Diose, nu uyu' arqui' ye bee bene eyeche ze'e lunú xneca nehuañi beella, ye bichia uri'i Diose elietsa nú rdalalá bee bene enu uchili arqui' li'inu nu uri'inu perdona stula beella, nu uyete' bee bene quie' cuna beelá bene' Jesucristo.

will be added

X\