Los Hechos 19

1Diquila nú nzucu Apolos eyeche Corinto, uya Pablo enza lubee eyeche lu dañi Asia nu uriñalla eyeche Efeso, elu nucua'a texcua'a bee bene enu nzeli arqui' Jesucristo. 2Nu unidichia' Pablo lubeella: ―¿Uyucu arqui'hua Espíritu Santo chenu uyalí arqui'hua Jesucristo la? Nu ucuaqui beella nú unibeella: ―Ni' lasca' yene'ru nú nu' Espíritu Santo. 3Nu uni Pablo lubeella: ―¿Xa urinzahua che? Nu ucuaqui beella nú unibeella: ―Urinzatsiaru tucu nú uzete' Juan Bautista bee bene. 4Chequie uni Pablo lubeella: ―Nelí nú Juan urinza bee bene, li'ibeella enu utsana' arqui' stula, pero unilla lubeella nú rqui'ña nú chili arqui'beella enu nze'ta lulá Juan, nu li'inu necanu Cristo. 5Chenu ubene'beella nucua', che urinza beella equie nú lee Jesuse enu rnibiya', 6nu chenu uricu' Pablo yalla equie beella, uyucu arqui'beella Espíritu Santo, nu uquiexie beella nú unibeella stucu dialu rene, che unibeella Stichia' Diose lubee bene. 7Lu yebeella neca tucu chi'chiucu bee niyu. 8Diqui chuna guu uya Pablo liñi indu' bee bene Israel enu nucua'a ze'e, nu sin nú lliquilla udixiule'ella Stichia' Diose lubeella, unilla lubeella nu ucua'nalla xa ri'illa ana nú chili arqui'beella xa neca elurnibiya' Diose. 9Pero chiucu chuna beei unga nziti arqui' nu lá niarqui'beei nú achili arqui'beei stichia' Jesucristo, a'la uquixiebeei nú uni condra beei stichia'nu ante lu ye bee bene. Che uchiu'uchu Pablo lubeei cuna bee bene enu nzeli arqui' Jesucristo, nu unguya'lla li'ibeella xcuela' tucu bene enu lee Tirano, ze'e uzete'lla li'ibeella yeye'e, 10scua uri'illa diqui chiucu lana. Nu ye bee bene enu nucua'a lu iliu Asia nu sia bee bene Israel cuna bee bene enu la neca bee bene Israel ubene'beella stichia' Jesucristo. 11Nu equie nú rnibiya' Diose uri'i Pablo bee milagro nú llene, 12hasta bee panitu' Pablo cuna bee laquie nú rquiee lulla ruya' bee bene nucua' lubee bene enu riti, nu scua rieca' beella lu elichia nú secabeella, nu xiu'u bee benechiqui' enu nchiñi arqui'beella. 13Chequie nu' chiucu chuna bee bene Israel enu enzeehua bee benechiqui' arqui' bee bene, nu niarqui'beei nú cuna nú lee Jesucristo huabeei bee benechiqui' cua' arqui' bee bene, che unibeei lubee benechiqui' ze'e: ―Equie nú lee Jesuse enu rixiule'e Pablo nibiya'a nú chiu'uhua arqui' bee benequie'. 14Nucua' neca nú uri'i achi lliana' tucu bene enu lee Esceva, enu unga tucu ule'ya enu rnibiya' lubee ule'ya. 15Pero tucu bese ucuaqui tucu bee benechiqui' ze'e lubeei nú uni: ―Nu'lua Jesuse, nu le'ca nediyaa ti neca Pablo, pero li'ihua la ri'á beya' tihua. 16Chequie bene enu nchiñi benechiqui' ze'e arqui' uquixiei nú uzete'che'i li'ibeei nu uri'i ana lubeei cuna juerza nú rlu'cui, chiqui' necha udiñii li'ibeei, nu e'cu etubeei uchiu'uxu'ubeei liñi ni'i ze'e uyecaxu'ubeei nu nedi'qui beei. 17Ye bee bene enu nucua'a eyeche Efeso, sia bee bene Israel cuna bee bene enu la neca bee bene Israel, ungabiya' beella nú ungae scua. Chequie chiqui' ulliqui beella nu uni nze'ca beella lu cuenda' Jesuse. 18Nu huaxi bee bene enu uyalí arqui' Jesucristo uriña beei nu utsiru'u beei ante lu ye bee bene lu ye beenú necha neca uri'ibeei. 19Le'ca huaxi bee bene enu uri'i bee elu uliñi uriñayu beei ichi' elu uliñi nu utsiqui' beei ichi' cua' lu quii ante lu ye bee bene. Chenu uhuabeei cuenda nú calu seca bee ichi' ze'e, nu uyalu nú seca bee ichi' ze'e tucu cincuenta mil melu plata. 20Scua unga nú chu nze ri'chia letselá stichia' Jesucristo cuna nú ungachee lunú neca poder'nu. 21Chenu ulaxu nú unga bee nucua', udu' arqui' Pablo nú challa lu iliu Macedonia cuna lu iliu Acaya, cuna nú nze ri'illa seidu biaji'lla hasta eyeche Jerusalén. Le'ca unilla nú chenu uyalalla eyeche Jerusalén che le'ca challa Roma. 22Nu uxe'lalla chiucu bee bene enu rri'i elietsa lulla, Timoteo cuna Erasto para nú nzuebeella lu iliu Macedonia diqui nú ria'nalla xiucu xuna bichia lu iliu Asia. 23Bee bichia ze'e utsureche bee bene eyeche Efeso equie nú rri'i condra beei stichia' Jesucristo. 24Xne Demetrio tucu bene enu rreche'e beenú necache' plata, li'i enu rreche'e bee indume' diose enu lee Diana, li'i nediya'i nú equie bee nucua' rri'i ana huaxi dimi cuna bee bene enu rri'i sa' riña' nú rri'i. 25Chequie uquiete' sa'i bee benecua', cuna beelá bee bene enu rri'i sa' riña' nú rri'i, nu uni lubeella: ―Uzu'cu' diacahua, li'ihua nediya'hua nú lu riña' quie' rria'ahua ana huaxi dimi, 26pero nee rlañi'ahua nu riene'ahua nú enzee Pablo rnilla nú bee diose enu rreche'e bee bene la neca bee nucua' diose. Nu scua rri'illa ana nú nzeli arqui' huaxi bee bene lunú rnilla, nu lacane eyeche quie'tsia, sino que casi diqui lubee eyeche Asia nzeli arqui' bee bene scua. 27Nu scua nelliqui nú laxu riña' nú rria'ahua, nu lacane equie riña' nú rri'itsia'ahua, le'ca la detea' bee bene nú neca equie indu' diose Diana. Nu scua la ria' bee bene caso diose Diana enu rlu'cu ye bee bene ula'na lu lu iliu Asia cuna ye bee bene iliulabe. 28Chenu ubene' bee bene ze'e nucua', chiqui' ulee beei nu rixiali beei nú unibeei: ―¡Chiqui' neca equie Diana diose'ahua lia'ahua enu neca bee bene efesio! 29Che utsureche bee bene eyeche ze'e, nu una'tse beei Gayo cuna Aristarco, rucu bee niyu quie' neca bene eyeche Macedonia enu enzenu Pablo, nu uxa'beei li'ibeella nu unguya'beei li'ibeella elu rietesa' bee bene eyeche ze'e, elu rri'ibeei junta'beei. 30Niarqui' Pablo nú nze chu'ulla ze'e para nú nilla lubee bene, pero bee sa'lla enu nzeli arqui' Jesucristo né zela beella nú ari'illa scua. 31Nu le'ca leta bee usticia Asia, nu' chiucu chuna bee bene enu rquiete' Pablo, li'ibeella enu uxe'la resuna lulla nú máse neca nze'ca nú la chu'ulla ze'e. 32Texcua'a bee bene ze'e urixialibeei nu urene urene unibeei, nu texcua'a beei urixiali nu urene unibeei nu utsureche beei nu huaxi beei ni' la ri'i beei beya' xinu uyete' sa'beei ze'e. 33Leta bee beneañi ze'e uhua bee bene Israel tucu bee sa'beella enu lee Alejandro para nú nilla lubee bene ze'e. Nu uri'i Alejandro seña cuna yalla lubee bene ze'e nú zaca beei para nú nilla lu cuenda' bee bene Israel lubee bene eyeche ze'e. 34Pero chenu uri'ibeei beya' nú necalla bene Israel, tucu chiucu hora junto urixialibeei nú unibeei: ―¡Chiqui' neca equie Diana diose'ahua lia'ahua enu neca bee bene efesio! 35Chequie chenu uri'i secretario eyeche ze'e ana nú uzaca bee bene, che unilla: ―Bee bene Efeso, ye bee bene iliulabe nediya' nú eyeche quie' siempre rriucu bee bene indu' diose Diana, nu le'ca rlu'cu bee bene ula'na lu diose Diana enu ulaca liñibe. 36Li'ihua nediya'hua nú neli nucua'. Enze'e la qui'ña nú ri'ihua scua, la ri'ihua beenú rri'ihua sin nú ri'ihua elliebacu'. 37Xne bee bene enu uriñayuhua ca'a, lá ri'ibeella nú necha neca lu indua'ahua, nu la ni beella bedichia' nú necha neca lu diose'ahua. 38Tunu Demetrio cuna bee bene enu rri'inui riña' rlee beei lu stucu bene, lu' nzucu nilabe nu ze'e nucua'a bee usticia, chexana bitsi beei lubeella. 39Pero tunu nu'lá bee nú niarqui'hua nú xana bitsihua, chenu aca tucu junta' bee bene eyeche che tsuxcua'a bee nucua'. 40Nu nee lunú ungae scua nu' beya' nú ni gobierno nú lia'ahua rdua'ahua arqui' bee bene nú sureche beei scua, ¿nu xi cuaquia'ahua lubeella tunu nedichia' beella lua'ahua equie nú sureche bee bene scua? 41Chenu ulaxu nú unilla scua lubee bene che chu nziue ye beei.

will be added

X\