Los Hechos 18

1Lu ze'ela uchiu'u Pablo eyeche Atenas nu nzalla eyeche Corinto. 2Ze'e ulla'calla tucu bene Israel enu lee Aquila, lachi bene quie' lee Ponto. Aquila quie' cuna una'lla Priscila apenatsia uriña beella nú nze'ta beella enza Italia, xne unibiya' arre Claudio nú uchiu'u ye bee bene Israel Roma. Che uyabi'ya Pablo li'ibeella, 3nu lunú le'ca riña' nú rri'ibeella rri'i Pablo, nú rreche'e beella carpa iti, che uya'nalla cuna li'ibeella para nú ri'i junto beella riña' cua'. 4Cada bichia nú sulachi bee bene Israel nza Pablo rixiule'ella Stichia' Diose liñi indu' bee bene Israel, sia lubee bene Israel urre lubee bene enu la neca bee bene Israel, rcua'na Pablo xa ri'illa ana nú chili arqui'beei lunú rnilla. 5Chenu uriña Silas cuna Timoteo eyeche Corinto nú nze'ta beella enza lu iliu Macedonia lá ria' Pablo stucu riña' rene udixiule'etsialla Stichia' Diose lubee bene, nu udixiule'ella lubee bene Israel nú neca Jesuse Cristo. 6Pero uquixiebeei nú uleebeei lu Pablo nu unibeei bedichia' nú necha neca lulla, nu chequie uri'quilla xuculla xi neca seña nú la zucu'beei nú rnilla, nu unilla lubeei: ―Li'i e'cuhua rri'ihua nú nitiluhua lu Diose la neca nucua' cuenda. Desde nee nza'a lubee bene enu la neca bee bene Israel nzetixiule'a Stichia' Diose lubeei. 7Che uchiu'ulla liñi indu ze'e nu nzalla ni' tucu bene enu lee Ticio Justo, benequie' rlu'culla ula'na lu Diose nu axu nzucu ni'lla ru'u indu ze'e. 8Nu Crispo lee tucu bene enu rnibiya' liñi indu' bee bene Israel, li'illa cuna ye bee bene'lla uchili arqui'beella Jesucristo. Le'ca huaxi bee bene eyeche Corinto uchili arqui'beella Jesucristo chenu ubene'beella stichia'nu nu urinza beella. 9Tucu rula' neca xi neca nú uni xcala' Pablo nu uni Diose lulla: ―La lliquilu uquia tixiule'elá stichia'a lubee bene nu la tsuxeelu, 10li'á nzua cuna li'ilu para nú lecati xi ri'inu li'ilu, xne eyeche quie' nucua'a huaxi bee bene enu aca bee benea. 11Enze'e uya'na Pablo eyeche Corinto tucu lana arula', uzete'lla bee bene ze'e Stichia' Diose. 12Pero chenu unga Galión gobernador lu iliu Acaya, unga tucu necatse bee bene Israel nu una'tse beei Pablo, nu unguya'beei li'illa lu gobernador ze'e. 13Nu unibeei lulla: ―Benequie' rcua'nalla xa ri'illa ana bee bene para nú lu'cu beella ula'na lu Diose stucu forma lunú la nibiya' ley'ahua. 14Nze nila Pablo, chenu ucuaqui Galión lubee bene Israel ze'e, nu unilla: ―Tunu necane nú uri'illa tucu equiya, urre uri'illa tucu nú necha neca enze'e nze'ta yuhualla lua, che ri'i casoa lunú rnihua. 15Pero necatsia nucua' equie cuenda' bee bedichia' cuna equie cuenda' nú lee bee bene, nu cuna equie cuenda' ley'hua, li'itsiahua bi'yahua xa aca nucua', xne la niarquia aca enu hualu nucua'. 16Nu chu uhualla bee bene ze'e elu rlualullae lu cuenda' bee bene. 17Chequie chu una'tse bee bene griego ze'e tucu bene enu lee Sóstenes, enu rnibiya' liñi indu' bee bene Israel nu uzete'che' beei li'illa. Pero ni'teme' la ri'i caso gobernador ze'e li'ibeei. 18Uya'nasca'lá Pablo eyeche Corinto huaxi bichia. Cheela unilla lubee sa'lla enu nzeli arqui' Jesucristo nú nzialla nu nzalla cuna Aquila cuna Priscila, nu uyu'u beella liñi barco nu nzuebeella enza Siria, pero ante nú chiu'u beella eyeche Cencrea urecu' ichia equie Pablo para nú utsa'alulla tucu nú ucuaqui u'nalla lu Diose nú uri'illa. 19Chenu uriña beella eyeche Efeso, ze'e utsa'na Pablo Aquila cuna Priscila, pero uyalla liñi indu' bee bene Israel enu nucua'a ze'e, uyani'lla lubee bene Israel enu riete'sa' liñi indu ze'e. 20Chequie uziquiee beella lu Pablo nú ya'nalálla cuna li'ibeella ze'e xiucu xuna bichia, pero lá zelalla, 21nu unilla lubeella: ―Nzia'la nee, xne eyeche Jerusalén rqui'ña nú detea eliñi nú nze'ta. Tunu zela Diose nzelabi'ya zeca li'ihua stucu bese. Che uyu'ulla liñi barco nu uchiu'ulla eyeche Efeso. 22Chenu uriña Pablo eyeche Cesarea, che uyalla Jerusalén uyabi'yalla bee bene' Jesucristo, nu chu nzalla enza eyeche Antioquía. 23Chenu ungala xee nú nzuculla eyeche Antioquía, uyalla cada tucua bee eyeche nú nchiucu' lu iliu Galacia cuna lu iliu Frigia, rdu'lla ana arqui' ye bee bene' Jesucristo. 24Tiembu ze'e uriña tucu bene Israel eyeche Efeso nu li'illa leella Apolos, nu lachilla neca Alejandría. Benequie' chiqui' recalla rnilla, nu le'ca chiqui' recalla Stichia' Diose. 25Unga nze'calla Stichia' Diose, chequie chiqui' nu' ana arqui'lla uzete'lla stichia' Jesuse lubee bene, nu neli unilla stichia'nu lubeella, añinzuca nú nediya'tsialla elu rrinza nú uzete' Juan Bautista bee bene. 26Apolos quie' sin nú lliquilla uquixiella nú udixiule'ella Stichia' Diose lubee bene Israel liñi indu'beei, nu chenu ubene' Priscila cuna Aquila lunú rnilla, che unguya'beella li'illa ni'beella, nu ze'e uzete'lá bee benequie' li'illa para nú ungalallá Stichia' Diose. 27Chenu uri'i Apolos elliebacu' nú chálla lu iliu Acaya, ye bee bene' Jesucristo enu nucua'a ze'e udu' beella ana arqui'lla para nú challa ze'e, nu uquie'e beella tucu carta lubee bene' Jesucristo enu nucua'a lu iliu acaya para nú yucu nze'ca beella li'illa chenu riñalla lu iliu ze'e. Nu chenu uriña Apolos lu iliu Acaya chiqui' uri'illa elietsa lubee bene enu nzeli arqui' Jesucristo enu nucua'a ze'e, li'ibeella enu uyalí arqui' Jesucristo cuna elietsa' Diose. 28Xne lu ye bee bene unilla nú la cha nze'ca bee bene Israel, nu lecati unga ucuaqui lulla, xne ye nú rnilla neli necane, li'illa rlube'lla tucu nú nequie lu ichi' Stichia' Diose lubee bene, ye bee luhuare elu rni: “Nú Jesuse neca Cristo.”

will be added

X\