Los Hechos 17

1Chenu nza Pablo cuna Silas, udete beella enza eyeche Anfípolis cuna enza eyeche Apolonia nu uriñabeella eyeche Tesalónica, elu nzucu tucu indu' bee bene Israel. 2Tucu nú neca costumbre' Pablo, uyalla liñi indu ze'e chuna bichia nú sulachi beella, unilla Stichia' Diose lubeella. 3Udixiule'ella nu ulube'lla lu ichi' Stichia' Diose lubeella elu rni nú rqui'ña nú nehuana zeca Jesucristo, nu chenu atinu huañi zecanu unilla lubeella: ―Le'ca li'i Jesuse enu rnia luhua nee, li'inu necanu Cristo. 4Chequie chiucu chuna bee bene Israel ze'e uyalí arqui' lunú uni Pablo, nu uyetesa'beella cuna li'illa cuna Silas, le'ca huaxi bee bene griego enu rlu'cu ula'na lu Diose cuna huaxi bee una'a enu chiqui' neca equie uyalí arqui'beella Jesuse. 5Pero bee bene Israel enu la chili arqui' Jesucristo, uye arqui'beei nu uquiete'sa'beei bee bene enu enzee labe inziu, nu bee bene ze'e uquiete'sa'beei beelá bee bene para nú tsureche beei bee bene. Nu uyu'u beei liñi ni' Jasón rla'na beei Pablo cuna Silas para nú huabeei li'ibeella nu tsu beei li'ibeella ante lu ye bee bene eyeche ze'e. 6Pero lunú néllela' beei li'ibeella ze'e, che uxa'beei Jasón cuna xiucu xuna bee bene enu nzeli arqui' Jesucristo, nu uyayu beei li'ibeella lubee usticia, nu urixialibeei nú unibeei: ―Bee niyu enu rri'i nú rliu casi ye bee bene iliulabe uriñabeella ca'a, 7nu ni' Jasón nucua'a beella. Li'ibeella cuna ye bee bene enu nzeli arqui' lunú rnibeella, la ri'i beella tucu nú rnibiya' ley' arre César. Xne rnibeella nú nu' stucu arre enu lee Jesús. 8Chenu ubene' bee usticia cuna bee bene nucua', yelu elliebacu' uri'i beella. 9Pero Jasón cuna beelá bee bene enu una'tse beei, chenu udixiu beella che ula'a bee usticia li'ibeella ni'cu'. 10Le'ca rula' ze'e, bee bene enu nzeli arqui' Jesucristo uxe'la beella Pablo cuna Silas eyeche nú lee Berea. Chenu uriñabeella ze'e, uya beella liñi indu' bee bene Israel. 11Bee bene Israel quie' máse uri'i nze'ca beella luquela bee bene enu nucua'a eyeche Tesalónica, nu chiqui' ñia nzu arqui'beella ubene'beella lunú uni Pablo, nu yeye'e rula beella sitichia' Diose para nú ri'i beella beya' tunu neli lunú rni Pablo. 12Enze'e huaxi beella uyalí arqui'beella Jesucristo, nu le'ca huaxi bee enu neca griego uyalí arqui'beella li'inu, sia bee niyu nu sia bee una'a enu máse neca equie ze'e. 13Nu chenu ungabiya' bee bene Israel enu nucua'a eyeche Tesalónica nú rixiule'e Pablo Stichia' Diose eyeche Berea, che uyatu' beei arqui' bee bene ze'e para nú lee bee bene ze'e lu Pablo. 14Pero bee bene enu nzeli arqui' Jesucristo né le'beella chu uxe'la beella Pablo enza ru'u inzatu'. Nu Silas cuna Timoteo uya'na beella eyeche Berea. 15Nu bee bene enu uya tu'inza Pablo uyayu beella li'illa hasta eyeche Atenas liñi barco chenu ubenchila' zeca beella eyeche Berea unguya'beella resuna nú uxe'la Pablo para nú chu cha Silas cuna Timoteo elu nzuculla. 16Diqui nú nzuquie Pablo nú riña Silas cuna Timoteo eyeche Atenas, chiqui' nehuana utsu arqui' Pablo chenu ulañi'lla nú nu' huaxi bee diose enu rlu'cu bee bene ula'na lu eyeche ze'e. 17Enze'e, uya Pablo liñi indu' bee bene Israel para nú unilla lubee bene ze'e Stichia' Diose, cuna lubeelá bee bene enu rlu'cu ula'na lu Diose tucu nú rri'i bee bene Israel, nu yeye'e unilla lu titse bee bene enu xa'calla ru'u i'ya stichia'nu. 18Le'ca unilla lu chiucu chuna bee bene enu nzequiee lunú uzete' bene enu lee epicúreos, cuna bee bene estoicos, che nu'beei enu uni: ―¿Xi equie rni benecua' nú chiqui' rni nucua' scua? Xiucu xuna beei uni: ―Pianu stichia' stucu bee diose rene rixiule'e nucua' unibeei. Unibeei scua xne lunú rixiule'e Pablo lubeei neca bedichia' nze'ca' Jesucristo, cuna nú unilla equie nú uhuañi zeca Jesucristo stucu bese. 19Chequie unguya'beei Pablo tucu luhuare elu lee Areópago elu riete'sa'beei. Nu unidichia' beei lulla: ―¿Nu' modo ri'iru beya' xa neca bee bedichia' cuqui cua' nú nze'talu sete'lu li'iru ca'a la? 20Xne puro beenú la ri'iru beya' rnilu luru, enze'e niarqui'ru ri'iru beya' xa neca bee nucua'. 21Xne ye bee bene eyeche Atenas, cuna beelá bee bene rene enu nucua'a ze'e, siempre rri'ibeei scua, riu' arqui'beei nú rdete' beei bichia nú riene' beei cuna nú rdichia' beei lunú necuqui neca. 22Chequie utsuli Pablo ante lu ye beei elu neyete'sa' beei ze'e, nu unilla lubeei: ―Bee bene eyeche Atenas, lu ye nú ulañia uri'á beya' nú rlu'cuhua huaxi bee diose enu rlu'cuhua ula'na lu. 23Nu chenu ri'ya elu rdete'hua ula'na lubee diose'hua, ulañia tucu ecu'cu elu niquie bee bedichia' nú rni: “Para Diose enu la chuluru.” Nu Diose cua' enu rlu'cuhua ula'na lu sin nú chuluhua li'inu, stichia'nu neca nú nzelatixiule'a luhua. 24’Diose cua' ureche'e iliulabe cuna ye nú nu' lue, li'inu rnibiya'nu liñibe cuna lu iliulabe. La nzucunu liñi indu nú rreche' bee bene, 25nu le'ca la qui'ñanu núti ri'i elietsa lunu, xne li'inu necanu enu lia rliqui' bii lua'ahua para nú huañia'ahua nu li'inu rliqui'nu elu nehuañia'ahua, cuna ye beenú rqui'ñia'ahua. 26’Equie cuenda' tucutsia bene uri'i Diose nú udala bee bene lu iliulabe para nú huañi bee bene diqui lu iliulabe, nu utsa'nalanu nú calu lana huañi beei, cuna elu cua'a beei nu hasta calu luyuu nibiya' beei lu. 27Para nú la'na beei Diose masia xi neca chenu rrila' ya bene nú rla'na bene xi rla'nalla para nú scua llela' beei li'inu. Añinzuca nú neli nú laca istu nzu Diose lu ye bee bene. 28Xne equie cuenda' Diose nehuañia'ahua, nu equie cuenda' li'inu rcuñia'ahua nu se'ahua, nu equie cuenda' li'inu nellua'ahua lu iliulabe. Tucu nú le'ca uni chiucu chuna bee bene'hua enu chiqui' reca chenu unibeella: “Li'iru necaru lli'ñi Diose.” 29Enze'e tunu neca'ahua lli'ñi Diose, la qui'ña nú ria'ahua elliebacu' nú necache' Diose oro urre plata urre quiee, xi neca bee diose nú rreche'e bee bene tucu nú xelatsia arqui'beei. 30Bee tiembu nú udetela uzela Diose nú uri'i bee bene tucu nú nzelitsia arqui'beei equie nú la ri'i beei beya', pero nee diqui lu iliulabe rnibiya'nu lubee bene, nú che'e arqui'beei lu stula beei nu chili arqui'beei Diose. 31Xne ucañila Diose tucu bichia nú hualunue lu cuenda' bee bene. Nu udu'lanu Jesucristo para nú ri'inu elu usticia cua', nu para nú lañi' bee bene nú ucañi Diose li'inu nú ri'inu nucua', nu uri'i Diose nú uhuañi zecanu chenu ungutinu. 32Chenu ubene'beei nú uni Pablo nú huañi zeca bee benenguti stucu bese, chiucu chuna beei utsequichia' li'illa, nu xiucu xuna beei uni: ―Pianu hasta stucu bese yene'la'ru lunú rnilu. 33Chequie utsana' arqui' Pablo li'ibeei, 34pero nu' beella enu uyetesa' cuna Pablo nu uchili arqui'beella Stichia' Diose. Leta beella nzu tucu bene enu lee Dionisio, enu neca lu tucu texcua'a bee bene enu lee Areópago, cuna tucu una'a enu lee Dámaris, cuna beelá bee bene.

will be added

X\