Los Hechos 16

1Chenu uriña Pablo cuna Silas eyeche Derbe cuna eyeche Listra, ze'e uchu'u beella tucu bene enu nzeli arqui' Jesucristo, benequie' lee Timoteo nu necalla lliana' tucu una'a bene Israel enu le'ca nzeli arqui' Jesucristo, pero pa'lla neca bene griego. 2Ye bee bene' Jesucristo enu nucua'a eyeche Listra cuna eyeche Iconio rnibeella nu rri'i nze'ca Timoteo. 3Chequie uni Pablo nú uya'lla Timoteo, pero rluti uquieella seña nú rquiee bee bene Israel para nú lecaxi nii bee bene Israel enu nucua'a enza ze'e lu cuenda'lla, xne ye beei nediya' beei nú neca pa' Timoteo bene griego. 4Nu lu ye bee eyeche elu uyabeella, udixiule'e beella lubee bene enu nzeli arqui' Jesucristo nú xa riala ri'i beella, tucu nú uni bee ápostol cuna bee bene enu rnibiya' lubee bene enu nzeli arqui' Jesucristo eyeche Jerusalén. 5Scua unga nú utsuta' arqui' bee bene enu nzeli arqui' Jesucristo enu nucua'a enza ze'e, nu bichia por bichia udala bee bene enu nzeli arqui' Jesucristo. 6Chequie né tsana' Espíritu Santo nú a ixiule'e beella Stichia' Diose enza Asia. Che udetetsia beella lu iliu Frigia cuna lu iliu Galacia, 7nu uriñabeella enza Misia. Ze'e uri'ibeella elliebacu' nú chue beella enza lu iliu Bitinia, pero le'ca né zela Espíritu Santo nú a chaa beella enza ze'e. 8Chenu udete beella enza Misia, uriñabeella eyeche Troas. 9Rula' ze'e ulle'ca Pablo xi neca nú uni xcala'lla, nú ulañi'lla tucu bene enu nze'ta enza Macedonia nu nzulílla sequieella lu Pablo nú unilla: “Ye'talu enza Macedonia para nú ri'ilu elietsa luru.” 10Hora chenu ulube'lu nucua' lu Pablo, uquieneru nú nza'aru enza Macedonia xne nediya'ru nú Diose neca enu rixia li'iru enza ze'e para nú chetixiule'eru bedichia' nze'ca' Jesucristo. 11Nu uyu'ru liñi barco eyeche Troas nu nza'alíru enza Samotracia. Nu stuculá bichia uriñaru eyeche Neápolis. 12Ze'e uchiu'uru nu nza'aru eyeche Filipos, eyeche quie' neca nú máse neca equie enza Macedonia. Pero Roma rnibiya' lu eyeche quie', ze'e uya'naru chiucu chuna bichia. 13Nu tucu bichia nú sulachi bee bene Israel uchiu'uru ru'u eyeche ze'e, uya'aru tucu re'cu elu nediya'ru nú riete'sa' bee bene Israel para nú rnacu' beella lu Diose. Nu ze'e ullua'aru uniru bedichia' nze'ca' Jesucristo lubee una'a enu uyetesa' ze'e. 14Tucu una'a ze'e lee Lidia, li'illa necalla bene eyeche nú lee Tiatira, nu rutilla laquie fiñu nú morado. Neli rlu'culla ula'na lu Diose nu sucu' diacalla lunú rni Pablo, nu uxa'la Diose elliebacu'lla para nú riene' nze'ca'lla lunú rni Pablo. 15Che urinzalla cuna ye bee bene'lla nu uziquieella luru nú unilla: ―Tunu nzeli arqui'hua nú nzelíla arquia Jesucristo uteehua ne ya'nahua nia. Che uri'illa juerza li'iru nú uya'naru ni'lla. 16Tucu bichia chenu nza'aru elu see bee bene rnacu' lu Diose, uchu'uru tucu una'a e'ne' enu nchiñi benechiqui' arqui'. Nu equie nú reca benechiqui' ze'e rri'inchu beya', nu rri'nchu ana huaxi dimi para bee bene enu utsii li'inchu para nú ri'inchu riña' cua'. 17Nu chu nze'ta quienchu Pablo cuna li'iru nu rixialinchu nú rninchu: ―¡Bee benequie' sibi' beella lu Diose liñibe, nu rixiule'e beella luhua nú xa lu'cuhua nú tsila'ahua lu stulahua! 18Scua uri'inchu huaxi bee bichia, hasta nú ullaca' Pablo lunú rri'inchu scua nu ubenchila'lla nu unilla lu benechiqui' enu nchiñi arqui'nchu: ―Equie poder nú rlu'cu Jesucristo li'á nibiya'a lulu nú chiu'ulu arqui' una'a e'ne' quie'. Hora ze'e uchiu'u benechiqui' ze'e arqui'nchu. 19Pero chenu ulañi' bee bene enu rnibiya' lu una'a e'ne' ze'e nú la ria'nchu ana dimi para li'ibeei, chequie una'tse beei Pablo cuna Silas unguya'beei li'ibeella ru'u nilabe lubee usticia. 20Chenu udete' cuenda beei li'ibeella lubee usticia unibeei: ―Bee bene Israel quie' chiqui' sureche beella bee bene lachia'ahua, 21nu sete' beei bee custumbre nú leca modo ria'ahua nu la ria'ahua bee custumbre cua', xne neca'ahua bee bene Roma. 22Chequie ye bee bene ze'e uri'i condra beei li'ibeella, nu unibiya' bee usticia nú chiu'u xucu Pablo cuna Silas para nú zete'che' beei li'ibeella. 23Chenu ulaxu nú juerte uzete'che' beei li'ibeella, chu udu' beei li'ibeella ni'cu' nu unibiya' beei lu bene enu rriucu ru'u ni'cu' para nú ri'i ucu nze'ca bene ze'e li'ibeella. 24Chenu ubene' bene enu rriucu ru'u ni'cu' ze'e nucua', che udu' bene ze'e Pablo cuna Silas hasta cuarto aquié xiña' ni'cu' ze'e nu ullica'cui cuchiu' beella cuna cadena lu tucu ba'ca nú nchiucu' ze'e. 25Pero tucu ulela' rula', diqui nú rnacu' Pablo cuna Silas lu Diose cuna nú rula beella canto lunu. Chequie beelá bee bene enu nchiñi liñi ni'cu' ze'e riene' beei lunú rula beella. 26Chequie tu'natsia uquixie nú unga tucu xú juerte nu ucuñi hasta simiendu' ni'cu' ze'e. Hora ze'e uya'la ye ru'u bee puerta' ni'cu' ze'e nu uye'che bee cadena nú naca'cuu ye bee bene enu nchiñi ze'e. 27Chenu uzetee bene enu rriucu ru'u ni'cu' ze'e ulañi'lla nú ye ru'u bee puerta ni'cu' ze'e na'la, che uhualla espada'lla para nú nze utilla li'illa xne uri'illa elliebacu' nú ye bee enu nchiñi ni'cu' ula'ala. 28Che juerte uni Pablo lulla: ―La útilu li'ilu xne yeeru nellua'aru ca'a. 29Chequie unacu' bene enu rriucu ru'u ni'cu' ze'e tucu quii nu uyu'u xu'ulla liñi ni'cu' nu recatse'tse'lla xiquilla, uriñalla hasta lu Pablo cuna Silas nu utsulliquilla lubeella. 30Nu chu uhualla li'ibeella eli'ya' nu unidichia'lla lubeella nú unilla: ―Detá uni'hua, ¿xi riala ria'a para nú ri'i Diose perdona li'á? 31Nu ucuaqui beella lulla: ―Uchili arqui' Jesucristo enu rnibiya', che ri'i Diose perdona li'ilu cuna bee bene'lu. 32Che unibeella stichia' Jesucristo lulla cuna lu ye bee bene enu nucua'a ni'lla. 33Nu rula' ze'e bene enu rriucu ru'u ni'cu', uquieella bee elu nedi'qui' Pablo cuna Silas. Che chu urinzalla cuna ye bee bene'lla. 34Nu unguya'lla li'ibeella ni'lla nu udete'lla nú udacu beella, nu chiqui' ñia nzu arqui'lla cuna bee bene'lla equie nú nzelíla arqui'beella Diose. 35Chenu uye'e luyuu, uxe'la bee usticia bee sundado nú uyani'beei lu bene enu rriucu ru'u ni'cu' nú la'lla Pablo cuna Silas. 36Chequie uni bene enu rriucu ru'u ni'cu' ze'e lu Pablo: ―Unibiya'la bee usticia nú la'a li'ihua nu' modo nú yuehua nee sin nú chenu arqui'hua. 37Che uni Pablo lubee sundado ze'e: ―Li'iru necaru mero bene Roma nu udiñi beella li'iru ante lu ye bee bene, nu ni'teme' la zela beella nú aniru lubeella xa necane, nu udu' beella li'iru ni'cu'. Nu nee niarqui'beella nú la'a beella li'iru a'chi'tsia. ¡Leca modoe! Ye'ta li'i e'cu beella la'a beella li'iru. 38Nu uya bee sundado ze'e udixiule'e bee nucua' lubee usticia, chequie ulliqui bee usticia ze'e chenu ubene' beella nú neca Pablo cuna Silas bene Roma. 39Che uya bee usticia unacu' beella perdona lu Pablo cuna lu Silas, nu unibiya' bee usticia nú uchiu'u beella ni'cu' nu uni bee usticia ze'e lubeella nú chiu'u beella eyeche ze'e. 40Chenu uchiu'u Pablo cuna Silas liñi ni'cu' ze'e uyabeella ni' Lidia. Nu chenu ulaxu nú udu' beella ana arqui' bee sa' beella enu nzeli arqui' Jesucristo, chu nzuebeella.

will be added

X\