Los Hechos 15

1Bee bichia ze'e uriña chiucu chuna bee bene Judea eyeche Antioquía. Nu uquixiebeei unibeei lubee bene enu nzeli arqui' Jesucristo nú tunu la quie seña li'ibeella tucu nú rnibiya' ley' Moisés leca modo tsila'a beella lu cuenda' stula beella. 2Chequie Pablo cuna Bernabé chiqui' unixuu beella cuna bee benecua', luze'elá ucañi bee bene enu nzeli arqui' Jesucristo Pablo cuna Bernabé cuna xiucu xuna bee bene para nú uya beella Jerusalén, uya ni'i beella lubee apóstol cuna lubee bene enu rnibiya' lubee bene enu nzeli arqui' Jesucristo para nú bi'ya beella xa aca equie cuenda' nucua'. 3Nu udu'nziu bee bene eyeche Antioquía enu nzeli arqui' Jesucristo li'ibeella para nú chue beella. Chenu nzuebeella udete beella lu iliu Fenicia cuna lu iliu Samaria, nu udixiule'e beella lubee bene enu nzeli arqui' Jesucristo enu nucua'a enza ze'e. Nu bee bene enu la neca bee bene Israel nzelila arqui'beella Stichia' Diose. Nu ye bee bene enu nzeli arqui' Jesucristo enu nucua'a enza ze'e, chiqui' ñia utsu arqui'beella chenu ubene'beella nucua'. 4Chenu uriña Pablo cuna bernabé Jerusalén, uyucu nze'ca bee bene enu nzeli arqui' Jesucristo li'ibeella cuna bee apóstol cuna bee bene enu rnibiya' lubee bene enu nzeli arqui' Jesucristo, che ubedichia'nu Pablo cuna Bernabé li'ibeella lunú uri'i Diose lubeella. 5Pero chiucu chuna bee fariseo enu nzelíla arqui' Jesucristo, utsulíbeei nú unibeei: ―Bee bene enu la neca bee bene Israel enu nzelíla arqui' Jesucristo rqui'ña nú quiee seña nú rquie bee bene Israel li'ibeella, nu rqui'ña nú ri'ibeella beya' nú zucu' beella ley' Moisés. 6Chequie uyetesa' bee apóstol cuna bee bene enu rnibiya' lubee bene enu nzeli arqui' Jesucristo para nú bi'ya beella xa ri'ibeella lu cuenda' nucua'. 7Lunú chiqui' ubedichia' beella equie cuenda' nucua', utsuli Pedro nu unilla: ―Bee sa'a enu nzeli arquia'ahua Jesucristo, li'ihua nediya'hua nú hasta hua'tu ucañi Diose li'á letahua para nú nzetixiule'a bedichia' nze'ca' Jesucristo lubee bene enu la neca bee bene Israel para nú chili arqui'beella li'inu. 8Nu Diose enu nu'lu arqui' ye bee bene, ulube'nu nú neca beella bee bene'nu equie nú udete'nu Espíritu Santo lubeella tucu nú uliqui'nue luru, 9tucutse rri'i Diose luru cuna lubeella, xne tucu nú uri'inu perdona stularu le'ca esquie uri'inu perdona stula beella equie nú nzeli arqui'beella Jesucristo. 10Nee, ¿xiquie nú la zucu'hua lunú rni Diose nu rnibiya'hua nú zucu' bee bene enu nzeli arqui' Jesucristo nú rni ley' Moisés, nu ni' li'iru nu ni'bee benea'ahua enu udetela, né aca beella azucu'beella ley cua'? 11Li'iru nediya'ru nú utsila'alaru lu dula tucu nú utsila'a Diose li'ibeella, equie nú neca nze'ca nú uri'i Jesucristo enu rnibiya' lua'ahua. 12Chequie uzaca ye beella nu uzucu' diaca beella lunú rni Pablo cuna Bernabé lu ye bee milagro nú uri'ibeella lubee bene enu la neca bee bene Israel, equie poder nú rlu'cu Diose. 13Chenu ulaxu nú unibeella, chequie le'ca uni Jacobo: ―Bee sa'a enu nzeli arquia'ahua Jesucristo, uzucu' diacahua lunú nialuhua. 14Simón Pedro unilalla lua'ahua nú xa uquixie Diose nú ucañinu bee bene enu la neca bee bene Israel para nú aca beella bee bene'nu. 15Ye bee nucua' ungala tucu nú uquie'e bee profeta lu ichi' Stichia' Diose elu rni: 16Lulá nú aca bee nucua', ri'á nú aca tucu necatse bee benea stucu bese tucu nú ungae chenu uhuañi David. Nu aca tucu necatse beella cuna beelá bee bene enu nehuañisca' nee, tucu nú uhuañi bee bene tiembu nú uhuañi David, nu equie cuenda' beella aca huaxi bee benea, 17para nú cua'na ye bee bene nú zeca beella li'á, nu ye bee bene lu iliulabe cua'na beella nú zeca beella li'á, li'ibeella enu ucañia. 18Scua rni Diose enu rixiule'e ye bee nucua' lu ye bee bene hasta hua'tu. 19’Enze'e li'á Jacobo rri'á elliebacu' nú la qui'ña nú ria'ahua juerza bee bene enu la neca bee bene Israel nú chequie beella lunú rni ley' Moisés, li'ibeella enu utsana' arqui' bee custumbre para nú nzequie beella inziu' Diose. 20Nee neca nze'ca nú xe'lahua tucu ichi' lubeella nú la acu beella nú necale'ya lubee nú nzeli arqui' bee bene nú neca diose, nu la ri'ibeella eluhuexe nu la acu beella be'la' bee nañi enu la ti'chia rene chenu rati, nu la acu beella rene. 21Scua nia'ahua lubeella, xne hasta hua'tu cada eyeche siempre nu' tucu bene enu sete' li'ibeella lunú xi rni ley' Moisés nú rula beella liñi indu' bee bene Israel bichia nú sulachi bee bene. 22Chequie bee apóstol cuna bee bene enu rnibiya' lubee bene enu nzeli arqui' Jesucristo, cuna ye beelá bee bene enu nzeli arqui' Jesucristo unga tucunecatse beella nú ucañi beella bee bene leta beella para nú xe'la beella bee benequie' cuna Pablo cuna Bernabé eyeche Antioquía. Che ucañi beella Judas enu le'ca lee Barsabás, cuna Silas, li'ibeella enu neca equie leta bee bene enu nzeli arqui' Jesucristo. 23Nu uxe'la beella tucu carta cuna li'ibeella nú rni: ‘‘Li'iru bee apóstol, cuna bee bene enu rnibiya' lubee bene enu nzeli arqui' Jesucristo, cuna beela bee bene enu nzeli arqui' Jesucristo, ri'iru saludar li'ihua enu la neca bee bene Israel, pero neca sa'ahua lunú nzeli arquia'ahua Jesucristo, li'ihua enu nucua'a eyeche Antioquía, nu diqui lu iliu Siria, cuna Cilicia. 24Li'iru ungabiya'la'ru nú uchiu'u chiucu chuna bee bene lachia'ahua nu rri'ibeei nú sa' arqui'hua cuna stichia' beei, che la ri'ihua beya' ta nú ri'ihua xne rnibeei nú rqui'ña nú quiehua seña nú rquie bee bene Israel, cuna nú ri'ihua tucu nú rnibiya' ley' Moisés pero lá dete'ru permiso nú ri'ibeei scua. 25Enze'e uyetesa'ru nu uniru nú máse neca nze'ca nú cañiru chiucu chuna bee sa'ahua para nú ye'ta bi'ya beella li'ihua, cuna sa'ahua Pablo cuna Bernabé enu chiqui' se'ca'ahua, 26li'ibeella enu la lliqui mase nú ati equie cuenda' nú sibi' beella lu Jesucristo enu rnibiya' lua'ahua. 27Nu cuna li'ibeella xe'laru Judas cuna Silas, nu le'ca li'ibeella ixiule'e beella ye bee nucua' luhua. 28Nu equie nú nzu Espíritu Santo cuna li'iru, uri'iru beya' nú la qui'ña nú nibiya'ru luhua nú xi ri'ihua, lunú rqui'ña nú ri'ihua neca, 29nú la acuhua be'la' bee nañi enu rricu' bee bene lubee nú nzeli arqui' bee bene nú neca bee diose, nu la acuhua bee nañi enu la ti'chia rene chenu rati nu le'ca la acuhua rene nu la ri'ihua eluhuexe. Tunu ri'yahua li'ihua nú la ri'ihua ye bee nucua' che sí nehuañi nze'cahua lu Diose. Diose bi'ya li'ihua.” 30Scua ungae, uxe'la beella carta cua' cuna tacu bene ze'e eyeche Antioquía. Ze'e uquiete'sa'beella bee bene enu nzeli arqui' Jesucristo nu udete' beella carta cua' ya beella. 31Chenu ungula beella carta ze'e, chiqui' ñia utsu arqui'beella equie bee bedichia' nze'ca nú rni lu carta ze'e. 32Chequie Judas cuna Silas lunú le'ca rlu'cu beella nú reca beella para nú udete' beella Stichia' Diose lubee bene, xee unibeella lubee bene' Jesucristo cuna nú udu' beella ana arqui'beella cuna stichia' beella. 33Chenu udete huaxi bee bichia nú nzucu Judas cuna Silas ze'e, chequie bee bene' Jesucristo enu nucua'a eyeche Antioquía ze'e udu' inza beella li'ibeella para nú benchila' zeca beella elu nucua'a bee sa'beella enu uxe'la li'ibeella nú unibeella lubeella: “Diose ri'i ucu li'ihua.” 34Pero udu' arqui' Silas nú uya'nalla ze'e 35Nu Pablo cuna Bernabé uya'nalá beella eyeche Antioquía, li'ibeella cuna beelá bee bene uzete' beella, cuna nú uyatixiule'e beella bedichia nze'ca' Jesucristo lubee bene ze'e. 36Chenu udete chiucu chuna bee bichia, che uni Pablo lu Bernabé: ―Cha'a chebi'ya' zeca'a bee sa'ahua enu nzeli arqui' Jesucristo bee eyeche elu uyatixiule'e lá stichia'nu para nú bi'ya'a xa nucua'a beella. 37Bernabé niarqui' nú uya' beella Juan enu le'ca lee Marcos; 38pero nézela Pablo nú a uya' beella Juan Marcos, xne chenu uya beella lu iliu Panfilia utsana' arqui'lla li'ibeella nu né chequiella li'ibeella. 39Chequie ni' tuculla nu ni' stuculla né ya'na tucu necatse beella, nu utsana' arqui'sa'beella. Che unguya' Bernabé Marcos nu uyu'u beella liñi barco nu nzuebeella enza Chipre luyuu nú netse lu inzatu'. 40Nu ucañi Pablo Silas nzenulla, nu utsa'na beelá bee bene' Jesucristo li'ibeella ya Diose para nú ri'iucunu li'ibeella. 41Nu udete beella lu iliu Siria, cuna lu iliu Cilicia nu udu' beella ana arqui' bee bene' Jesucristo enu nucua'a enza ze'e.

will be added

X\