Los Hechos 13

1Leta bene' Jesucristo enu nucua'a eyeche Antioquía nucua'a bee profeta, cuna bee ulaxcuela enu udixiule'e Stichia' Diose. Leta beella nzu Bernabé, Simón (enu le'ca lee enu natsa), cuna Lucio enu neca bene eyeche Cirene, cuna Saulo cuna Manaén (enu tucutse uru'cunu arre Herodes enu unibiya' Galilea). 2Tucu bichia nú né acu beella diqui nú rnacu' beella lu Diose, che uni Espíritu Santo lubeella: ―Ucañihua Bernabé cuna Saulo para nú ri'ibeella riña' nú niarquia nú ri'ibeella. 3Chenu ulaxu nú udete'beella bichia nú la acu beella, diqui nú rnacu' beella lu Diose, chu uricu' beella ya beella equie Bernabé cuna Saulo para nú ri'i Diose elietsa lubeella, nu uni bee bene ze'e lubeella chenu nziue beella. 4Che uxe'la Espíritu Santo Bernabé cuna Saulo lu eyeche nú lee Seleucia. Nu ze'e uyu'u beella liñi barco nu nzuella luyuu nú lee chipre nú netse lu inzatu'. 5Chenu uriña beella lu iliu Chipre, chequie eyeche Salomina uquiexie beella nú rixiule'e beella Stichia' Diose liñi indu' bee bene Israel enu nucua'a ze'e, le'ca unguya' beella Juan para nú ri'illa elietsa lubeella. 6Chenu nzuebeella diqui lu iliu Chipre, che uriña beella eyeche nú lee Pafos, eyeche ze'e uchu'u beella tucu bene Israel enu lee Barjesus, li'illa necalla tucu uliñi nu sequienulla bee bene nu rnilla nú necalla tucu profeta' Diose. 7Barjesus quie' neca bene' Sergio Paulo enu neca gobernador lu iliu Chipre, nu chiqui' recalla. Unibiya'lla nú ye'ta Bernabé cuna Saulo, xne niarqui'lla nu yene'lla Stichia' Diose. 8Pero uliñi quie' dialu griego leella Elimas, niarqui'lla nú cálla nú chili arqui' Sergio Paulo Stichia' Diose. 9Chequie Saulo enu le'ca lee Pablo, chiqui' nzu Espíritu Santo cuna li'illa, nu ubi'yalílla lu Elimas, 10nu uni Pablo lu Elimas: ―¡Lli'ñi beze'lu lee, puro eluquichia' rnilu, nu puro lunú necha neca rri'ilu, ni' tucu nú neca nze'ca la yu' arqui'lu! ¿Hasta xunga tsana'lu nú chequiee bee bene inziu' Diose nú neli neca? 11Nee dete' Diose castiya li'ilu nu quie' lulu, nu la bi'ya'lu ellie'e bichia tucu tiembu. Hora ze'e ucabelí lu Elimas nu la biya'illa nu rla'nalla enu na'tse yalla, xne la bi'ya'lla. 12Chenu ulañi' gobernador Sergio Paulo nucua', uchili arqui'lla stichia' Jesucristo. Nu chiqui' uyanuu arqui'lla equie cuenda' stichia' Jesucristo nú sete' beella. 13Chequie Pablo cuna bee bene enu nuulla uyu'u beella liñi barco eyeche Pafos nu nzuebeella enza lu eyeche Perge nú nchiucu' lu iliu Panfilia. Ze'e utsa'na Juan Marcos li'ibeella nu ubenchila'lla eyeche Jerusalén. 14Lu ze'elá uchiu'u beella eyeche nú lee Perge nu nzuebeella eyeche Antioquía nú nchiucu lu iliu Pisidia. Chenu uriña bichia nú sulachi bee bene Israel, uyu'u beella liñi indu' beei nu chu uzucu beella liñi indu ze'e. 15Chequie chenu ulaxu nú ungula bene lu ichi' nú uquie'e Moisés cuna beenú uquie'e bee profeta, bee bene enu rnibiya' liñi indu ze'e unibeei lu Pablo cuna lu Bernabé: ―Tunu nu' nú niarqui'hua nihua para nú nihua bezete' lubee bene nu' modo nihuane nee. 16Che utsuli Pablo nu uri'illa seña lubeella nú zaca beella, nu unilla lubeella: ―Bee bene Israel, cuna yehua bee enu rcua'na nú huañi tucu nú niarqui' Diose, uquie'e diacahua nú nia luhua. 17Diose'ahua lia'ahua enu neca bee bene Israel, li'inu ucañinu bee bene'ahua enu udetela, nu uri'inu nú udala beella nu unga huaxi beella chenu ucua'a beella xi neca bee bene rene Egipto, chequie cuna poder'nu uhuanu li'ibeella Egipto. 18Nu uriqui' Diose li'ibeella lunú uri'ibeella diqui chiu'a lana chenu ucua'a beella lu dañi achi, 19nu unitilu Diose achi bee nación nú uricu lu iliu Canaán para nú udete'nu yuu ze'e lubee bene'ahua enu udetela. 20Nucua' unga diqui tacu ayu'u arula' lana, cheelá udu' Diose bee juece para nú nibiya' lubeella. Nu profeta Samuel unga último juece lubeella. 21Cheelá unacu' beella nú chu'u tucu arre enu nibiya' lubeella, che ucañi Diose arre Saul para nú nibiya' lubeella diqui chiu'a lana, li'illa ungalla lliana' bene enu lee Cis, enu nze'ta leta famili' Benjamin. 22Nu chenu unguti arre Saúl, che ucañi Diose arre David, nu uninu: “Ulañilá nú David, lliana' Isaí nehuañilla tucu nú niarquia, nu li'illa ri'illa lu ye nú niarquia nú ri'illa.” 23Nu nee, tucu nú uni Diose nú le'ca leta bee famili' arre David quie' uchiu'u Jesuse enu uxe'la Diose para nú tsila'anu bee bene Israel lu cuenda' stula beella. 24Ante nú riña Jesuse, udixiule'e Juan Bautista lu ye bee bene Israel nú rqui'ña nú che'e arqui'beei lu stula beei, nu rinza beei. 25Nu chenu nze'ta axula nú ati Juan, unilla: “La necá Cristo tucu nú nzeli arqui'hua. Pero chenu riñanu ni' lucunu la yala nú hua xne máse neca equienu luquela li'á.” 26’Nee ye'ahua enu nzela'ahua lubee famili' Abraham, cuna yehua enu rcua'na nú huañihua tucu nú niarqui' Diose para lia'ahua neca stichia'nu nú rixiule'e nú xa tsila'a Jesucristo lia'ahua lu cuenda' dula. 27Pero bee bene eyeche Jerusalén cuna bee usticia' beella lá chulubeella Jesucristo tucu nú riala nú chulu beella li'inu nu le'ca la ri'ibeella beya' xi rni Stichia' Diose nú uquie'e bee profeta nú rula beella liñi indu bichia nú sulachi beella nu le'ca li'ibeella unguti beella Jesucristo. Nu scua uyalu tucu nú niquie lu ichi' Stichia' Diose. 28Añinzuca nú lecaxi equiya ulu'cu Jesucristo, pero unite'ca beei lu Pilato nú unibiya'lla nú ungutinu. 29Chenu ulaxu luye nú uri'inubeella li'inu tucu nú nequiee lu ichi' Stichia' Diose equie cuenda'nu. Che uya bee bene enu ulaca cuerpo'nu lu cruse nu uyaca'chi' beella cuerpo'nu. 30Pero uri'i Diose nú uhuañi zecanu. 31Nu huaxi bee bichia ulube'lunu lubee bene enu uyanzenu li'inu chenu uchiu'unu Galilea nu nzanu Jerusalén, nu nee neca bee bene ze'e enu rixiule'e equie cuenda'nu lubee bene. 32’Enze'e, li'iru le'ca rixiule'eru bedichia' nze'ca cua' luhua tucu nú ucuaqui u'na Diose lubee bene'ahua enu udetela. 33Li'inu utsa'alulanu nucua' lua'ahua nu nzela'ahua leta famili' beella, utsa'alunu stichia'nu chenu uhuañi zeca Jesuse, tucu nú niquie lu salmo rrucu elu rni: “Li'ilu necalu Lli'ñia nu desde nee rlu'culu nú rnibiya'lu tucu nú rnibiya'a.” 34Diose uni nú ri'inu nú huañi zeca Jesucristo, nu leca' xunga atinu tucu nú niquie lu ichi' Stichia' Diose elu rni: “Li'á ri'á nú cha nze'ca lu cuenda'hua tucu nú ucuaqui u'naa lu David.” 35Nu le'ca nu' stucu parte lu ichi' stichia'a elu rni: “Li'ilu la tsana'lu nú uchu cuerpo' Lli'ñilu enu la lu'cu dula.” 36Nee, bedichia' quie' la nine equie cuenda' David, xne chenu ulaxu nú unibiya'lla lubee sa'lla tucu nú uni Diose lulla nú nibiya'lla tiembu ze'e, chequie ungutilla nu uhuachi'lla nu unguchu' cuerpo'lla. 37Pero cuerpo' Jesucristo enu uri'i Diose nú uhuañi zeca, lá uchu cuerpo'nu. 38Enze'e bee sa'a, rixiule'eru luhua para nú ri'ihua beya' nú equie cuenda' li'inu nu' nú rri'i Diose perdona stula'ahua. 39Ye bee bene enu nzeli arqui' Jesucristo neca perdonala ye stula beella nú leca modo nú aca perdona, añinzuca nú uri'ibeella tucu nú rnibiya' ley nú udete' Diose lu Moisés. 40Enze'e ubi'yahua li'ihua para nú la zecahua tucu nú uquie'e bee profeta, chenu uquie'e beella nú unibeella: 41Uzu'cu' diacahua li'ihua enu sequichia' stichia'a. Uyanu arqui'hua nú unitiluhua, xne bee bichia nú nehuañihua ri'á beenu hasta li'ihua la chili arqui'hua, añinzuca nú nu' bee enu, ixiule'e bee nucua' luhua. 42Chenu uchiu'u Pablo cuna Bernabé liñi indu' bee bene Israel ze'e, nu bee bene enu la neca bee bene Israel uziquiee beei lu Pablo para nú chenu riña zeca bichia nú sulachi bee bene Israel cha zecalla ixiule'ella tucu nú unilla lubeei bichia ze'e. 43Chenu uchiu'u bee bene liñi indu ze'e huaxi beella uyaquie Pablo cuna Bernabé, sianu neca beella bee bene Israel urre bee bene rene enu rlu'cu ula'na lu Diose, tucu nú rlu'cu bee bene Israel ula'na lu Diose. Nu uni Pablo cuna Bernabé lubeella nú tsúta' arqui'beella lunú nziquie beella inziu' Diose li'inu enu seca li'ibeella. 44Chenu ulaxu xmana, bichia nú sulachi bee bene Israel, casi ye bee bene eyeche ze'e uyetesa'beei para nú ubene' beei Stichia' Diose. 45Pero chenu ulañi' bee bene Israel bee beneañi enu neyete'sa' ze'e, chequie uyee arqui'beei nu uquixiebeei nú se'ta beei nú rnibeei bedichia' nú necha neca lu Pablo. 46Chequie sin nú lliqui Pablo cuna Bernabé ucuaqui beella lubeei nú unibeella: ―Rlutilá luhua riala nú dixiule'eru bedichia' nze'ca' Diose, li'ihua enu neca bee bene Israel, pero nee la niarqui'hua nú yene'huane, chequie le'catsia li'ihua rri'ihua nú la yalahua elu nehuañi nú leca xunga laxu lu Diose. Nu nee nze tixiule'eru bedichia' nze'ca cua' lubee bene enu la neca bee bene Israel. 47Xne scua unibiya' pa'ru Diose chenu uninu tucu parte lu stichia'nu elu rni: Udu'a li'ilu xi neca ellie'e lubee bene enu la neca bee bene Israel, para nú chetixiule'elu lu ye bee bene iliulabe nú xa tsila'a beella. 48Chenu ubene' bee bene enu la neca bee bene Israel nucua', che chiqui' ñia utsu arqui'beei nu uquixiebeei unibeei nú neca nze'ca bedichia' nze'ca' Diose. Nu ye bee bene enu riala elunehuañi nú leca xunga laxu lu Diose uchili arqui'beella stichia'nu. 49Scua ungabiya' bee bene Stichia' Diose diqui lubee iliu ze'e. 50Pero bee bene Israel udu' beei arqui' bee una'a enu siempre se indu nu neca equie beella eyeche ze'e, cuna lubee niyu enu neca equie para nú utiliaca' beei Pablo cuna Bernabé hasta nú uhuabeei li'ibeella lu iliu ze'e. 51Nu chu uri'qui Pablo cuna Bernabé yu be'cha' cuchiu' beella xi neca seña nú ne zucu' bee bene ze'e stichia' beella, nu chu nzuebeella eyeche nú lee Iconio. 52Pero bee bene enu uyalí arqui' Jesucristo chiqui' ñia nzu arqui'beella nu chiqui' nzu Espíritu Santo cuna li'ibeella.

will be added

X\