Los Hechos 12

1Bee bichia ze'e uquixie arre Herodes nú uri'illa nú nehuana ulle'ca chiucu chuna bee bene enu nzeli arqui' Jesucristo. 2Nu unibiya'lla nú unguti Jacobo bichi Juan cuna espada. 3Nu chenu ulañi' Herodes nú riu' arqui' bee bene Israel lunú uri'illa, che unibiya'lla nú una'tse bee bene Pedro. Nucua' unga bee bichia liñi nú racu bee bene Israel pá nú la nucha levadura. 4Chenu una'tse bee bene Pedro nu udu' beei li'illa ni'cu'. Che unibiya' arre Herodes lu tacu texcua'a bee sundado para nú ri'i ucu beei ru'u ni'cu', cada texcua'a bee sundado ze'e neca tacu beei. Xne uri'illa elliebacu' nú dete'lla Pedro lubee bene eyeche ze'e chenu dete eliñi baxcu. 5Enze'e uri'i ucu beei Pedro chenu nchiñilla ni'cu', pero ye bee bene enu nzeli arqui' Jesucristo la tsuxe beella nú siquiee beella, cuna nú rnacu' beella lu Diose equie cuenda'lla. 6Le'ca rula' ze'e chenu uye'e luyuu stucu bichia para nú lube' Herodes Pedro lubee bene eyeche ze'e, ra'tse Pedro nuxu labe chiucu bee sundado, nu naca'culla cuna chiucu cadena, nu texcua'a bee sundado rriucu ru'u ni'cu'. 7Nu tu'natsia uriña tucu ángele' Diose nu uyu'ullie'e liñi ni'cu'. Nu chu ucuñi ángele ze'e cue'tse Pedro para nú huañilla, nu uni ángele ze'e lulla: ―Yexetsia uzetee. Hora ze'e uzana' cadena nú naca'cuu ya Pedro. 8Nu uni ángele ze'e lulla: ―Ulli'cacuuta' xla'culu nu uquie'e luculu. Chenu uri'i Pedro scua, che uni ángele ze'e lulla: ―U'tu' capa'lu nu utequiee li'á. 9Nu chu uchiu'u Pedro nzequiee ángele ze'e, pero la ri'illa beya' tunu neli nú rri'i ángele ze'e. Xne secalla nú rnitsia xcala'lla. 10Nu udete beella lu texcua'a bee sundado, cheelá udete beella lu texcua'a bee sundado, chenu uriñabeella ru'u puerta ni'cu' para nú chiu'u beella ru'u inziu, e'cu puerta ze'e uya'lane. Nu uchiu'u beella, nu chenu uriñabeella squiña inziu ze'e, ze'e utsana' arqui' ángele ze'e Pedro. 11Chequie uri'illa beya' nú neli lunú secalla scua, nu unilla: ―Nee nediyaa nú uxe'la Diose ángele'nu para nú utsila'anu li'á lu Herodes, cuna lu ye nú niarqui' bee bene Israel ri'inu li'á. 12Chenu uri'i Pedro beya' nú necane scua, che chu nzalla ni' María, na' Juan, enu le'ca lee Marcos, elu nucua'a huaxi bee bene neyete' sa' rnacu' lu Diose. 13Chenu uchichi Pedro ru'u puerta, che uchiu'u tucu una'a e'ne enu lee Rode para nú nzebi'yanchu ti enu xichi ze'e. 14Pero chenu uyulunchu chi Pedro, chiqui' ñia utsu arqui'nchu, che luhuare nú xa'lanchu ru'u puerta chu'ulla a'la uyecaxu'unchu uya tixiule'enchu nú Pedro nzu ru'u puerta. 15Nu uni bee bene ze'e lunchu: ―¡Ichia lucu secalu! Pero chiuca utsuta' Rode nú neli nú necalla Pedro. Nu uni beella lunchu: ―Laca li'illa, talabese neca nucua' ángele enu rri'i elietsa lulla. 16Pero chu xichila Pedro ru'u puerta, chequie chenu uxa'la beella ru'u puerta, hasta ulliqui beella chenu ulañi'beella li'illa. 17Nu uri'i Pedro seña lubeella nú zaca beella, che udixiule'ella nú xa uhua Diose li'illa ni'cu', nu unilla lubeella: ―Scua udixiule'ehua lu Jacobo, cuna lu ye bee bene enu nzeli arqui' Jesucristo. Cheelá uchiu'ulla nu nzalla stucu luhuare. 18Chenu uye'e luyuu, ni' la ri'i bee sundado beya' xa ri'ibeei xne né acabiya' beei xa uchiu'u Pedro ni'cu'. 19Chequie unibiya' Herodes nú checua'na bee sundado Pedro, pero ne llela' beei li'illa. Chenu ulaxu nú unidichia' Herodes lubee sundado xa unga nú uchiu'u Pedro ni'cu', unibiya'lla nú ati bee sundado ze'e. Che uchiu'u Herodes Judea nu nzalla eyeche Cesarea zuculla. 20Ulee Herodes lubee bene eyeche Tiro cuna lubee bene eyeche Sidón, pero unga tucu necatse bee bene ze'e para nú che nibeei lulla. Nu chenu uri'ibeei ana nú rquiete' beei bene enu lee Blasto, tucu bene' arre Herodes, che uni Blasto ze'e lu cuenda' beei lu arre Herodes nú la ria'lla xu cuna li'ibeei, xne li'illa rnibiya'lla diqui bee luhuare elu nze'ta bee elubacu nú racubeei. 21Chequie utsa'na Herodes tucu bichia nú bedichia'nulla li'ibeei, chenu uriña bichia ze'e ungutulla xucu fiñulla, nu uzuculla lu xleta elu rnibiya'lla nu uquixiella nú unilla lubeei. 22Che uquixie bee bene ze'e nú urixialibeei nú unibeei: ―¡Tucu diose neca enu rni, nu la ni tucu bene! 23Hora ze'e uri'i tucu ángele' Diose nú unga riti Herodes, udacu bee berecu' li'illa nu ungutilla. Xne uyu'u arqui' Herodes nú zucu' ayaa bee bene li'illa, luhuare nú zucu' ayaalla Diose. 24Pero Stichia' Diose chu nze ri'chia letsela diqui bee luhuare, nu diqui bee luhuare chu nze dalalá bee bene enu nzeli arqui' Jesucristo. 25Chequie chenu ula'xu Bernabé cuna Saulo lunú riala ri'ibeella eyeche Jerusalén, ubenchila' beella eyeche Antioquía cuna Juan, enu le'ca lee Marcos.

will be added

X\