Los Hechos 11

1Bee apóstol cuna bee bene Judea enu nzeli arqui' Jesucristo, ubene'beella nú le'ca nuu bee bene enu la neca bee bene Israel uchili arqui'beella Stichia' Diose. 2Chequie chenu ubenchila' Pedro eyeche Jerusalén, bee bene Israel enu nzeli arqui' Jesucristo enu nzequiesca' ley, uqui'ya' Pedro uri'ibeella. 3Nu unibeella lu Pedro: ―¿Xinu uyalu ni' bee bene enu la neca bee bene Israel, nu udacunulu li'ibeei? 4Chequie uni Pedro lubeella lu ye nú unga, enze'e uyalla ni' bene ze'e, nu unilla: 5―Chenu nzua eyeche Jope, nu rnacua lu Diose, che ulle'ca xi neca nú uni xcala'a, nu ulañia nú rnaa xi rnaa tucu laquie llene, nú nze'ta laca enza liñibe nu naca'cuu dacu lli'i nu uriñae hasta elu nzua. 6Chequie ubi'ya nze'ca xi nu' liñi laquie llene ze'e, nu ulañia bee nañi dañi enu nelachi, cuna bee nañi enu nzucu tacu cuchiu', cuna bee be'la cuna bee nañi enu rcuecu'. 7Nu ubenea tucu chii nú uni: “Pedro, utsuli, uti tatse bee nañi cua' aculu.” 8Che ucuaquia: “A'a, Detá, xne leca xunga udacua beenú necha rnaa lunú la yala acu bee bene.” 9Nu uni zeca chii ze'e lua stucu bese desde liñibe: “Lunú uquieela Diose la hualeelu nucua' nú necha rnaa.” 10Chenu unga nucua' chuna bese, che uquie zeca ye bee nucua' liñibe. 11Le'ca hora ze'e uriña chuna bee niyu elu nzucua'a, nze'ta bee bene quie' desde eyeche Cesarea nze'ta la'na beella li'á. 12Nu uni Espíritu Santo lua nú chenua li'ibeella sin nú za' arquia. Le'ca uya'nua xu'cu bee sa'ahua enu nucua'a ca'a. Nu yeru uyu'uru liñi ni'i bene ze'e, 13chequie uni bene ze'e luru nú xa ulube'lu tucu ángele' Diose lulla ni'lla, nu uni ángele ze'e lulla: “Uxe'la bee bene enu cha eyeche Jope para nú chetucu beella Simón enu le'ca lee Pedro, 14li'illa nilla lulu xa tsila'alu, cuna ye bee bene ni'lu lu stula beella.” 15Chenu uquixia nú unia lubeella, che uyucu arqui'beella Espíritu Santo, tucu nú ungae chenu uyucu arqui'rune. 16Chequie ullu'cu' arquia bee stichia' Jesucristo chenu uninu: “Neli nú urinza Juan bee bene cuna inza, pero li'ihua rinzahua cuna Espíritu Santo.” 17Nu nee nú uxe'la Diose Espíritu Santo nú uyucu arqui' beella tucu nú uyucu arquia'ahua chenu uyalí arquia'ahua Jesucristo, ¿enze'e ti necaa para nú cáa lunú rri'i Diose? 18Chenu ubene' bee bene Jerusalén bedichia' cua', che né nia' beella lu Pedro, nu unibeella bedichia' nze'ca lu Diose, nú unibeella: ―¡Nee nediya'ahua nú le'ca nuu bee bene enu la neca bee bene Israel udete' Diose nú che'e arqui'beella equie cuenda' stula beella nu lu'cu beella elunehuañi nú leca xunga laxu lu Diose! 19Lulá nú unguuti bee bene Esteban, che uquixiebeei nú rtiliaca' beei bee bene enu nzeli arqui' Jesucristo, nu uri'chia letse bee bene'nu enza Fenicia, cuna enza Chipre cuna enza Antioquía. Nu ze'e udixiule'e beella bedichia' nze'ca' Jesucristo lubee bene Israel tsia. 20Pero leta beella nchiñi chiucu chuna bee bene eyeche Chipre cuna bene eyeche Cirene, chenu uriña bee benequie' eyeche Antioquía udixiule'e beella bedichia' nze'ca' Jesucristo lubee bene enu la neca bee bene Israel. 21Diose uri'i elietsa lubeella, che huaxi bee bene uyalí arqui' lunú rnibeella, nu uyalí arqui'beella Jesucristo. 22Chenu ungabiya' bee bene enu nzeli arqui' Jesucristo eyeche Jerusalén nucua', uxe'la beella Bernabé hasta eyeche Antioquía. 23Chenu uriñalla ze'e, chiqui' ñia utsu arqui'lla chenu ulañi'lla nú xa rri'i Diose elietsa lubee bene ze'e. Chequie unilla bezete' lubeella nu diquinu' arqui'beella chequiee beella stichia' Jesucristo. 24Bernabé unga tucu bene nze'ca, chiqui' uri'i Espíritu Santo elietsa lulla nu neli nzeli arqui'lla Jesucristo. Enze'e huaxi bee bene uyalí arqui' Jesucristo. 25Lu ze'elá uya Bernabé eyeche Tarso nzecua'nalla Saulo, nu chenu ullela'lla Saulo che unguya'lla li'illa eyeche Antioquía. 26Ze'e ucua'a beella tucu lana cuna bee bene enu nzeli arqui' Jesucristo, nu uzete' beella huaxi bee bene. Nu eyeche Antioquía neca elu uquixie nú uhualee bee bene cristiano bee bene enu nzeli arqui' Jesucristo. 27Bee bichia ze'e chiucu chuna bee profeta enu rni Stichia' Diose uchiu'u beella eyeche Jerusalén para nú nzuebeella eyeche Antioquía. 28Tucu beella enu lee Agabo, utsulílla lubee bene, nu equie cuenda' Espíritu Santo unilla nú aca biña diqui lu iliulabe, nu scua ungae lana nú unibiya' arre Claudio. 29Chequie bee bene enu nzeli arqui' Jesucristo enu nucua'a eyeche Antioquía, unibeella nú quiete'sa'beella dimi calutse nú nu' modo dete' cada tucua beella para nú ri'i beella elietsa lubee sa'beella enu nzeli arqui' Jesucristo enu nucua'a lu iliu Judea. 30Nu scua uri'ibeella, che uxe'la beella dimi ze'e cuna Saulo cuna Bernabé para nú dete' beella dimi ze'e ya bee bene enu rnibiya' lubee bene enu nzeli arqui' Jesucristo, lu iliu Judea.

will be added

X\