Los Hechos 1

1Teófilo enu rquietea, ichi' rluti nú uxe'la lulu, lu ichi' ze'e udixiule'a ye beenú uquixie Jesucristo uri'inu cuna ye beenú uzete'nu, 2hasta bichia nú uquienu liñibe. Nu ante nú yanu liñibe, ucañinu bee bene enu aca bee apóstol'nu, nu equie cuenda' Espíritu Santo, udixiule'enu lubeella nú xi rqui'ña ri'ibeella. 3Ungutinu nu uhuañi zecanu nu ulube'lunu lubeella para nú ri'ibeella beya' nú neli nú nehuañinu, nu diqui chiu'a bichia ulube'lunu lubeella, nu udixiule'enu lubeella nú xa neca lunú rnibiya' Diose. 4Chenu nzusca'nu cuna bee apóstol'nu, uninu lubeella nú la chiu'usca' beella eyeche Jerusalén. Nu uninu: ―Ucua'aquiehua hasta nú yalu tucu nú ucuaqui u'na Paa nú ri'inu luhua, tucu nú unilá luhua. 5Neli nú Juan urinza bee bene cuna inza, pero la acaxea' nú rinzahua cuna Espíritu Santo. 6Chequie chenu uyetesa'beella cuna li'inu, unidichia' beella lunu nu necachi unibeella: ―Jesuse, ¿xie' uriñala bicha nú ri'ilu nú nibiya' zeca bee bene lachiru luru la? 7Nu ucuaqui Jesuse lubeella: ―La yala nú ri'ihua beya' nú xi bichia nu xi hora nu xunga ri'i Diose nucua', xne li'itsianu rnibiya'nu xunga ri'inu nucua'; 8pero chenu yucu arqui'hua Espíritu Santo, che acahua ixiule'ehua ti neca li'á lubee bene eyeche Jerusalén, cuna diqui lu iliu Judea cuna lu iliu Samaria, cuna lu ye bee bene iliulabe. 9Chenu ulaxu nú uni Jesuse scua diquila nú ri'yasca' beella lunu tu'natsia uyatsanu uquienu liñibe, che ulaca tucu xcabe nú uyacu'nu liñi nu né lañia' beella li'inu. 10Diqui nú ri'yasca' beella enza liñibe enza uquienu, che ulube'lu chiucu ángele enu nutu laquie niquichi lubeella, 11nu uni bee ángele ze'e lubeella: ―Bee bene Galilea, ¿xinu ri'yalisca'hua enza liñibe? Li'i Jesuse quie' enu ulañia'ahua nú uquie liñibe, nze'ta zecanu stucu bese tucu nú ulañi'hua nú nzianu. 12Chenu ulaca beella nú uya beella dañi nú lee Olivos, utse beella casi tucu kilometro para nú uriña beella Jerusalén. 13Chenu uriña beella ni'i elu nucua'a beella, uquie beella stucu piso aya equie ni'i ze'e. Nu singuie lee beella, Pedro, Jacobo, Juan, Andrés, Felipe, Tomás, Bartolomé, Mateo, Jacobo lliana' tucu bene enu lee Alfeo, Simón enu ulletse leta tucu partido nú lee cananista, cuna Judas enu neca bichi Jacobo. 14Yebeella unga tucu necatse beella nu uyete sa'beella para nú unacu' beella lu Diose cuna bee bichi Jesuse, cuna María enu neca na'nu, cuna beelá bee una'a. 15Bee bichia ze'e utsuli Pedro lubee bene enu nzeli arqui' Jesucristo, nu neca casi tucu ayu'u ala beella, nu uni Pedro lubeella: 16―Bee sa'a enu nzeli arquia'ahua Jesucristo, rqui'ña nú yalu tucu nú uquie'e David lu ichi' Stichia' Diose, tucu nú udu' Espíritu Santo arqui'lla nú xneca ri'i Judas lu iliulabe, Judas quie' neca enu udete' cuenda Jesuse lubee bene enu una'tse li'inu. 17Judas quie' unga tucu sa'ahua enu, uri'inua'ahua riña' tucu nú rria'ahua nee. 18Pero cuna dimi nú uyaxu Judas lu cuenda' nú necha uri'i ungaxi'i tucu yuu, nu uyecata rendiqui Judas lu yuu nu utsa xla'cui uchiuxqui' ye llutsi'i, nu scua ungutii. 19Chenu ungabiya' ye bee bene Jerusalén lunú unga scua, che uhualee beei yuu ze'e Acéldama, nu rni nucua' yuu réne. 20Xne lu ichi' Stichia' Diose nú lee Salmos rni: Ya'na tuculi' ni'ii, nu leca' xunga che cua'a benene. Le'ca rni lu Salmos cua': Chu'u stucu bene luhuare'i. 21’Enze'e lu ye bee bene enu uyanzenua'ahua ye bee bichia chenu nzu Jesuse cuna lia'ahua, 22hasta chenu urinza Juan li'inu nu hasta bichia nú uquienu liñibe. Lu ye bee benequie' rqui'ña nú cañia'ahua tucu beella para nú ri'illa elietsa lua'ahua nú ixiule'ahua lubee bene nú neli nú uhuañi zeca Jesuse nú ungutinu. 23Chequie ucañi beella chiucu bee bene cua': tuculla lee Matías, nu stuculla lee José Barsabás, enu le'ca ri'chia bee bene Justo. 24Nu unacu' beella lu Diose nú unibeella: ―Diose Pa liñibe, li'ilu enu nu'lu arqui' ye bee bene, ulube'luru ta lu rucu benequie' enu ucañilálu 25para nú acalla apóstol'lu enu chu'u luhuare' Judas xne Judas unitilulai equie cuenda' stulai, nu nzialai elu riala nú yai. 26Che ubi'ya beella bi'ya ta lu rucu bene quie' yala nú chu'u luhuare' Judas nu uyala nú uya'na Matías, nu hora ze'e unga zeca chi'chiucu apóstol cuna li'illa.

will be added

X\