2~Timoteo 3

1Le'ca rqui'ña nú ri'ilu beya' Timoteo, nú chenu nze'ta laxu iliulabe chiqui' neriña' para nú huañi bee bene. 2Xne bee bene para li'itsia beei rri'i beei elliebacu', nu sucu'lutsia beei nú lu'cu beei huaxi dimi, nu aca nelliña beei, nu nibeei puro bedichia' nú ruti', cuna nú ni condra beei Diose, nu la zucu' beei nú ni pa' beei urre na' beei, nu la detea' beei che'tsa lu Diose, nu la ria' beei caso lunú neca cuenda' Diose, 3nu la zeca' beei bee bene nu la hua'a arqui'beei bee bene, cuna nú rta' beei eluquichia' bee bene, nu la aca beei tsuxe beei lunú necha neca rle' elliebacu' beei, nu chiqui' aca nelachi beei, cuna nú le beei lunú neca nze'ca. 4Le'ca dete' cuenda beei bee bene enu rquiete' beei, nu la lliqui beei ri'i beei lunú niarqui' beei cuna nú chiqui' zucu' aya beei li'ibeei nu ri'i beei xitse nú niarqui'beei luhuare nú zucu' beei nú niarqui' Diose. 5Rlube' beei nú neca beei xi neca bene enu neli nzeli arqui' Diose, pero lunú rri'i beei rlube' nú la chili arqui'beei li'inu. La quiete'lu sa' bee bene enu rri'i scua. 6Xne leta bee benecua' nu' bee bene enu riu'u ni'i bee bene nu sequienu beei bee una'a cuna lunú sete' beei bee una'a enu ratu sequienu bene, bee una'a enu rri'i ye clasia' dula cuna ye clasia' bee elliebacu' nú la zibi'. 7Bee una'a quie' siempre riene' beenchu lunú sete' bee bene cua', pero la riña nú ri'i beenchu beya' lunú neli neca. 8Hua'tu bee bene enu lee Janes cuna Jambres uri'i condra beei Moisés. Le'ca scua neca bee benecua' nú rri'i condra beei lunú neli neca, li'ibeei unitilula elliebacu' beei nu ni'la chili arqui'beei Diose tucu nú riala chili arqui'beei. 9Pero la ria'beei scua huaxi tiembu, xne ye bee bene ri'i beya' lunú sequienu beei bee bene, tucu nú ulle'ca Janes cuna Jambres. 10Pero li'ilu Timoteo nediya' nze'ca'lu xa setea bee bene, cuna nú xa nehuañia, cuna nú xa neca ellibacua, cuna nu xa nzeli arquia Jesucristo, cuna nú xa rlu'cua paciencia, cuna nu xa se'ca bee bene, cuna nu xa rriquia lunú nehuana se'ca. 11Li'ilu nediya'lu lunú uri'inu bee bene li'á, nu nediya'lu xa nehuana ulle'ca nu le'ca nediya'lu xa nehuana ulle'ca lubee eyeche Antioquía lu eyeche Iconio cuna lu eyeche Listra. Huaxi beenú nehuana ulle'ca lunú uri'inu bee bene li'á, pero Diose utsila'a li'á lu ye beenú nehuana ulle'ca. 12Nu le'ca ye bee bene enu niarqui' nú huañi tucu nú niarqui' Diose nú huañi equie nú nzeli arqui'beella Jesucristo, nu nehuana zeca beella lunú ri'inu bee bene li'ibeella, 13pero bee bene enu necha rri'i nu bee enu sequienu bee bene bichia por bichia máse nzeri'i beei nú necha neca, sequienu beei bee bene nu sequienu beei le'catsia li'ibeei. 14Pero li'ilu utsuta'la arqui'lu lunú ungalálu, cuna lunú nzeli arqui'lu, xne nediya'lu ta bee enu uzete' li'ilu. 15Xne desde nú lle'nalu nu'lulu Stichia' Diose, bee bedichia' cua' rri'i elietsa lulu nú rri'ilu beya' xa utsila'alu equie nú nzeli arqui'lu Jesucristo. 16Ye bee bedichia' nú nequie lu ichi' Stichia' Diose nze'tae lu Diose. Nu sibi'i para nú zete'e bee bene, nu para nú dete'e bezete' lubee bene, nu para nú nine lubee bene nú xa huañi nze'ca bene nu para nú ri'i bee bene beya' xa huañi bene, 17para nú ri'i nze'ca bee bene' Diose beya', nu che aca beella ri'i beella ye nú neca nze'ca.

will be added

X\