2~Corintios 8

1Nee bee sa'a enu nzeli arquia'ahua Jesucristo niarqui'ru nú ri'ihua beya' nú xneca uri'i Diose elietsa lubee bene enu nzeli arqui' Jesucristo lu iliu Macedonia, 2mase nú huaxi nú seca beella, pero chiqui' ñia nzu arqui'beella. Nu añinzuca nú chiqui' seca beella elitsi, pero diquinu' arqui' beella udete' beella melu para nú ri'i beella elietsa lubee bene. 3Li'á nediya nze'caa nú neli uri'i beella elietsa hasta elu uriqui'tsiae. Li'ibeella máse uri'i beella elietsa lunú uza' arquia'ahua, nu lecati uri'i fuerza li'ibeella. 4Chiqui' uzequiee beella luru nú zelaru nu le'ca dete'beella u'na para bee sa'ahua enu nzeli arqui' Jesucristo 5Nu másela uri'i beella elietsa lunú uri'iru elliebacu', scua necane xne neli udete' cuenda beella li'ibeella lu Diose, nucua' neca nú rluti uri'ibeella. Nu nee nucua'alabeella para nú ri'ibeella lunú niru lubeella nú ri'ibeella, tucu nú niarqui' Diose. 6Enze'e uzequieru lu Tito nú la'xulla riña'nze'ca nú rri'illa nú rquiete'sa'lla elietsa, elietsa nú rquiete'sa'lla hasta hua'tu letahua. 7Li'iru nediya'ru nú ye lunú rri'ihua rri'i nze'cahuane nu neli nzeli arqui'hua Jesucristo, nu nediya'hua equie cuenda'nu, lecaxi rri'i falta li'ihua para nú ixiule'ehua stichia'nu, nucua'a tsiñialahua para nú ri'ihua lunú riala ri'ihua, nu secahua li'iru. Nu nee la'nahua nú lube'hua nú nze'cahua para nú ri'ihua elietsa tucu nú rniru luhua. 8La nibiya'a luhua nú alafuerza dete'hua xi dete'hua sino que, rnitsia luhua nú xneca ñia nzu arqui' beela bee bene enú rri'i elietsa. Tunu niarqui'hua nú le'ca lube'hua nú neli secahua bee sa'hua. Rqui'ña nú ri'ihua scua. 9Xne li'ihua nediya'hua nú chiqui' ñia nze'ca Jesucristo lua'ahua. Li'inu utsa'nanu ye eluxene'nu liñibe nu ube'tanu lu iliulabe xi neca tucu bene enu lecali xi lu'cu, para nú equie cuenda'nu le'ca ati'hua eluxene nú rlu'cu Diose liñibe. 10Enze'e nia luhua nú neca nze'ca nú la'xuhua nú rquiete'sa'hua elietsa cua' nú uquixiehua rri'ihua desde teliana. Rlutihua uquixiehua rri'ihua elliebacu' nú ri'ihua scua, nu che chu uquixiehua nú uri'ihua scua. 11Nu tucu nú ñia nzu arqui'hua chenu uquixiehua, rdete'hua elietsa cua' le'ca scua ñia tsu arqui'hua nú ri'ihua scua hasta elu riqui'tsiae. 12Xne chenu neli niarqui' tucu bene nú ri'illa elietsa, lecaxi ri'i tunu calu rdete'lla, nu la yala nú dete'lla elietsa hasta lunú la lu'culla. 13Lania luhua nú ti'quihua arqui'hua nú ri'ihua elietsa hasta lunú la lu'cuhua para nú ri'ihua elietsa lubee bene enu nu' xi secala'cha'. Para nú lecaxi ri'i falta li'ibeella, sinoque lunú niarqui'ru necane nú ye'ahua ria'ahua elietsa lu sa'ahua. 14Nee li'ihua nu' beya' ri'ihua elietsa lubee bene enu nu' xi secala'cha', nu che enta bichia nú le'ca ri'i beella elietsa luhua lunú xi secala'cha'hua, nu scua ria'ahua elietsa lu sa'ahua. 15Lu ichi' Stichia' Diose rni: “Bene enu uquiete'sa' huaxilá nú uquiete'sa' la zucu sobrae, nu bene enu uquiete'sa' lle'natsia nú uquiete'sa' la ri'i faltae.” 16Che'tsalá Diose nú udete'nu elliebacu' lu Tito nú nzenu arqui'lla lu cuenda'hua tucu nú le'ca nzenu arquia equie cuenda'hua. 17Nu chenu uniru lulla nú nze'tabi'yalla li'ihua, chu uzelalla xne nu' ana arqui'lla nú nze'tabi'yalla li'ihua, nu lá qui'ña nú aniru lulla nú aye'ta bi'yalla li'ihua. 18Nu cuna Tito xe'laru stucu sa'ahua enu le'ca nzeli arqui' Jesucristo, enu nu'lula bee sa'ahua ye bee luhuare, equie nú chiqui' ñia sete'lla bedichia' nze'ca' Jesucristo. 19Nu bee sa'ahua enu nzeli arqui' Jesucristo le'ca ula'na li'illa para nú chenurulla che za'naru elietsa nú rquiete'sa'ru. Nu elietsa nú rquiete'sa'ru nucua' rlube' nú nu' ana arquia'ahua ria'ahua elietsa lu beela bee sa'ahua. Nu equie cuenda' elietsa cua' ni nze'ca beella lu cuenda' Jesucristo. 20Enze'e ullela benequie' nú chenurulla para nú lecati niquiya equie cuenda' ye elietsa quie' nú nu'che'ru para nú cheza'naru. 21Xne li'iru niarqui'ru ri'iru yee tucu nú necane, nu la neca nú lubee benetsia rri'iru tucu nú necane sino que le'ca nuu ante Jesucristo. 22Nu nee cuna Tito nu benequie' xe'laru stucu bene enu ulube'laru luhua. 23Tunu nu' bene enu nedichia' equie cuenda' Tito luhua uni'hua lu nze'e nú neca Tito bene enu rri'i elietsa lua, para nú ri'á elietsa luhua, nú chenalahua inziu' Diose. Nu xiucu sa'ahua enu nzeli arquia'ahua Jesucristo enu nza cuna Tito, bee sa'ahua enu nzeli arqui' Jesucristo uxe'la li'ibeella, nu li'ibeella sí nza nze'ca beella inziu' Jesucristo. 24Nee lube'hua lubeella nú neli secahua bee sa'ahua, para nú lu cuenda' beella ri'i beelá bee bene enu nzeli arqui' Jesucristo beya' nú xa necahua nu para nú le'ca lañi' beella nú neli nú unia lubeella equie cuenda'hua.

will be added

X\