2~Corintios 7

1Bee sa'a enu nzeli arquia'ahua Jesucristo bee nucua' neca nú ucuaqui u'nala Diose lua'ahua, enze'e riala nú huañia'ahua sin nú ria'ahua dula nu la ria'ahua elliebacu' nú necha neca cuna beela beenu la zibi' nu yebichia la'na'ahua nú huañia'ahua tucu nú niarqui' Diose equie nú rlu'cua'ahua ula'na lunu. 2¡Uzecahua li'iru! Li'iru lecaxi nú necha neca uri'inuru ni'tucuhua nu lecaxi uzequienuru li'ihua. 3La ri'ihua elliebacu' nú rquiexuru li'ihua, xne scua tucu nú unila luhua hasta hua'tu nú se'caru li'ihua, mase nú ungutiru urre nehuañiru tucutse neca'ahua. 4La nzu chiucu arquia luhua chiqui' ñia nzu arquia luhua. Añinzuca nú nehuana se'caru, pero scua tucu nú rdu'hua ana arqui'ru chiqui' ñia nzu arqui'ru luhua lecaxi ri'i tunu nu' xi se'caru. 5Xne desde chenu uriñaru enza lu iliu Macedonia lá tselachiliru equie nú nehuana se'caru catse elu nza'aru lunú rlee bee bene luru nu xiquiru. 6Pero Diose enu rdu' ana arqui' bene enu nehuana nzu arqui', li'inu udu'nu ana arqui'ru chenu uriña Tito luru ca'a, 7nu la necane equie cuenda' nú uriñatsialla ca'a sino que necane nú ñia nzu arqui'lla equie cuenda' li'ihua. Li'illa unilla luru nú chiqui' nu' ana arqui'lla lañi'lla li'á, nu le'ca nzenu arqui'hua equie cuendaa nu nehuana secahua lu cuendaa, nu nucua' rri'i nú máse ñia nzu arquia nú rri'ihua elliebacu' scua lu cuendaa. 8Li'á nediyaa nú nehuana utsu arqui'hua equie cuenda' carta nú uxe'la luhua, pero li'á la nehuana nzu arquia equie cuenda' carta cua'. Añinzuca nú chiqui' nehuana utsu arquia chenu uxe'la carta ze'e luhua xne nediyaa nú nehuana utsu arqui'hua chiucu chuna bichia, 9nu nee ñia nzu arquia, pero la necane equie cuenda' nú nehuana nzu arqui'hua uri'á sino que necane equie cuenda' nú nehuana nzu arqui'hua uche'e arqui'hua lunú nehuañihua. Li'ihua nehuana utsu arqui'hua tucu nú niarqui' Diose, nu lecaxi nú necha neca uri'iru luhua. 10Xne chenu nehuana seca bee bene tucu nú niarqui' Diose, nu equie nú nehuana secalla scua, nucua' rri'i elietsa lulla para nú che'e arqui'lla lu stulalla nu scua tsila'alla, nu leca' bichia nú nilla xiquie nú utsila'a, pero equie nú nehuana seca bee bene nu la che'e arqui'lla lu Diose, nucua' ri'i nú nitilulla. 11Ubi'yacuruhua lunú uri'i elliana nú ulle'cahua tucu nú niarqui' Diose nú zecahua, equie cuenda' elliana cua' chu utsuxcua'ahua diixi nú unia luhua nu unganu'hua li'á nu ulehua lulla nu ulliquihua lunú rri'illa. Nu li'ihua niarqui'hua nú ala' nzulá cuna li'ihua, nu le'ca udete'hua castiya li'illa tucu nú rialane, luye nú uri'ihua, scua rlube' nú la lu'cuhua culpa equie cuenda' nú uri'illa. 12Carta nú uquie'a luhua, lá quie'ene equie nú rri'itsia elliebacu' lu cuenda' bene enu uri'i dula, urre equie cuenda' bene enu nehuana seca, urre equie cuenda' stula bene ze'e. Li'á uquie'a carta ze'e luhua para nú le'ca li'ihua ri'ihua beya' nú rlube'hua lu Diose nú nchiucu' arqui'hua li'iru. 13Nucua' rri'i nú ñia nzu arqui'ru, nu máse ñia utsu arqui'ru chenu ulañi'ru nú ñia nzu arqui' Tito uriña, equie nú uri'ihua nú ñia nzu arqui'lla. 14Li'á unila lu Tito nú ñia nzu arquia, equie cuenda'hua, nu né uya'na netua equie cuenda'hua lu Tito. Xne ye nú unia equie cuenda'hua neli necane. Nu li'ihua nediya'hua nú siempre rniru nú neli neca, nu neli neca nú uniru equie cuenda'hua lu Tito. 15Nu máse secalla li'ihua chenu rellu'cu' arqui'lla nú xneca uzucu'hua nú rnilla nu lu cuenda' nú chiqui' ulu'cuhua ula'na lulla chenu nzulla cuna li'ihua. 16Li'á chiqui' ñia nzu arquia xne nediya nze'caa nú ye nú rnia luhua rri'ihuane.

will be added

X\