2~Corintios 2

1Enze'e uri'á elliebacu', nu la yelabi'ya li'ihua nee, para nú la ri'á nú nehuana tsu arqui'hua. 2Xne tunu ri'á nú nehuana tsu arqui'hua, che ¿leca' ti du' ana arquia, tunu ri'á nú nehuana tsu arqui'hua li'ihua enu rdu' ana arquia? 3Enze'e lu carta nú uxe'lala luhua unia tucu nú unia luhua, para nú chenu nzelabi'ya li'ihua la ri'ihua nú tsu nehuana arquia luhuare nú ri'ihua nú ñia tsu arquia. Nu li'á nediya nze'caa nú tunu ñia nzu arquia che yehua ñia nzu arqui'hua. 4Chenu uquie'a carta ze'e luhua chiqui' nehuana ulle'ca nu nzenu arquia hasta nú unguna uquie'a bee bedichia' nú fuerte lu carta ze'e, pero lá quie'a carta ze'e luhua para nú nehuana tsu arqui'hua sino que para nú ri'ihua beya' nú chiqui' se'ca li'ihua. 5Tunu nu' bene enu uri'i nú nehuana utsu arquia pero la necane nú li'itsia uri'illa nú nehuana utsu arquia sino que le'ca nuuhua uri'i beella nú nehuana utsu arqui'hua. 6Li'á nia luhua nú castiya nú udete'hua zeca benecua' necalane scuatsia. 7Uri'ihua perdonalla nee nu udu'hua ana arqui'lla para nú la nehuana tsu arqui'lla xne la llela' arqui'lla xneca ri'illa. 8Enze'e nacua luhua nú lube' zecahua lulla nú chiqui' secahua li'illa. 9Carta nú uquie'a luhua hua'tu, uquie'ene para nú ri'á beya' tunu sucu'hua ye nú unia luhua. 10Nu nee tatse bene enu rri'ihua perdona, le'ca li'á rri'á perdona nze'e, nu bene enu uri'á perdona tunu nu' xi rqui'ña nú ri'a perdona li'illa, rri'á perdona li'illa equie cuenda'hua ante Jesucristo. 11Para nú la ri'i beze'lu ana lua'ahua, xne lia'ahua nediya'la'ahua xneca sequienu beze'lu bee bene. 12Chenu uriñaa eyeche Troas para nú ixiule'a bedichia' nze'ca' Jesucristo lubee bene, chiqui' uri'i Diose elietsa lua, nu uyu'u modo nú xneca ixiule'a Stichia' Diose lubee bene. 13Pero lá tsu nze'cali arquia equie nú né llelaa sa'ahua Tito eyeche Troas, enze'e unia lubee bene ze'e nu chu nza'a enza eyeche Macedonia. 14Pero che'tsalá Diose nú equie cuenda' Jesucristo ye ye'e rri'inu elietsa luru nú rri'iru ana lu yeene, xne equie cuenda'ru rri'i bee bene beya' stichia'nu, bee bedichia' nze'ca'nu nú neca xi neca tucu cuana' nú ñia rlia nú rri'chia diqui lu iliulabe. 15Nu equie cuenda' Jesucristo lia'ahua neca'ahua xi neca llene quiendixi nu ñia rlia ante Diose, llene nú rriña lubee bene enu tsila'a nu lubee bene enu nenitilu lu Diose. 16Pero lubee bene enu lachili arqui' Diose lia'ahua neca'ahua xi neca llene nú riñi bee bene, pero para lubee bene enu nzeli arqui' Jesucristo, lia'ahua neca'ahua xi neca llene nú rliqui' elunehuañi' bee bene. Nu lecati aca ri'i bee nucua' tunu la ri'i Diose elietsa lulla. 17Li'iru la dixiule'eru Stichia' Diose para nú ri'iru ana dimi tucu nú rri'i huaxilá bee bene sino que li'iru rri'iru tucu nú rialane, tucu nú ucañila Diose li'iru nú riala ri'iru. Nu nediya' Diose nú lunú necaru bene' Jesucristo enze'e rixiule'eru stichia'nu.

will be added

X\