2~Corintios 13

1Nee aca chuna vese nú nzelabi'ya li'ihua. Chenu nzelabi'ya li'ihua, ye lunú rni stucu bee sa'hua lu cuenda'hua, nú la nehuañihua tucu nú necane, rqui'ña nú ni chiucu chuna bee bene enu ni tunu neli lunú rnihua. 2Tucu nú unila luhua cuna lubee bene enu rri'i dula chenu ubela luhua, le'ca scua rnia luhua nee nú nzua istu luhua, nu chenu nzelabi'ya li'ihua stucu bese nu tunu nu' xi rri'ihua la ri'á perdona li'ihua. 3Che scua ri'ihua beya' lunú niarqui'hua ri'ihua beya' nú Jesucristo neca enu rliqui' bedichia' nú riala nia luhua. Nu Jesucristo lecaxi rri'i falta li'inu para nú ri'inu lunú riala ri'inu cuna li'ihua nu equie cuenda'hua rlube'nu poder'nu. 4Neli nú unguti Jesuse lu cruse xi neca tucu bene enu la nibiya', pero nee nehuañinu equie cuenda' poder' Diose. Nu scua tucu nú ungutinu xi unguti tucu bene enu la nibiya' le'ca scua necane lu cuenda'ru neca xi neca nú la lu'culíru elurnibiya', pero como bene' Jesucristo nú necaru rlu'curu poder' Diose para nú ri'iru elietsa luhua. 5Li'i e'cuhua uri'ihua elliebacu' tunu neli nzeli arqui'hua Jesucristo, li'i e'cuhua uri'ihua elliebacu' xneca nehuañihua, uri'ihua beya' nú nehuañila Jesucristo cuna li'ihua, tunu lacatsiae nú lia rnihua nú nzeli arqui'hua li'inu. 6Ala' nú ri'ihua beya' nú li'isi'ru neli nzeli arqui'ru li'inu. 7Nu nacu'ru lu Diose equie cuenda'hua para nú la ri'ihua nú necha neca, nu la necane nú ya'na nze'caru ante lubee bene sino que rnacu'ru lu Diose para nú ri'i nze'cahua, mase nú seca bee bene nú la ri'iru tucu nú necane. 8Pero li'iru leca modo che'eru lunú neli neca, li'iru rnitsiaru lunú neli neca. 9Enze'e lecaxi ri'i tunu nu' xi se'caru para nú scua tsuta' arqui'hua lunú nzeli arqui'hua, nu equie cuenda' nucua' ñia nzu arqui'ru, nu nacu'ru lu Diose para nú huañihua tucu nú necane. 10Nu nee rquie'exua carta quie' luhua ante nú nzelabi'ya li'ihua, xne chenu nzelabi'ya li'ihua la qui'ña nú qui'ya'hua ri'á equie elurnibiya' nú uliqui' Jesucristo lua elurnibiya' nú uliqui'nu lua para nú ri'á elietsa luhua nú ri'iláhua beya' nú xneca huañihua tucu nú necane, nu lacane para nú nitiluhua. 11Bee sa'a enu nzeli arquia'ahua Jesucristo nee nú la'xua quie'a carta quie' luhua, li'á nia luhua: Nú ñia tsu arqui'hua, ucua'nahua nú huañinze'cahua tucu nú riala nú huañihua, udu'hua ana arqui' sa'hua nu uhuañi nze'cahua cuna bee sa'hua nu la liuhua, nu Diose enu seca li'ihua nu rri'i nú nzuxe arqui'hua li'inu ri'inu elietsa luhua. 12Xitse hora nú lla'cahua sa'hua, uni'hua Diose lu sa'hua tucu nú rialane. 13Ye bee sa'ahua enu nzeli arquia'ahua Jesucristo xe'la beella saludo luhua. 14Jesucristo enu rnibiya' lua'ahua ri'inu nú cha nze'ca lu cuenda'hua nu Diose enu seca lia'ahua nu cuna Espíritu Santo nzu cuna li'ihua ye bichia. Amén.

will be added

X\