2~Corintios 12

1Lecaxi ri'i bene ana nú sucu' ayalla le'catsia li'illa, pero rqui'ña nú nia luhua equie cuenda' beenú ulube'lu lua, nu equie cuenda' nú ulube' Jesucristo lua. 2Li'á nu'lua tucu niyu enu nzeli arqui' Jesucristo, nu ungala rtaa lana nú uyalla liñibe elu nzucu Diose. Nu leca resuna tunu uyalla cuna cuerpo'lla urre uyalla cuna espíritu'lla la ri'á beya' nucua' tucutsia Diose nediya', 3tunu uyalla cuna cuerpo'lla urre uyalla cuna espíritu'lla, la ri'á beya' xa uyalla, tucutsia Diose nediya'. Pero li'á nediyaa nú, 4uyalla elu nzucu Diose, elu ubene'lla bee bedichia' nu la llela'lla xneca nillae lubee bene, xne la yala nú acabiya' bee benene. 5Benecua' nu' beya' nú zucu ayaa, pero leca' modo zucu ayaa le'catsia li'á, tucutsia nú nia equie cuendaa neca beenú nehuana ulle'ca. 6Nu mase nú zucu ayaa le'catsia li'á laca nucua' nú netundua, xne puro beenú neli rnia, pero la ria'a scua para nú la dete bee bene lunú sucu' aya bee bene li'á lunú ri'ya beei xi rri'á urre lunú riene'beei xi rnia. 7Nu para nú la zucu ayaa li'á equie cuenda' ye lunú ulube' Diose lua, che chiqui' nehuana tsi'a xi neca chenu nchiñi tucu eche cuerpo' bene. Nucua' neca riña' beze'lu para nú ri'i equiya lua, para nú la zucu ayaa li'á. 8Chuna bese unacua lu Diose para nú luachunu nú nehuana se'caa, 9pero li'inu uninu lua: “Scua tucu nú se'calu lecali xi zecalu, xne máse rlubea nú rnibiya'a lubee bene chenu nehuana seca bee bene.” Enze'e ñia nzu arquia equie nú nehuana se'ca para nú scua aca achee nú nzu poder' Jesucristo cuna li'á. 10Ñia nzu arquia equie xitse lunú nehuana se'ca, chenu rquiexu bee bene li'á, urre chenu nu' xi secala'cha'a, urre chenu nu' xi rri'inu bee bene li'á, nu cuna ye beelá beenú se'ca equie nú se'ca Jesucristo. Xne chenu nehuana se'ca che máse si'a nú rri'i Jesucristo elietsa lua. 11Unila luhua equie cuenda' li'á xi neca tucu bene enu netundu, pero li'ihua nu' culpa'hua nú uri'á scua. Xne li'ihua riala azucu' ayahua li'á ante lubee bene enu rni nú li'ibeei neca beei mero apóstol. Xne mase nú lecaxi sibi'a pero lecaxi rri'i falta elliebacua. 12Chenu nzua cuna li'ihua lá llaca nú uri'á bee milagro cuna ye beelá beenú ulle'ca lullie'hua nú uri'á cuna ye beelá beenú uri'á nú uzibi' xi neca tucu seña nú neli necaa apóstol' Jesucristo. 13Ye lunú uri'á cuna bee sa'ahua enu nzeli arqui' Jesucristo elu uya'a, le'ca scua uri'á cuna li'ihua. Tucutsia nú uri'á neca nú né nacua luhua nú ari'ihua elietsa lua diquila nú uzucua'a cuna li'ihua, pero tunu lixiu uri'á nú né nacua elietsacua' luhua uri'ihua perdona li'á. 14Nu ne rria'lá elliebacu' nú nzelabi'ya'lá li'ihua stucu bese, cuna nucua' aca chuna bese nú nzelabi'ya li'ihua. Nu ni' ne la niarquia nú ri'ixi'a luhua nú ri'ihua elietsa lua nu la necane nú niarquia nú rlu'cuhua, sino que li'ihua niarquia; xne la neca nú bee endu' rla'na nú xneca bacu beei uzana'beei, sino que bee uzana neca bee enu rebacu bee lli'ñi. 15Nu mase nú la'xua ye nú rlu'cua nu ti'quia arquia equie nú ri'á elietsa luhua; pero lecaxi ri'i nucua'. Mase nú se'ca nú la zeca xe'tahua li'á chenu rlubea luhua nú chiqui' se'ca li'ihua. 16Neli nú lá nacua nú ari'ihua elietsa lua pero nu' bee bene enu rni nú uri'á scua equie nú chiqui' netsiñia para nú azequienua li'ihua. 17Pero chenu uxe'la bee bene enu ube'tabi'ya li'ihua, ¿xie' uxe'la beella luhua para nú aye'ta na'cu' beella luhua nú nu' xi ri'ihua elietsa lua la? 18Le'ca chenu unia lu sa'ahua Tito nú ye'tabi'yalla li'ihua uxe'lalla cuna stucu sa'ahua enu nzeli arqui' Jesucristo, ¿nu xie' unacu' Tito xi unacu'lla luhua la? Nu tanto li'illa cuna li'á iguale neca tucu necatse elliebacu'ru nu tucu nú rri'á rri'illa. 19Equie nú unilaru luhua la ri'ihua elliebacu' nú recanu'tsiaru li'iru, xne lecali xi uri'inuru li'ihua. Diose nediya' nú como bene' Jesucristo nú necaru rniru luhua, nu ye nú rniru necane para nú ri'iru elietsa luhua nú chenalaláhua inziu' Diose equie nú se'caru li'ihua. 20Xne xiquia nú chenu nzelabi'ya li'ihua canu la llelaa li'ihua tucu nú niarquia, nu li'ihua la lañi'hua li'á tucu nú niarqui'hua nú lañi'hua li'á. Xiquia nú llela li'ihua nú rliuhua, nú ria arqui'hua lu sa'hua, nú rlehua lu sa'hua, nú nechiqui'hua lu sa'hua, nú rnihua di'chi sa'hua, nú se'tahua bee bene, nú nelliñiahua nu la neca tucu necatsehua lu sa'hua. 21Le'ca xiquia equie cuenda'hua nú canu chenu nzelabi'ya li'ihua stucu bese zela Diose nú ya'na netua equie cuenda'hua, nu che unaa nu nehuana zecaa equie cuenda' huaxihua nú la chiecu' arqui'hua nú rri'ihua dula, bee enu la che'e arqui' xneca nehuañi, nu la tsana' arqui'beei nú rri'i beei eluhuexe, nu la tsana' arqui'beei nú rlu'cu beei stucu una'a, urre rlu'cu una'a stucu niyu enu laca niyu'nchu, le'ca la chiecu' arqui'beei nú rlu'cu beei stucu vicio urre stucu beenú necha neca nú la zibi' rri'ibeei.

will be added

X\