1~Timoteo 6

1Bee bene enu neiqui lu stucu bene rqui'ña nú lu'cu beella ula'na lubee patrón' beella, para nú la ni condra bee bene Diose cuna stichia'nu nú sete'ahua. 2Nu tunu le'ca patrón beella nzeli arqui' Jesucristo, rqui'ña nú máse lu'cu beella ula'na lu bene ze'e, xne tucutse nzeli arqui'beella Jesucristo, le'ca rqui'ña nú ri'i beella riña' tucu nú rialane, xne sibi' beella lubee sa'beella enu le'ca nzeli arqui' Jesucristo. Scua ze'te' bee bene nu ni' lubeei nú ri'ibeei scua. 3Tunu nu' tucu bene enu sete' bee bedichia' nú la neca tucu nú neca stichia' Jesucristo nu ni' nú xa nzeli arquia'ahua Jesucristo la zete'lla bee bene, 4li'illa necalla tucu bene enu ruti' nu lecaxi reca. Riu'tsia arqui'lla nú rliunulla bee sa'lla, chequie ze'e rquixie nú ria arqui' bee bene lu sa' bee bene, cuna nú rana arqui' bee bene sa' bee bene, cuna nú rquiexu bee bene bee sa' bee bene nu la lu'cu bee bene confianza lu sa' bee bene, 5bee bene enu neca scua, la tsuxe beei nú rliu beei equie ye beenú la zibi' nchiñi elliebacu'beei, xne la ri'i beei beya' lunú neli neca, che rri'i beei elliebacu' equie nú chili arqui'beei Jesucristo aca xene beei. Bee bene enu neca scua uchiu'uchu lubeei nu la quiete'lu beei. 6Neli nu chiqui' xene bee bene lunú nzeli arqui'lla Jesucristo, pero bee bene enu neca conforme lunú rlu'cutsia. 7Xne lecaxi ubela yua'ahua lu iliulabe quie', nu lecaxi uya'ahua chenu atia'ahua. 8Tunu rlu'cua'ahua nú da'cua'ahua, nu rlu'cua'ahua nú utua'ahua cuna nucua' rqui'ña nu aca conforme'ahua. 9Pero bee bene enu niarqui' nú aca xene lu iliulabe quie' la riqui' beei nú tsuta' arqui'beei sino que chu rri'i beze'lu ana lubeei cuna nú la ri'ibeei ana lu elliebacu' nú necha neca rri'i beei, nu rri'ibeei tucu nú la yala ri'i beei, nucua' rri'i nú nitilu beei. 10Xne lunú rle' bee bene nú lu'culla dimi, ze'e rquixie ye beenú necha neca, nu nu' bee enu rle' dimi utsana' arqui'beei lunú nzeli arqui'beei Jesucristo, che le'catsia li'ibeei rri'ibeei nú nehuana seca beei. 11Pero li'ilu Timoteo bene' Diose, uchiu'uchuu lubee nú necha necacua', ucua'na nú huañi nze'calu tucu nú niarqui' Diose nú huañilu, uchili arqui' li'inu, nu utsuquie arqui', nu uzeca ye bee bene, cuna nú aca lle'na arqui'. 12Ucua'na nú tsuta'li arqui'lu lunú nzeli arqui'lu Jesucristo. La tsana'lu nú nitilu elunehuañili nú lu'culu liñibe xne para enze'e udu' Diose li'ilu, nu nilu lu huaxi bee bene xa nzeli arqui'lu Jesucristo. 13Lu Diose enu rliqui' nú nehuañi ye beenú nu' lu iliulabe, nu equie cuenda' Jesucristo li'inu enu né lliqui uni lunú neli neca lu Poncio Pilato, nibiya'a lulu, 14nú zucu'lu nú ri'ilu lunú rnia lulu, nu uri'i tucu nú neli neca para nú la ni bee bene nú la ri'ilu tucu nú neli neca, scua uri'i hasta bichia nú riña zeca Jesucristo. 15Nu nze'tanu bichia chenu nibiya' Diose nú nze'tanu, li'i Diose enu riala ye nú neca ula'na, nu tucutsia li'inu necanu Diose, nu rlu'cunu ye poder, li'inu necanu Arre lubee arre nu Rnibiya'nu lu ye bee enu rnibiya'. 16Li'inu necanu enu leca xunga ati, nu nzucunu lu ellie'e nú rulu siqui' elu lecati chébica. Ni' tucu bee bene lasca' lañi' li'inu, nu laca lañi' bee bene li'inu. ¡Li'inu chiqui' rialanu huaxi ula'na, nu leca xunga laxu poder nú rlu'cunu! Amén. 17Bee bene enu neca bene xene lu iliulabe quie', uni' lubeella nú la uti' lliñia beella, cuna nú la ri'i beella elliebacu' nú la laxu nú rlu'cu beella, xne bee eluxene nú rlu'cu bee bene rlaxue, mejora nú zucu'lutsia beella Diose enu nehuañi, xne li'inu necanu enu chiqui' rliqui' ye nú se'cala'cha'ahua para nú ñia tsu arquia'ahua. 18Uni' lubeella nú ri'i beella lunú neca nze'ca, cuna nú ri'i beella huaxi beenú neca nze'ca, cuna nú ñia nzu arqui'beella dete' beella xi secala'cha' bee bene nu ri'i beella elietsa lubee bene, 19xne scua rquiete' sa' beella eluxene nú ri'i elietsa lubeella lubee bichia nú enta, para nú lu'cu beella nú huañili beella liñibe. 20Timoteo la zañi'lu ri'ilu lunú uya'na cuenda'lu nú ri'ilu, la ri'ilu caso bee bedichia' nú la zibi' nú nu' lu iliulabe quie', ni' bee eluquichia', nu ni' bee bedichia' nú rni bee bene enu rni nú chiqui' reca, pero la neli nú reca beei. 21Xne nu' bee bene equie nú rri'i beei caso bee nucua', utsana' arqui'beei nú nzeli arqui'beei Jesucristo. Diose ri'i nú cha nze'ca lu cuenda' yehua nee Timoteo. Amén.

will be added

X\