1~Timoteo 3

1Neli, neca bedichia' quie' tunu nu' tucu bene enu rri'i elliebacu' nú nibiya' leta bee bene enu nzeli arqui' Jesucristo, neca nze'ca nú niarqui'lla ri'illa scua. 2Pero bene enu nibiya' rqui'ña nú acalla tucu bene enu nehuañi nze'ca tucu nú rialane para nú la ze'ta bee bene li'illa, cuna nú nechialla tucutsia una'a, nu acalla tucu bene enu nehuañi nze'ca cuna nú lu'culla elliebacu' nze'ca para nú lu'cu bee bene ula'na lulla, cuna nú acalla enu siempre nu' arqui' nú dete' elu ya'na bee bene ni'lla, nu acalla tucu bene enu chiqui' reca para nú acalla zete'lla bee bene. 3Cuna nú la acalla uniqui nu la acalla bene enu nelachi, nu la la'nalla nú ri'illa ana dimi' bee bene, rqui'ña nú ri'i nze'calla lu titse bee bene, nu aca lle'na arqui'lla, nu la acalla bene enu riu'tsia arqui' dimi. 4Le'ca rqui'ña nú acalla tucu bene enu nibiya' nze'ca ni'i, nu zete'lla bee endu'lla nú zucu' beei ye nú zucu' beei cuna nú lu'cu beei ula'na. 5Xne tunu tucu bene la acalla nibiya'lla ni'lla, ¿xa acalla nibiya'lla lubee bene' Diose che? 6Enze'e, bene enu apenatsia nzeli arqui' Jesucristo, la yala nu nibiya'lla lubee bene enu nzeli arqui' li'inu para nú la aca nelliñalla nu la zecalla castiya nú riala beze'lu. 7Nu hasta bee bene enu la chili arqui' Jesucristo riala chulu li'illa nú nehuañilla tucu nú riala nú huañilla para nú la ya'na netúlla urre ri'i beze'lu ana lulla. 8Nee le'ca esquie, bee diácono bee enu rri'i elietsa lu bene enu rnibiya' rqui'ña nú aca beella bene enu rlu'cu bee bene ula'na lu, cuna nú tsa'alu beella stichia' beella, nu la aca beella bee uniqui, nu le'ca la la'na beella nú ri'itsia beella ana dimi' bee bene. 9Nu tsuta' arqui'beella lunú ulube' Diose lua'ahua nú nzeli arquia'ahua, nu ri'ibeella puro elliebacu' nze'ca. 10Enze'e rluti rqui'ña nú acaxu preo beella, para nú bi'ya xa rri'i beella, nu tunu la lu'cu beella ni' tucu falta che nu' modo nú aca beella diácono. 11Le'ca esquie bee una'a enu ri'i elietsa liñi indu, rqui'ña nú ri'i beella tucu nú riala ri'i beella para nú lu'cu bee bene ula'na lubeella nu la yala nú aca niquichia' beella, rqui'ña nú huañi nze'ca beella, tucu nú riala nú huañi beella, cuna nú tsa'alu beella stichia' beella lu yeene. 12Bee diácono rqui'ña nú nechia beella tucutsia una'a beella, nu le'ca nibiya' beella ni'i beella cuna lubee endu' beella tucu nú rialane. 13Xne tunu ri'i bee diácono tucu nú rialane, lu'culá bee bene ula'na lubeella, nu ni'teme' la lliqui beella nibeella nú xa nzeli arqui'beella Jesucristo. 14Nzuculua nú la lea' nzelabi'ya li'ilu Timoteo, pero rquie'a carta quie' lulu, 15xne tunu rle'a nú nzelabi'ya li'ilu, nediya'la'lu xa riala nú huañilu ante beelá bee bene' Diose, enu nehuañi nu nzuta' arqui' lunu, nu sete'beella stichia'nu nú neli neca. 16Li'ihua nediya'nze'ca'ahua nú chiqui' rlu'cu Jesucristo poder li'inu enu ulube' Diose lua'ahua nú chili arquia'ahua: Ube'tanu lu iliulabe xi neca tucu bene, uni Espíritu Santo nú la lu'cunu dula, nu ulañi' bee ángele li'inu nú ube'tanu lu iliulabe. Ubene' bee bene iliulabe stichia'nu, nu diqui bee luhuare lu iliulabe uyali arqui' bee bene li'inu, nu uquienu liñibe nzianu.

will be added

X\