1~Pedro 5

1Nee nia bezete' quie lubee bene enu rnibiya' letahua, li'á enu rlu'cu nú rnibiya' tucu nú rnibiya' beella, nu le'ca li'á neca enu ulañi' xa nehuana ulle'ca Jesucristo. Chequie le'ca tucutse lañia'ahua nú chiqui' ñia neca equie Jesucristo bichia chenu riña zecanu stucu bese, nu bedichia'quie' neca para li'ibeella. 2Li'ihua bee enu rnibiya' nia luhua tucu nú rriucu bene enu rriucu bee sanchi scua ri'i ucuhua bee bene' Jesucristo, lunú neca cuenda'hua nú zete'hua li'ibeella para nú chequieelá beella inziu' Diose. La ri'ihua riña' cua' lunú nediya'hua nú neca cuenda'hua nú ri'ihuane, sino que uri'ihuane equie nú nu' ana arqui'hua ri'ihuane, diquinu' arqui'hua uri'ihua riña' cua' tucu nú niarqui' Diose, nu la ri'ihuane equie nú niarqui'hua dimi. 3La necane equie nú rlu'cuhua nú rnibiya'hua lubee bene enu nzeli arqui' Jesucristo, nú nibiya'hua lubeella tucu nú niarqui' tsiahua sino que li'ihua rqui'ña nu acahua tucu ejemplu lubeella. 4Nu chenu riña Jesucristo stucu bese, li'inu enu rnibiya' lua'ahua che ati'hua premio nú chiqui' ñia neca nú leca bichia nú laxu. 5Le'ca esquie li'ihua bee bene enu nere'ne', uzu'cu'hua nú rni bee bene uxu. Yehua masia bee niyu e'ne' urre bee bene uxu aca lle'na rqui'hua, uzu'cu'hua nú rni bee sa'hua: Xne la ri'i Diose caso bee bene enu reca nelliñia, pero rri'i nze'canu lubee bene enu reca lle'na arqui'. 6Enze'e aca lle'na arqui'hua lu Diose, li'ihua enu rlu'cu ye nú rnibiya' para nú ri'inu nú aca neca equiehua nu zucu' ayanu li'ihua chenu riña bichia ze'e. 7Utsa'nahua ye nú nzenu arqui'hua lu Diose, xne li'inu la tsana' arqui'nu li'ihua. 8Ucua'a tsiñiahua nu ubi'yahua li'ihua, xne beze'lu enu rlee luhua neca tucu nú neca bichiee enu rlia'na' nu rcua'na nú acu, scua enzee beze'lu rcua'nai ti ri'i ana lu. 9Enze'e la tsana'hua nu ri'i beze'lu ana luhua utsuta' arqui'hua lunú nzeli arqui'hua, xne li'ihua nediya'hua nú diqui lu iliulabe le'ca scua nehuana seca beelá bee sa'hua enu nzeli arqui' Jesucristo. 10Pero chenu udete nu nehuana secahua scua lle'na tiembu, chequie equie beenú nehuana secahua scua ri'i Diose elietsa luhua para nú nzequieehua nu rcua'nahua nú huañihua tucu nú niarqui'nu, nu chiuca tsu arqui'hua cuna nú tsuta' arqui'hua, sin nú za' arqui'hua chequiehua inziu'nu, nu le'ca li'inu necanu Diose enu rri'i elietsa lua'ahua lu ye nú se'ca'ahua, nu ucañilanu lia'ahua para nú chu'uhua elu chiqui' ñia rnaa nzucunu nu leca bichia nú laxue xne neca tucutsia'ahua cuna Jesucristo. 11Nu chiqui' neli neca nú lu'cua'ahua ula'na lunu, xne li'itsianu necanu enu rlu'cu nú rnibiya' diqui tiembu. Amén. 12Silvano enu neca sa'ahua enu nediyaa nú nehuañi tucu nú niarqui' Diose, li'illa uri'illa faura nú uquie'ella carta quie' para nú nia luhua chiucu chuna bedichia' nu nia bezete' luhua, cuna nú le'ca ixiule'a luhua nú chiqui' seca Diose lia'ahua. Enze'e le'ca scua uzecahua Diose cuna bee sa'hua. 13Bee bene enu nzeli arqui' Jesucristo cuna bee bene enu ucañi Diose tucu nú ucañinu li'ihua, li'ibeella enu nucua'a ca'a elu le'ca rniru Babilonia, xe'la beella saludo luhua, le'ca esquie Marcos enu rlucua xi neca tucu endua, xe'lalla saludo luhua. 14Uri'ihua saludar bee sa'hua cuna eluseca nú rlu'cuhua. Diose liqui' nú nzuxe arqui'hua, li'ihua enu neca tucutsia cuna Jesucristo. Amén.

will be added

X\