1~Pedro 4

1Enze'e tucu nú nehuana ulle'ca Jesucristo, le'ca scua rqui'ña nú nehuana zecahua. Xne equie nú nehuana zeca bene scua sana' arqui' bene bee dula, 2para nú ri'illa tucu nú riu' arqui' Diose diqui lunú nehuañilla, luhuare nú ri'illa lunú necha neca rle'lla. 3Li'ihua huaxi tiembu uhuañihua tucu nú uhuañi bee bene enu la chulu Diose. Uhuañitsiahua tucu nú niarqui'tsiahua cuna tucu nú necha neca rle'hua, ulluchi'hua nu uri'ihua eliñi nú lecaxi zibi', ulluchi'tsiahua hasta elu niarqui'hua, nu udete'hua ula'na lu beenú la neca diose nú xiña arqui' Diose. 4Pero nee lunú la chequiehua nú huañihua tucu nú uhuañi bee bene enu rri'i scua, chequie nzenu arqui'beei lu cuenda'hua nu se'ta beei li'ihua. 5Pero li'ibeei rqui'ña nú dete'beei cuenda lu Diose lunú uri'ibeei, li'inu enu nzu para nú hualue lu cuenda' bee bene enu nehuañi cuna lu cuenda' bee bene enu unguti. 6Xne le'ca ubene' bee bene enu unguti Stichia' Diose chenu uhuañi beella lu iliulabe quie', añinzuca nú unguti beella xi unguti beelá bee bene iliulabe, pero para Diose nehuañi beella equie cuenda' espíritu' beella. 7Nee nze'ta axula nú laxu iliulabe. Enze'e ude'te' llie'ehua elliebacu'hua nu ucua'a tsiñiahua para nú acahua nacu'hua lu Diose diquinu' arqui'hua. 8Nu la zañi'hua nú zecahua bee sa'hua tucu nú rialane, xne eluseca cua' neca nú rri'i elietsa nu la duche'hua liñi arqui'hua nú rlehua lubee bene añinzuca nú huaxi beenú necha neca rri'inu beei li'ihua. 9Ude'tehua elu ya'na bee sa'hua enu rriña ni'hua sin nú leehua lubeella. 10Cada tucuhua lia uliqui' Diose lunú recahua para nú ri'ihua lunú rqui'ña ri'ihua, enze'e uri'ihua elietsa lubee sa'hua lunú acahua ri'ihua para nú acachee nú rri'icahua tucu nú riala nú ri'ihua cuna lunú lia uliqui' Diose lunú recahua. 11Tunu nu' tucuhua enu rlu'cu nú lia udete' Diose nú recalla para nú zete'lla bee sa'lla, rqui'ña nú zete'lla tucu nú neca Stichia' Diose. Le'ca enu rlu'cu lunú lia udete' Diose lunú recalla para nú ri'illa elietsa lubee sa'lla, rqui'ña nú du'lla juerza'lla lunú lia udete' Diose lulla para nú ri'illa elietsa lubee sa'lla. Ye nú rri'ihua uri'i nze'cahua para nú ni nze'ca bee bene lu Diose equie cuenda' Jesucristo, li'inu enu riala ula'na cuna elurnibiya' diqui tiembu. Amén. 12Bee sa'a enu nzeli arquia'ahua Jesucristo enu chiqui' se'ca, la lliquihua equie nú chiqui' nehuana secahua xne nucua' neca tucu prueba para li'ihua, la chenu arqui'hua equie nú secahua scua. 13A'la ñia utsu arqui'hua chenu nu' nú nehuana secahua tucu nú nehuana ulle'ca Jesucristo para nú le'ca ñia tsu arqui'hua lañi'hua ellie' Jesucristo bichia nú riña zecanu stucu bese. 14Ñia nza lu cuenda'hua chenu rquiexu bee bene li'ihua equie nú nzequiehua Jesucristo, xne ye bichia nzu Espíritu Santo' Diose cuna li'ihua. Li'inu enu rlu'cu nú rnibiya'. 15Lecaxi zibi' nú nehuana secahua, tunu unguutihua bene urre rri'ihua eluhuana', urre rri'ihua nú necha neca, urre riu'uhua elu la yala nú chu'uhua. 16Pero tunu nu' bene enu nehuana seca equie nú nzequiella Jesucristo, la yala nú tu'lla sino que a'la dete'lla che'tsa lu Diose equie nú necalalla bene'nu. 17Uri'ihua beya' nú sela Diose nú nehuana seca bee bene'nu para nú ninu lubeella, tunu lia'ahua nú neca'ahua bene'nu nu se'ca'ahua scua, ¿xa zeca bee bene enu la niarqui' zucu' bedichia' nze'ca' Diose che? 18Tunu li'i bee bene enu neli nzequie inziu' Diose chiqui' huaxi nú nehuana zeca beella para nú riña beella lu Diose, ¿xa zeca bee bene enu rri'i dula cuna bee enu la du' equie nú rni Diose che? 19Enze'e bee bene enu sana' arqui' Diose lunú nehuana seca beella, rqui'ña nú che ri'ilá beella lunú neca nze'ca, nu tsa'na beella espíritu' beella ya Diose, li'inu enu ureche'e lia'ahua nu siempre sa'alunu stichia'nu.

will be added

X\