1~Juan 5

1Ye bee bene enu nzeli arqui' nú neca Jesuse Cristo enu uxe'la Diose, neca beella lli'ñi Diose; nu bee bene enu seca Diose Pa'ahua le'ca seca beella bee lli'ñinu. 2Chenu se'ca'ahua Diose nu rria'ahua lunú rnibiya'nu nú ria'ahua, che rria'ahua beya' nú se'ca'ahua bee lli'ñinu. 3Equie nú seca bene Diose neca nú rri'i bene tucu nú rnibiya'nu; nu laca neriña' nu ri'i bene tucu nú rnibiya'nu. 4Xne ye bee bene enu neca Lli'ñi Diose nu' modo nú ri'i beella ana lu beenú necha neca nu' lu iliulabe quie'. Nu equie nú nzeli arquia'ahua Jesuse enu neca Cristo scua rria'ahua ana nú la ria'ahua beenú necha neca nu' lu iliulabe quie'. 5Xne enu nzelítsia arqui' nú neca Jesuse Lli'ñi Diose, li'illa nu' modo nú rri'illa ana lubee nú necha neca nu' lu iliulabe quie'. 6Nu Jesucristo ube'tanu lu iliulabe nu urinzanu cuna nú uri'chia rene'nu; lá rinza tsianu le'ca uri'chia rene'nu lu cruse. Nu le'ca li'i Espíritu Santo neca testigo lu cuenda' bee nucua', nu li'inu rninu puro nú neli neca. 7Xne nu' chuna enu neca testigo liñibe: Diose Pa'ahua, Jesucristo, nu Espíritu Santo; nu lu yuna beenu neca tucutsia Diose. 8Nu le'ca nu' chuna testigo lu yuu: Espíritu Santo, cuna nú urinza Jesucristo, cuna nú uri'chia rene'nu lu cruse; nu lu yunanu neca tucu necatse beenu. 9Nee tunu nzeli arquia'ahua lunú rni bee bene lua'ahua; máse rqui'ña nú chili arquia'ahua lunú rni Diose equie cuenda' Lli'ñinu Jesucristo, xne másela seca stichia'nu. 10Bene enu nzeli arqui' Jesucristo Lli'ñi Diose, li'isilla nzeli arqui'lla lunú uni Diose lu cuenda'nu, pero bene enu la chili arqui' Diose, rni stichia' nze'e nú neca Diose enu niquichia' xne la chili arqui' nze'e lunú uni Diose lu cuenda' Lli'ñinu Jesucristo. 11Nu lunú uni Diose neca nú uliqui'lanu elunehuañi nú leca xunga laxu, nu elunehuañi cua' nze'ta equie cuenda' Lli'ñinu Jesucristo. 12Bene enu neca tucutsia cuna Jesucristo Lli'ñi Diose, li'isilla rlu'culla elunehuañi nú leca xunga laxu lu Diose; pero bene enu la neca tucutsia cuna li'inu, la lu'cu nze'e elunehuañi cua'. 13Rquie'a ye bee nucua' luhua li'ihua enu nzeli arqui' Jesucristo Lli'ñi Diose, para nú ri'ihua beya' nú rlu'cuhua elunehuañi nú leca xunga laxu lu Diose. 14Nzu arquia'ahua nú riene' Diose tunu nacua'ahua lunu tucu nú riu' arqui'nu. 15Nu lunú nediya'ahua nu rri'i Diose caso stichia'ahua chenu nu' nú rnacua'ahua lunu, le'ca nzuta' arquia'ahua nu li'inu liqui'nu lunú unacua'ahua lunu. 16Tunu nu' tátucua'ahua enu nediya' nú rri'i tucua'ahua dula nu la yala nú atilla, rqui'ña nú nacu'hua lu Diose equie cuenda'lla, nu scua dete' Diose elunehuañi nú leca xunga laxu lulla tunu la ri'illa dula nú riala nú atilla. Xne nu' dula nú riala nú ati bene, nu la nia luhua nú nacu'hua lu Diose equie cunda' bene enu rri'i dula cua'. 17Ye beenú necha neca, neca dula, pero nu' dula nú la yala nú ati bene. 18Lia'ahua nediya'ahua nu bee bene enu neca Lli'ñi Diose, la chequia' beella nú rri'i beella dula; xne Jesucristo lli'ñi Diose neca enu rriucu li'ibeella, nu la nibiya' beze'lu lubeella. 19Nediya'ahua nú neca'ahua bene' Diose, pero beelá bee bene iliulabe enu la neca bee bene' Diose beze'lu neca enu rnibiya' lubeei. 20Nu le'ca nediya'ahua nú Jesucristo neca Lli'ñi Diose, nu ube'talanu lu iliulabe nu uxa'lanu lunú neca elliebacua'ahua para nú chulua'ahua enu mero neca Diose. Lia'ahua nehuañia'ahua cuna li'inu nu cuna Lli'ñinu Jesucristo. Nu li'inu necanu mero Diose, nu equie cuenda' li'inu nu' elunehuañi nú leca xunga laxu. 21Bee lli'ñia ubi'yahua li'ihua lu xitse nú nzeli arqui' bee bene nú rnibeei neca diose. Amén.

will be added

X\