1~Juan 4

1Bee sa'a enu chiqui' se'ca, li'á nia luhua nú la chili arqui'hua titse bee bene enu rni nú rni Stichia' Diose, rluti uri'inze'cahua beya' tunu neli nú rnilla Stichia' Diose urre lia rnilla, xne lu iliulabe enzee huaxi bee bene enu niquichia', nu rnibeei nú rnibeei Stichia' Diose. 2Nee, para nú ri'ihua beya' ta enu neli rni Stichia' Diose: neca beella enu neli nzeli arqui' nú ube'ta Jesucristo lu iliulabe xi neca tucu bene, enu nzeli arqui' scua nzu Espíritu Santo' Diose cuna li'illa. 3Pero bee bene enu la chili arqui' nú neca Jesucristo Lli'ñi Diose enu ube'ta lu iliulabe, la nzu Espíritu Santo' Diose cuna li'ibeei, nu li'ibeei neca beei enu rlee lu Jesucristo. Li'ihua ubene'hua nú rqui'ña nu nze'ta tucu enu rlee lu Jesucristo lu iliulabe quie', nu desde nee nucua'ala huaxi enu rana arqui' Jesucristo lu iliulabe quie'. 4Pero li'ihua bee lli'ñia, necalahua Lli'ñi Diose, nu bee enu rana arqui' Jesucristo la ria' bee nze'e ana luhua, xne máse llene neca lunú rnibiya' li'inu enu nzu cuna li'ihua luquela nú rnibiya' bee enu nchiñi lu inziu nú necha neca. 5Bee enu rlee lu Jesucristo rri'itsia beei elliebacu' lunú nu' lu iliulabe, nu puro beenú nu' lu iliulabe rnibeei nu bee enu la chili arqui' Jesucristo rri'i caso lunú rnibeei. 6Pero lia'ahua necala'ahua bee bene' Diose. Nu bee bene enu nu'lu Diose riene' lunú rnia'ahua; nu bee bene enu la chulu Diose ni teme' la ri'ibeei caso lunú rnia'ahua. Scua rria'ahua beya' nú ta enu nehuañi cuna Espíritu Santo nu sete' nú neli neca, cuna enu nehuañi cuna espíritu nú sete' puro lunú la neli neca. 7Bee sa'a enu chiqui' se'ca, rqui'ña nú zeca'ahua bee sa'ahua, xne eluseca quie' nze'ta lu Diose. Ye bee bene enu seca bee sa' li'ibeella neca beella Lli'ñi Diose nu nu'lu beella li'inu. 8Nu bee bene enu la zeca bee sa' la chululla Diose, xne lu Diose nze'ta eluseca. 9Ulube' Diose nú secanu lia'ahua, enze'e añinzuca nú tucutsia Lli'ñinu Jesucristo pero uxe'lanu Lli'ñinu lu iliulabe para nú lu'cua'ahua elunehuañi lunu equie cuenda' Lli'ñinu. 10Diose seca lia'ahua: nu la necane nú rlutia'ahua se'ca'ahua Diose, li'inu rlutinu secanu lia'ahua enze'e uxe'lanu Lli'ñinu Jesucristo para nú ungutinu equie cuenda' stula'ahua, nu scua nu' nú rri'i Diose perdona lia'ahua. 11Bee sa'a enu chiqui' se'ca, li'á nia luhua tucu nú seca Diose lia'ahua, le'ca scua rqui'ña nú zeca'ahua bee sa'ahua. 12Añinzuca nú lecati lañi' Diose, pero tunu se'ca'ahua bee sa'ahua rlube' nucua' nú nehuañia'ahua cuna Diose, nu neli se'ca'ahua li'inu. 13Lia'ahua nediya'ahua nú nehuañia'ahua cuna Diose nu li'inu nzunu cuna lia'ahua, xne uliqui'lanu Espíritu Santo'nu lua'ahua. 14Nu li'iru bee apóstol ulañi'ru Jesucristo Lli'ñi Diose, nu rixiule'eru luhua nú Diose Pa'ahua uxe'lanu Lli'ñinu para nú tsila'anu ye bee bene. 15Tatse bee enu rni nu nzeli arqui' nú Jesucristo neca Lli'ñi Diose nehuañilla cuna Diose, nu nehuañinu cuna li'illa. 16Lia'ahua rria'ahua beya' nu nzeli arquia'ahua nú seca Diose lia'ahua. Nu equie cuenda' li'inu nze'ta nú se'ca'ahua bee sa'ahua nu enu nehuañi cuna eluseca cua' nehuañilla cuna Diose, nu nehuañinu cuna li'illa. 17Tunu neli nú nediya'ahua nú seca Diose lia'ahua lu iliulabe quie', la lu'cua'ahua ni' tucu nú lliquia'ahua para bichia chenu hualunue lu cuenda' bee bene equie nú neca tucutsia'ahua cuna Diose, tucu nú neca tucutsia Jesucristo cuna Diose. 18Elu nu' eluseca' Diose leca' nú lliqui bee bene. Xne enu neli nzequiee eluseca' Diose lecaxi lliquilla, pero enu la chequiee eluseca cua' xiquilla, xne rri'itsialla elliebacu' xi castiya riala nú zecalla. Enze'e tunu nu' enu xiqui rlube' nucua' nu neli la chequiella eluseca' Diose. 19Lia'ahua se'ca'ahua Diose xne li'inu rlutinu secanu lia'ahua. 20Tunu nu' bene enu rni: “Nu secalla Diose”, nu rana arqui'lla bee sa'lla, necatsialla tucu enu niquichia'. Xne tunu la zecalla bee sa'lla enu rlañi'lla, ¿xa modo zecalla Diose enu la lañi'lla? 21Le'ca li'i Jesucristo uninu: nú enu seca Diose rqui'ña nú le'ca zecalla bee sa'lla.

will be added

X\