1~Juan 3

1Ubi'yacuruhua chiqui' llene neca nú seca Diose Pa'ahua lia'ahua. Enze'e nu' modo nú chiu'ulea'ahua lli'ñinu, nu neca'ahua lli'ñinu. Pero bee bene enu la chequie inziu' Diose la chulu beei lia'ahua xi neca Lli'ñi Diose, xne la chulu beei li'inu. 2Bee sa'a enu nzeli arquia'ahua Jesucristo enu chiqui' se'ca, li'á nia luhua nú necala'ahua Lli'ñi Diose. Añinzuca nú la ria'ahua beya' xa aca'ahua chenu nze'ta Jesucristo stucu bese, pero nzuta' arquia'ahua nú aca'ahua tucu nú necanu xne bichia ze'e neli lañia'ahua li'inu tucu nú rnaanu. 3Nu ye bee bene enu nzeli arqui' nú scua acane, sucu'lu beella nú huañi beella nú la lu'cu beella dula, tucu nú necanu enu la lu'cu dula. 4Pero ye bee bene enu la ri'i tucu nú rnibiya' Diose li'ibeei rri'ibeei dula, xne dula neca tunu la ri'i bee bene tucu nú rnibiya' Diose. 5Li'ihua nediya'hua nú ube'ta Jesucristo lu iliulabe para nú huanu dula arqui' bee bene, nu la lu'cunu ni' tucu dula. 6Enze'e bee bene enu neca tucutsia cuna Jesucristo, rla'na beella nú la ri'i beella dula. Pero ye bee bene enu siempre rri'i dula, la ri'ibeei beya' ti necanu nu la chulu beei li'inu. 7Bee lli'ñia li'á nia luhua nú la zelahua nú titse zequienu li'ihua, xne enu rri'i lunú niarqui' Diose la nzu elliebacu'lla nú ri'illa dula, tucu nú neca Jesucristo enu la lu'cu dula. 8Pero bene enu siempre rri'i dula neca nze'e bene' beze'lu, xne tucutsia beze'lu neca enu rri'i dula hasta chenu uquixie iliulabe, nu Jesucristo Lli'ñi Diose ube'ta lu iliulabe para nu uri'inu ana lunú rri'i beze'lu. 9Enze'e ni' tucu bene enu nzequie inziu' Diose la zucu'lulla nú ri'illa dula, xne nehuañila Espíritu' Diose cuna li'illa, nu la yala' nú ri'illa dula xne necalalla Lli'ñi Diose. 10Chee rlube' nú ti neca bee Lli'ñi Diose nu ti neca bee lli'ñi beze'lu, xne tatse enu la ri'i tucu nú niarqui' Diose urre la zecalla bee sa'lla la aca nze'e Lli'ñi Diose. 11Nu li'ihua desde chenu uyalí arqui'hua Jesucristo, ubene'la'hua nú rqui'ña nú zeca'ahua bee sa'ahua. 12La yala nú ria'ahua tucu nú uri'i Caín, uzelai nú unibiya' beze'lu lui nú unguuti bichi. Uri'i scua xne uri'itsiai puro nú necha neca, nu bichii uri'i nú neca nze'ca. 13Enze'e bee sa'a enu nzeli arquia'ahua Jesucristo, la chenu arqui'hua tunu rana arqui' bee bene iliulabe li'ihua equie nú nzequieehua inziu' Diose. 14Lia'ahua nediya'ahua nú la neca'ahua xi neca bene enu unguti para Diose xne rlucula'ahua elunehuañi lunu, equie nú se'ca'ahua bee sa'ahua. Pero bene enu la zeca beesa' li'illa necasca'lla xi neca bene enu unguti lu Diose. 15Ye bee bene enu rana arqui' bee sa' neca nze'e xi neca tucu enu ruuti bene, nu li'ihua nediya'hua nú enu ruuti bene li'illa la lu'culla elunehuañi nú leca xunga laxu lu Diose. 16Lia'ahua nediya'ahua nú seca Jesucristo lia'ahua xne ungutinu equie cuenda'ahua; nee le'ca scua equie nú se'ca'ahua bee sa'ahua lecaxi ri'i mase atia'ahua equie cuenda' bee sa'ahua. 17Pero tunu nu' tatucuhua enu neca xene lu iliulabe quie' nu lañi'lla tucu sa'lla enu seca elitsi, nu la ri'illa elietsa lu bene ze'e, ¿xa modo nilla nú rlu'culla eluseca' Diose che? 18Enze'e bee lli'ñia, li'á nia luhua nú la ni'tsiahua nu rnia'ahua nú se'ca'ahua bee sa'ahua, rqui'ña nú lubea'ahua nú se'ca'ahua bee sa'ahua cuna lunú rria'ahua. 19Xne tunu se'ca'ahua bee sa'ahua che ria'ahua beya' nú sucua'ahua nú rni Stichia' Diose, nu nzuta' arquia'ahua nú rria'ahua tucu nú rialane lunu. 20Pero tunu rri'ila'ahua tucu nu rialane scua nu si'sca'ahua nu lasca' ria'ahua tucu nú neli neca, rqui'ña nú ria'ahua beya' nú llenela neca Diose lua'ahua, nu li'inu nediya'nu yeene. 21Enze'e tucu nú se'ca li'ihua, li'á nia luhua tunu si'ahua nú rria'ahua nu neca nze'ca, che nzu ta' arquia'ahua nú rria'ahua tucu nú neli neca lu Diose. 22Scua liqui'nu ye nú rnacua'ahua lunu, equie nú sucua'ahua nu rria'ahua lunú rnibiya'nu cuna nú rria'ahua lunú riu' arqui'nu. 23Nu lunú rnibiya' Diose nú ria'ahua necane nú chili arquia'ahua Jesucristo Lli'ñi Diose, nu zeca'ahua bee sa'ahua tucu nú unibiya'nu nú ria'ahua. 24Bee bene enu sucu' tucu nú rnibiya' Diose nu rri'i beellae, li'ibeella nehuañi beella cuna Diose nu li'inu nehuañinu cuna li'ibeella. Nu nediya'ahua nú nehuañinu cuna lia'ahua, equie cuenda' Espíritu Santo nú uliqui'lanu lua'ahua.

will be added

X\