1~Juan 2

1Bee lli'ñia, rquie'a bee bedichia' quie' luhua para nú la ri'ihua dula. Pero tunu nu'hua enu rri'i dula, rlu'cua'ahua tucu enu rni lu cuenda'ahua lu Diose, nu li'inu necanu Jesucristo enu leca xunga uri'i dula. 2Equie nú unguti Jesucristo, nu' nú rri'i Diose perdona stula'ahua. Nu la acane equie cuenda' stula'tsia'ahua, le'ca necane lu cuenda' stula ye bee bene iliulabe. 3Lia'ahua nediya' nze'ca'ahua tunu sucua'ahua Stichia' Diose, che nzu arquia'ahua nú itá nulu'la'ahua li'inu. 4Pero tunu nu' enu rni: “Li'á nu'lua Diose”, nu la zucu'lla stichia'nu, necalla enu niquichia', xne la chequieella lunú neli neca. 5Pero enu sucu' Stichia' Diose diquinu' arqui' neli secalla li'inu. Scua nediya'ahua nú neca'ahua bene'nu. 6Tatse bene enu rni nú neca bene' Diose, rqui'ña nú huañilla tucu nú uhuañi Jesucristo. 7Bee sa'a enu nzeli arquia'ahua Jesucristo, bee bedichia' nú rnia luhua nee la necuqui necane, le'ca li'i bedichia' quie' neca stichia' Jesucristo nú ubene'la'hua hasta hua'tu. Le'ca li'i bedichia' quie' neca nú rnia luhua nee. 8Pero rnia bee bedichia' quie' luhua xi neca tucu nú necuqui neca, xne sianu necane equie cuenda' Jesucristo urre necane equie cuenda' li'ihua, rlube' nucua' nu neli necane xne nze tsana' arqui'lahua inziu nú necha neca nu nzequiehua lunú neca nze'ca. 9Tunu nu' enu rni nú nzequieella inziu' Diose nu rana arqui'lla bee sa'lla, li'illa nzequieesca'lla inziu nú necha neca. 10Enu seca bee sa' li'i silla neli nzequieella inziu' Diose, scua leca modo nú ri'i dula ana lulla. 11Pero bene enu rana arqui' bee sa' li'illa nehuañilla lunú necha neca, nu nzequiella nú necha neca cua', sin nú ri'illa beya' cá enza nzalla, xne utsa'na nú necha neca cua' li'illa leta rula' xi neca tucu bene enu la bi'ya. 12Rquie'a carta quie' luhua bee lli'ñia, xne unga perdonala stulahua equie nú rlu'cuhua ula'na lu Jesucristo. 13Rquie'a carta quie' luhua li'ihua bee uzana, xne nu'lulahua Jesucristo enu nzula hasta chenu lasca' quixie iliulabe. Le'ca rquie'a carta quie' luhua li'ihua bee bene enu nere'ne xne uri'ihua ana nú la ria'hua nú necha neca nze'ta lu beze'lu. Rquie'a bedichia'quie luhua li'ihua bee endu', xne nu'lulahua Pa'ahua Diose. 14Rquie'a bedichia' quie' luhua li'ihua bee uzana, xne nu'lulahua Jesucristo enu nzula hasta chenu lasca' quixie iliulabe, nu le'ca rquie'a bedichia' quie' luhua li'ihua bee enu nere'ne', xne rdu'hua ana arqui'hua nu neli nzequieehua Stichia' Diose, nu uri'ihua ana nú la ria'hua nú necha neca nze'ta lu beze'lu. 15La le'hua nú ri'ihua lunú necha neca rri'i bee bene lu iliulabe quie' ni'bee nú nu' lu iliulabe. Tunu nu' enu máse seca lunú nu' lu iliulabe, nu la zeca nze'e Pa'ahua Diose. 16Xne ni' tucu nú necha neca nu' lu iliulabe quie' la ye'ta nucua' lu Diose, nze'ta tsia nucua' le'ca lubee bene iliulabe. Nu ninguie' neca lunú necha neca rri'i bee bene iliulabe. Ri'illa tucu nú necatsia elliebacu'lla, nu rle'lla nú lu'culla ye lunú rlañi'lla cuna nú reca nelliñalla lunú rlu'culla. 17Pero iliulabe tucu bichia laxue cuna ye beenú necha neca rri'i bee bene. Pero enu nehuañi tucu nú niarqui' Diose, lu'culla elunehuañi nú leca xunga laxu cuna li'inu. 18Bee lli'ñia, li'á nia luhua nú lacaxea' nzu nú laxu iliulabe. Xne ubene'la'hua nú rqui'ña nú riña tucu enu rri'i condra Cristo, nu ni nze'e lubee bene nú neca nze'e Cristo, nu nee nucua'ala huaxi enu rri'i condra Cristo, enze'e nediya'ahua nú lacaxea' nú laxu iliulabe. 19Bee enu rri'i condra Jesucristo, uchiu'u beei le'ca leta bee sa'ahua enu nzeli arquia'ahua Jesucristo, pero laca beei mero bee sa'ahua, xne tunu neca beei bee sa'ahua aya'na beei leta bee sa'ahua enu nzeli arquia'ahua Jesucristo. Pero unga nucua' para nú lañi' bee bene nú laca beei bene leta'ahua. 20Uliqui'la Jesucristo Espíritu Santo luhua, nu equie cuenda' Espíritu Santo yehua nediya'hua lunú neli neca. 21Rquie'a bee bedichia' quie' luhua, nu la necane lunú la nediya'hua ta lunú neli neca, sino que lunú nediya'la'huane, xne li'ihua nediya'hua nú la ye'ta ni' tucu bee eluquichia' lunú neli neca. 22Nee, ¿ti neca bene enu niquichia'? Bene ze'e neca enu rni nú la neca Jesuse li'i Cristo. Nucua' rri'i condra Cristo xne la chili arqui' nucua' Pa'ahua Diose, nu ni' Lli'ñinu Jesucristo. 23Xne tatse bene enu rni nú la neca Jesucristo Lli'ñi Diose, li'illa la chululla Diose Pa'ahua. Pero enu rni nú neca Jesucristo Lli'ñi Diose, li'isilla nu'lulla Pa'ahua Diose. 24Enze'e la tsana' arqui'hua bedichia' nú ubene'hua desde nú uquixiehua nú uyali arqui'hua Jesucristo, nu tunu nzequiehua bedichia' nú ubene'hua desde chenu uquixie nú uyali arqui'huane, che si nzequiehua nú nehuañihua cuna Pa'ahua Diose cuna Lli'ñinu Jesucristo. 25Nu ninguie' neca nú ucuaqui u'na Jesucristo, nú liqui'nu lua'ahua elunehuañi nú leca xunga laxu lu Diose. 26Rquie'a bee bedichia' quie' luhua, equie cuenda' bee bene enu rcua'na nú zequienu li'ihua. 27Pero li'ihua nehuañihua cuna Espíritu Santo nú uliqui' Jesucristo luhua, nu la qui'ña nú nu' ti zete' li'ihua, xne le'ca li'i Espíritu Santo neca enu zete' yeene li'ihua, nu puro nú neli zete'nu nu la zete'nu eluquichia'. Enze'e uhuañihua tucu nú rnibiya' Espíritu Santo para nú chequiehua nú neca tucutsiahua cuna Jesucristo. 28Nee bee lli'ñia, li'á nia luhua nú uquia quieehua inziu' Jesucristo, para nú la lliquia'ahua chenu riñanu, nu ni' nú tua'ahua li'inu. 29Li'ihua nediya'hua nú rri'i Diose tucu nú neli neca, nu rqui'ña nú ri'ihua beya' nú ye bee bene enu rri'i tucu nú neli neca, li'ibeella neca beella Lli'ñi Diose.

will be added

X\