1~Corintios 9

1Li'ihua nediya'hua nú nu' beya' ri'á lunú niarquia equie elurnibiya' nú rlu'cua nú necaa apóstol. Li'á ulañilá Jesucristo enu rnibiya' lua'ahua nu li'á uri'ilá ana li'ihua para li'inu xne uchilila arqui'hua li'inu. 2Tunu nu' bee bene enu la chili arqui' nú necaa apóstol, pero li'ihua nediya'hua nú necaa apóstol, xne lunú nzelila arqui'hua Jesucristo nucua' rlube' nú neli necaa apóstol. 3Nu lubee bene enu lachili arqui' nú necaa apóstol singuie rcuaquia lubeella: 4Rlu'cua derecho nú liqui'hua nú acua cuna nú hue'a. 5Nu le'ca nu' beya' nú chiaa cuna tucu una'a enu nzeli arqui' Jesucristo para nú uyalla catse elu nza'a, tucu nú rri'i beela bee apóstol nu cuna bee bichi Jesucristo nu Pedro. 6Nu ¿xie' li'itsia cuna Bernabé rqui'ña nú ri'iru riña' e'curu para nú huañiru, che nu' beya' nú ri'iru riña' Diose la? 7Pero ni'tucu bee sundado enu nza lu xuu la ixiu beei gasto' beei. Nu tucu bene enu rquieni uva, ¿xie' leca modo nú aculla uva nú rquienilla la? Nu bene enu rlu'cu vaca, ¿xie' leca modo nú hue'lla nichi'í la? 8La ri'ihua elliebacu' nú lunú rnia luhua necatsiae elliebacu' e'cua, sino que le'ca lu ley nú udete' Diose lu Moisés rni scua. 9Xne lu ley cua' rni: “La du'hua ixiu lli'i u'na' chenu rri'inuhuaí riña'.” Nu la ni nucua' nú nzenu arqui' Diose equie cuenda' bee nañi, 10sino que le'ca nzenu arqui'nu equie cuenda'ahua. Xne lu ley nú udete' Diose lu Moisés rni: Xne xi neca bene enu ra'na u'na nu enu rcui trigo, rucu beella nzuculu beella nú yucu beella ula'cu equie riña' nú rri'ibeella. 11Nee nú uzete'laru li'ihua nú xneca chenalahua Stichia' Diose, ¿xie' huaxi xe'ta' neca nú rnacu'ru luhua tunu ri'ihua elietsa luru nú xi rqui'ñaru la? 12Tunu stucu bee bene enu sete' li'ihua rati' lunú riala ati' beella nú rdete'hua lubeella, le'ca esquie li'iru máse rqui'ña nú riala ri'ihua elietsa luru, pero mase nú scua rialane lecaxi elietsa unacu'ru luhua, nu rriqui'tsiaru lunú se'caru para nú la quieru'u bee bene nú equie cuenda'tsia' nucua' la zelabeella yene' beella bedichia' nze'ca' Jesucristo. 13Li'ihua nediya'hua nú ye bee ule'ya enu sibi' liñi bee indu, rati' beella lle'na u'na nú nzeyu bee bene liñi indu lu Diose para nú acubeella. Le'ca esquie yebee ule'ya enu sibi' luhuare elu nzeyu bee bene nañi u'na lu Diose, le'ca rati'beella lle'na u'na nú nzeyu bee bene para nú acu beella. 14Le'ca scua uni Jesucristo lubee bene enu rixiule'e bedichia' nze'ca'nu, nú bee bene enu sete' beella stichia'nu, riala dete' nú xi rqui'ña beella, 15pero lua lecali xi elietsa rri'ihua, nu le'ca la quie'a cartaquie' luhua para nú xi liqui'hua lua. Xne para li'á máse neca nze'ca nú atia luhuare nú nu' enu axi nú ñia nzu arquia, lunú setea bee bene bedichia' nze'ca' Jesucristo. 16Nu la nelliñiaa equie nú setea bee bene bedichia' nze'ca' Jesucristo, xne nucua' riala nú ri'á. Nu cue'a tunu la ixiule'a bedichia' nze'ca quie' lubee bene. 17Enze'e tunu rri'á riña' quie' nú riu'tsia arquia che atia lunú liqui' Diose lua, pero lá cañia nú ri'á riña' quie' pero nucua' utsula Diose li'á nú ri'á. 18Nu lunú rri'á ana neca nú ñia nzu arquia equie nú rixiule'a bedichia' nze'ca' Jesucristo lubee bene, nu lecaxi ri'á ana, tucu nú rri'i stucu bene enu rixiule'e bedichia' nze'ca' Jesucristo ana. 19Mase nú lecati rnibiya' lua lunú rri'á, pero ca'a nzua para nú sibi'a lu ye bee bene para nú ri'á ana nú aca huaxila bee bene' Jesucristo. 20Nu chenu nzucua'a cuna bee bene Israel, nehuañia tucu nú nehuañi beella para nú ri'á ana nú aca beella bene' Jesucristo. Chenu nehuañia cuna beelá bee bene enu neli nzenala ley nú udete' Diose lu Moisés. Che nehuañia tucu nú nehuañi beella, para nú ri'á ana nú aca beella bene' Jesucristo, mase nú nediya nu la nibiya' ley cua' lua. 21Nu chenu nzucua'a cuna bee bene enu laca bee bene Israel, bee enu la chenala ley, nehuañia tucu nú nehuañi beella para nú ri'á ana nú aca beella bee bene' Jesucristo, mase nú nediya nú Diose neca enu rnibiya' lua xne nehuañia tucu nú rnibiya' Jesucristo. 22Chenu nzua cuna bee bene enu nzu chiucu arqui' equie nú xi racu, rla'naa nú rri'á tucu nú rri'i beella para nú ri'á elietsa lubeella nú acabeella bene' Jesucristo. Nu catse elu nza'a rri'á tucu nú rri'i beella, che scua tucu modo urre stucu modo ri'á ana nú tsila'a chiucu chuna beella equie cuenda' Jesucristo. 23Ye bee nucua' rri'á equie eluseca nú rlu'cua equie cuenda' bedichia' nze'ca' Jesucristo, para nú li'á cuna ye bee bene enu nzeli arqui' Jesucristo, iguale atia'ahua lunú xi liqui' Diose lua'ahua. 24Li'ihua nediya'hua nú chenu riecaxu'u huaxi bene, tucutsia enu riecaxu'ulá nze'e rri'i ana premio. Enze'e le'ca nee udu'hua ana arqui'hua para nú ati'hua premio nú liqui' Diose luhua. 25Ye bee bene enu riecaxu'u rdu' beei ana arqui'beei para nú lecaxi rcaa nú yecaxu'u beei, rri'i beei scua para nú ati' beei tucu premio, pero rnitilu premio cua', pero lia'ahua rria'ahua scua para nú atia'ahua tucu premio nú leca xunga nitilu. 26Nu li'á nediya nze'caa lunú rri'á, nu la ri'á xi rri'i tucu bene enu nzexu'u nu la ri'i beya' cariña. Le'ca la ri'á xi rri'i tucu bene enu la ri'i beya' ca richiu penete. 27Para nú aca ri'á lunú riala ri'á xne canu li'á enu setea bee bene bedichia' nze'ca' Jesucristo lecaxi atia ante Diose.

will be added

X\