1~Corintios 7

1Nee cuaquia luhua beenú unedichia'hua lua lu carta nú uxe'lahua lua. Li'á nia luhua nú neca nze'ca nú la yucu bene una'a. 2Pero para nú la ri'i bee bene eluhuexe, nzala nú cada niyu yucu una'a nu cada una'a yucu niyu, 3nu cada niyu riala ri'i cumplido lunú niarqui' una'lla nu cada una'a riala ri'i cumplido lunú niarqui' niyu'lla. 4Xne chenu uchiala una'a la nibiya'lla lu cuerpo'lla, sino que niyu'lla rnibiya' lu cuerpo'lla. Le'ca esquie niyu la nibiya'lla lu cuerpo'lla, sino que una'lla neca enu rnibiya' lu cuerpo'lla. 5Enze'e la yala nú cá niyu urre una'a cuerpo'lla lu sa'lla; pero tunu ruculla necatucunecatse stichia'lla nú la na'tsella sa'lla chiucu chuna bichia, para nú nacu' beella lu Diose. Lecaxi ri'i pero chenu udetela bee bichia ze'e, chu cua'anu zeca bene sa' bene, para nú la du' beze'lu elliebacu' nú necha neca equie bene. 6Ye nú rnia luhua necane tucu bezete'tsia, nu la nibiya'a luhua nú ri'ihua tucu nú rnia. 7Niarquia nú ala' ye bee bene nchiñi elliebacu' xi nchiñi elliebacua, pero cada tucu bene udete'la Diose elliebacu'lla nú xa huañilla, tunu chialla urre la chialla. 8Para bee bene enu lá chiali nu para bee una'a enu unguti niyu', li'á nia nú neca nze'ca nú la chiahua tucu nú lá chiaa. 9Pero tunu la riqui'hua nú nzu tucuhua, máse neca nze'ca nú uchia'hua luhuare nú rriqui'hua nú la lu'cuhua niyu urre una'a. 10Nu bee bene enu nechiala, la neca li'á enu rnibiya' luhua sino que Jesucristo neca enu rnibiya' nú la le'e una'a niyu'lla. 11Pero tunu le'e una'a niyu'lla la yala nú yuculla stucu niyu, máse neca nze'ca nú tsalalla arqui' sa'lla para nú yucu sa'zecalla. Nu le'ca esquie niyu la yala nú le'ella una'lla. 12Nee nú nia necatsia bezete' nú rnia, la necane stichia' Jesucristo, tunu tucu niyu enu nzeli arqui' Jesucristo, nechialla tucu una'a enu la chili arqui' Jesucristo pero tunu para li'illa lecaxi ri'i nú nzeli arqui' niyu'lla Jesucristo la yala nú le'e sa'lla. 13Nu le'ca esquie tunu tucu una'a enu nzeli arqui' Jesucristo nechialla tucu niyu enu la chili arqui' Jesucristo, pero tunu para li'illa lecaxi ri'i nú nzeli arqui' una'lla Jesucristo, la yala nú le'esa'lla. 14Xne niyu enu la chili arqui' Jesucristo nu nechia tucu una'a enu nzeli arqui' Jesucristo, ri'i Diose nú nza nze'ca lu cuenda'lla equie nú nzeli arqui' una'lla Jesucristo, nu una'a enu la chili arqui' Jesucristo, le'ca ri'i Diose nú cha nze'ca lu cuenda'lla xne nzeli arqui' niyu'lla Jesucristo. Che Diose ri'i nú cha nze'ca lu cuenda' bee endu' beella. Xne tunu ni'tucu beella la chili arqui'beella Jesucristo, la ri'i Diose nú cha nze'ca lu cuenda' bee endu' beella. 15Pero tunu niyu urre una'a enu la chili arqui' Jesucristo niarqui' beella nú le'e sa'beella, le'esa'la' beella. Nu bene enu nzeli arqui' Jesucristo la yala nú ri'illa juerza nú cua'anu sa'lla, xne la niarqui' Diose nú huañi bee bene cuna xuu. 16Nu le'ca esquie una'a enu nzelila arqui' Jesucristo la ri'ilu beya' tunu ri'ilu ana nú chili arqui' niyu'lu Jesucristo, urre niyu enu nzelila arqui' Jesucristo, la ri'ilu beya' tunu ri'ilu ana nu chili arqui' una'lu Jesucristo. 17Pero nia nú cada tucu bene enu nzelila arqui' Jesucristo, rqui'ña nú huañibeella lu iliulabe quie' tucu nú udete'la Diose lubeella nú huañi beella, nu nucua'a cahua tucu nú necahua chenu ucañi Diose li'ihua. Scua rnibiya'a nú huañi ye bee sa'ahua enu nzeli arqui' Jesucristo. 18Tunu tucu bene nequiela seña nú rquie bee bene Israel chenu uchili arqui'lla Jesucristo, esquietsia ria'nacalla. Nu tunu la nequie seña ze'e li'illa chenu uchili arqui'lla Jesucristo la qui'ña' nú quie seña ze'e li'illa. 19Xne lecaxi ri'i tunu nequie seña cua' bene urre la nequie seña cua' bene, lunú máse neca equie neca nú sucu' bene nú rnibiya' Diose. 20Enze'e necacahua tucu nú necahua chenu uchili arqui'hua Jesucristo. 21Tunu necalu esclavo chenu uquixie nú nzeli arqui'lu Jesucristo, la chenu arqui'lu xneca riala ri'ilu. Pero tunu nu' modo nú ri'ilu ana nú la aca'lu esclavo' stucu bene, ula'na nú la'alu che. 22Bene enu unga esclavo chenu uchili arqui'lla Jesucristo, igualea'la necalla xi neca bene enu lá aca esclavo para nú sibi'lla lu Jesucristo. Nu bene enu la aca esclavo chenu uchili arqui' Jesucristo. Nee enze'e neca xi neca esclavo lu Jesucristo. 23Xne nediya'la'hua nu udixiula Jesucristo lunú huaxi secahua, enze'e necalahua para Diose. Nu la zela'hua nú zequienu bee bene li'ihua nu nibiya'beei luhua. 24Enze'e nialuhua bee sa'a enu nzeli arquia'ahua Jesucristo, nú necacahua tucu nú necahua chenu uchili arqui'hua Jesucristo. 25Nu nee nia luhua bee una'a enu lá chiaa, nu la neca stichia' Jesucristo lunú nia luhua. Sino que necane bezete' nú li'itsia rnia luhua, nu nza nze'calá nú chili arqui'hua tucu nú nia luhua, xne equie nú uhua'a arqui' Diose li'á enze'e ucañinu li'á para nú ri'á lunú niarqui'nu. 26Nu se'ca nú equie nú chiqui' neriña' nehuañi bee bene nee, enze'e nzalá nú la chia bene. 27Nu bene enu nechiala la yala' nú le'ella una'lla. Nu bee bene enu lá chia la chialla. 28Pero tunu rri'illa elliebacu' nú chialla, lacane dula tunu chialla. Le'ca esquie bee una'a e'ne' bee enu niarqui' nú chia lacane dula tunu chia beenchu, pero ixiule'a luhua nú huaxi nú seca bee bene enu xia, nu bee nucua' la niarquia nú zecahua. 29Bee sa'a enu nzeli arquia'ahua Jesucristo nialuhua nú lle'natsia tiembu nehuañihua lu iliulabe quie, enze'e nia luhua bee bene enu nechiala, uzibi'hua lu Diose diquinu' arqui'hua xi sibi' tucu bene enu lanechia. 30Nu bee bene enu nehuana nzu arqui' uri'ihua xi neca nú la nehuana nzu arqui'hua, nu bee bene enu ñia nzu arqui' uri'ihua xi neca nú la ñia nzu arqui'hua, nu bee enu rlu'cu stene' utsu arqui'hua xineca nú la lu'cuhua stene'hua. 31Nu bee bene enu lecaxi seca la'cha' lu iliulabe quie', uri'ihua xi neca nú lecaxi rlu'cuhua, xne ye nú nu' lu iliulabe quie' rlaxue. 32Lu nú niarquia nú la chenu arqui'hua lubee nú nu' lu iliulabe quie', xi neca tucu bene enu nzu tucu nú máse rri'illa elliebacu' lunú neca cuenda' Diose, nu mase rcua'nalla nú ri'illa lunú riu' arqui' Diose, 33pero tucu bene enu nechiala máse rri'illa elliebacu' lunú nu' lu iliulabe quie', nu mase rla'nalla nú ñiatsu arqui' una'lla. 34Che chiucu elliebacu' rri'illa equie cuenda' Jesucristo, nu equie cuenda' una'lla. Le'ca esquie neca lu cuenda' tucu una'a enu nechia, una'a enu la nechia máse rri'illa elliebacu' lunú neca lu cuenda' Diose, nu rdete' cuendalilla li'illa lu Diose para nú zucu'lla nú niarqui' Diose. Pero tucu una'a enu uchiala máse sucu' lulla lunú neca cuenda' iliulabe, máse rcua'nalla nú ñia tsu arqui' niyu'lla cuna li'illa. 35Yebee nú rnia luhua, rnia scua luhua para nú ri'á elietsa luhua, nu la necane nú caa nú chiahua, rnia luhua scua para nú huañihua tucu nú rialane nu tucu nú necane. Tucu nú niarqui' Jesucristo enu rnibiya' lua'ahua nú huañihua, sin nú xi caa nú huañihua scua. 36Titse bee niyu enu niarqui' nú chia, cuna una'a enu neca una'a enu chialla, tunu uza'lanchu lana nú chianchu che chianchu, tunu scua rri'ibeella elliebacu' rqui'ña nú ri'ibeella lunú seca beella nú máse neca nze'ca, xne laca dula nú chiabeella. 37Le'ca esquie titse bene enu la ri'i elliebacu' nú chia, layala nú ri'illa elliebacu' nú rqui'ña nú chialla, nu tunu uri'i italla elliebacu' nú la chialla. Xne le'ca neca nze'ca nú la chia bene. 38Enze'e nia luhua, neca nze'ca nú chia bene, pero másesca'la neca nze'ca tunu la chia bene. 39Tucu una'a enu nechiala la yala nú lu'culla stucu niyu diqui nú nehuañi niyu'lla. Pero tunu unguti niyu'lla nu' modo chialla stucu bese, cuna stucu niyu pero rqui'ña nú necalla tucu niyu enu le'ca nzeli arqui' Jesucristo. 40Pero se'ca nú ñiasca'la huañilla tunu la chia'lla stucu bese. Scua rri'á elliebacu' xne nzu Espíritu Santo cuna li'á.

will be added

X\