1~Corintios 6

1Tunu nu'hua enu rliunu sa' enu nzeli arqui' Jesucristo, xiquie nú nzahua lubee usticia para nú tsuxcua'a nú secahua, luhuare nú chahua lubee sa'hua enu nzeli arqui' Jesucristo. 2¿Xie' lari'ihua beya' nú enta bichia nú bee enu nzeli arqui' Jesucristo neca bee enu lualue lu cuenda' bee bene iliulabe la? Nu tunu li'ihua lualuhua lu cuenda' bee bene iliulabe, xiquie nú lacahua lualuhua lu lle'natsia nú secahua cuna bee sa'hua enu nzeli arqui' Jesucristo. 3¿Xie' la ri'ihua beya' nú hasta bee ángele lualua'ahua lu cuenda' la? ¡Xneca nú la lualua'ahua lu cuenda' bee bene iliulabe quie'! 4Enze'e chenu rliunuhua sa'hua, ¿xiquie nú nzahua lubee bene enu laca bee bene' Jesucristo para nú tsuche' lunú xi secahua? 5Rnia scua luhua para nú tu'hua. ¿Xne xie' letahua leca ni' tucu enu aca lualue lu cuenda' bee sa'hua enu nzeli arqui' Jesucristo chenu nu' xi seca beella la? 6Pero li'ihua chenu rliuhua luhuare nú ri'ihua scua a'la rdete' cuendahua sa'hua lubee usticia, enu la chenala inziu' Diose. 7Chiqui' necha nú rliunu sa'hua. Nzalá nú uriqui'hua lunú xi rri'inu beella li'ihua. Nu mejora nú uyala' beella stene'hua. 8Pero luhuare nú zelahua nucua' a'la li'ihua rcachi'hua bee stene' bee sa'hua, nu rri'inuhua beella beenú la yala ri'inuhua beella. 9¿Xie' lari'ihua beya' nú bee bene enu necha rri'i leca modo chu'u liñibe elurnibiya' Diose la? La zelahua nú zequienu bee bene li'ihua xne elurnibiya' Diose la chu'u bee bene enu rri'i eluhuexe, nu bee enu rlu'cu ula'na lu stucu diose enu laca diose nu bee niyu enu rle' sa' niyu, nu bee niyu enu rna'tse bee una'a enu laca una'a, nu bee una'a enu rna'tse bee niyu enu laca niyu'. 10Le'ca esquie bee huana', nu bee bene enu neyi' rcua'a, bee uniqui nu bee enu se'ta bee bene, nu bee enu rcua'na nú xneca modo axi stene' bee bene, la chu'u bee nze'e elurnibiya' Diose liñibe. 11Nu'hua enu uhuañi scua hua'tu, pero nee leca' xi nahua lu Diose, nu nee necalahua para Diose, nu nebacu'lahua xi neca tucu enu la lu'culi dula ante Diose equie cuenda' poder' Jesucristo nu equie cuenda' Espíritu Santo' Diose nú nehuañi cuna li'ihua. 12Neli nú nu' beya' ri'á yee lunú niarquia pero laca yeene neca nze'cae. Nu nu' beya' ri'á xitse lunú niarquia, pero la neca nze'ca nú zela nú ri'i bee nucua' ana lua. 13Nu' bee bene enu rni: Bee elubacu necane para xla'cu bee bene, nu xla'cu bee bene neca para bee elubacu. Neli nucua', pero nitilu Diose rucu bee nucua', pero laca neli nú cuerpo' bene neca para nú ri'i bene eluhuexe. Xne cuerpo'ahua necane para Diose, nu li'inu necanu enu rnibiya' lu cuerpo'ahua. 14Nu tucu nú uri'i Diose nú uhuañi zeca Jesucristo lu eluti, le'ca scua ri'inu nú huañi zeca'ahua lu eluti cuna poder'nu. 15¿Uri'ihua beya' nú neca cuerpo'ahua xi neca tucu parte cuerpo' Jesucristo. Enze'e leca modo nú na'tse'ahua cuerpo' Jesucristo nú rnia'ahua neca cuerpo'ahua para nú na'tse'ahua una'a huexe? Nu leca modo nú ria'ahua scua. 16Xie' la ri'ihua beya' nú bene enu rna'tse tucu una'a huexe, necabeei xineca tucutsia bene. Li'ihua nediya'hua nú lu ichi' Stichia' Diose rni: “Rucu beei neca beei xi neca tucutsia bene.” 17Pero bee bene enu neca tucu necatse cuna Jesucristo, neca tucu necatsela beella cuna li'inu equie cuenda' Espíritu Santo. 18Enze'e ubi'yahua li'ihua para nú la ri'ihua sa' clasia' eluhuexe cua'. Ye beelá bee dula la nitilu cuerpo' bee bene, xi rnitilu eluhuexe cuerpo' bene. 19Xne uri'ihua beya' nú cuerpo'hua neca indu' Espíritu Santo nú uliqui' Diose luhua, nu lunú nzula Espíritu Santo cuna li'ihua la nibiya' e'cuhua luhua. 20Xne Jesucristo udixiula stulahua chenu ungutinu lu cruse. Enze'e ubi'yahua cuerpo'hua nu la xitse ri'inuhuane xne scua riu' arqui' Diose, xne li'inu rnibiya'nu luhua.

will be added

X\