1~Corintios 5

1Li'á ubenelaa nú tucuhua enu nzeli arqui' Jesucristo nzucunuu naa rrucu' xi neca una'lla, nu ni' bee bene enu la chulu Diose la ri'i sa' clasia' eluhuexe quie'. 2Nu xinu reca nelliñiahua che, luhuare nú aca nelliñiahua, mejora nú nehuana utsu arqui'hua nu uluahua bene enu rri'i scua letahua. 3Mase nú lecaa luhua, pero siempre rri'á elliebacu' li'ihua, xi neca nú nzua cuna li'ihua, nu uri'ilá elliebacu' xa zeca bene enu rri'i dula scua. 4Nia luhua nú uyetesa'hua nu ulu'cu cuendahua xi neca nú li'á nzua cuna li'ihua nu cuna poder' Jesucristo. 5Uluachuhua benecua' letahua. Nu utsa'nahua benecua' ya beze'lu para nú scua nehuana zecalla nu tsi'lla equie cuenda' nú necha rri'illa para nú tsila'a espíritu'lla chenu riña zeca Jesucristo. 6La neca nze'ca nú aca nelliñiahua nu selahua nú nu' sa' dula quie letahua, li'ihua rri'ihua beya' xneca rri'i levadura nú teme'tsiae riu'u equie ecucu nú recache' pá nu rri'i nú sebichi pá. Le'ca scua tunu tucuhua rri'i dula rlañi' bee sa'hua, che chu rri'ilá bee sa'hua scua. 7Enze'e uluachuhua nú necha necacua' letahua xi neca ecucu nú recache' pá nú la lu'cu levadura. Xi neca chenu riñi bene tucu sanchi eliñi baxcu equie cuenda' stula beella, le'ca scua equie cuenda' nú unguti Jesucristo, leca' xi na'ahua lu Diose. 8Nu xneca riala nú ñiatsu arquia'ahua equie cuenda' nucua', necane nú diquinu' arquia'ahua huañia'ahua tucu nú rialane, xi neca pá nú la nucha levadura, luhuare nú necha huañia'ahua equie cuenda' dula xi uhuañia'ahua hua'tu. 9Nu scua tucu nú unilá luhua lu stucu carta nú uxe'la luhua, la yala nú quiete'hua bee bene enu rri'i eluhuexe. 10La nia nucua' equie cuenda' bee bene enu la chili arqui' Diose, bee enu rri'i eluhuexe, enu neyi' rcua'a, bee huana' nu bee bene enu rlu'cu ula'na lu stucu diose enu laca Diose, xne tunu scuane rquiña nú chiu'uhua lu iliulabe quie'. 11Lunú rnia luhua nú la yala quiete'hua bee bene cua', li'ibeei enu rni nú neca sa'hua enu nzeli arqui' Jesucristo, nu necha nehuañi rri'i eluhuexe nu neyi' rcua'a, nu rlu'cu ula'na lu stucu diose enu laca mero Diose nu se'ta bee bene, nu neca uniqui nu huana', bee bene enu nehuañi scua, ni'la yala nú acunuhua beei. 12Nu li'á la yala hualua lu cuenda' bee bene enu laca sa'ahua enu nzeli arqui' Jesucristo, Diose neca enu hualue lu cuenda' beei. 13Pero lunú riala ri'ihua neca nú hualuhua lu cuenda' bee sa'ahua enu nzeli arqui' Jesucristo. Enze'e uluahua niyucua' enu rri'i sa' clasia' dula cua' letahua.

will be added

X\