1~Corintios 2

1Bee sa'a enu nzeli arquia'ahua Jesucristo li'ihua nediya'hua nú chenu uya'a lachihua, unia Stichia' Diose luhua, lá nia luhua bee bedichia' nú neyaañi o bee bedichia' nú neriña' ri'ihua beya', 2mientra nú nzua cuna li'ihua, lá nia stucu nú rene luhua, unitsia luhua tucutsia equie cuenda' Jesucristo para nú ri'ihua beya' xiquie nú ungutinu lu cruse. 3Chenu uriña lachihua necaa tucu nú neca tucu bene enu la lu'cu juerza' nu hasta recatse'tse'a nú xiquia chenu uriña luhua. 4Le'ca chenu unia luhua Stichia' Diose, lá nia luhua bee bedichia' nú ri'á ana li'ihua cuna stichia'a, sino que uri'á ana nú uchili arqui'hua Jesucristo equie cuenda' Espíritu Santo nu cuna poder' Diose. 5Para nú aca achee nú lunú nzeli arquia'ahua Jesucristo necane equie nú reca Diose rri'i nu lacane lunú recatsia elliebacu' bee bene iliulabe. 6Añinzuca nú chenu sete'ahua bee bene enu másela reca Stichia' Diose, sete'ahua beella equie cuenda' elliebacu' nú reca nú nze'ta lu Diose, nu la necane elliebacu' nú reca bee bene iliulabe quie' nu le'ca lacane xi neca elliebacu' nú rlu'cu bee enu rnibiya' lu iliulabe quie', elliebacu' nú nze'ta bichia nú nitilu. 7Sino que rnia'ahua elliebacu' nú reca nze'ta lu Diose, elliebacu' nú unga xi neca tucu nú a'chi' neca para lubee bene iliulabe nú xneca riña bee bene lu Diose. Nu elliebacu' cua' unila Diose desde ante nú quixie iliulabe. 8Bee nucua' neca nú lá ri'i bee bene enu rnibiya' lu iliulabe quie' beya', xne tunu uri'i beella beya' nucua', lá quie'e beella Jesucristo lu cruse, li'inu enu rnibiya'. 9Pero lu ichi' Stichia' Diose rni: Ni' tucu bene lecati ulañi', nu ubene', nu ni' lá ri'i elliebacu' lunú nu'che' Diose para bee bene enu seca li'inu. 10Pero ulube'la Diose nucua' lua'ahua equie cuenda' Espíritu Santo nú nzu cuna lia'ahua, xne Espíritu Santo nediya' yeene, hasta beenú máse neriña' ri'i bene beya' nze'ta lu Diose. 11Li'ihua nediya'hua nú lecati ri'i beya' nú xi elliebacu' rri'i tucu bene, espíritu'tsialla nediya' xi elliebacu' rri'illa. Scua necane xne tucutsia Espíritu' Diose nediya' xi rri'inu elliebacu'. 12Nu lia'ahua enu nzenalala inziu' Diose, la nehuañia'ahua cuna espíritu nú nu' lu iliulabe quie' sino que nehuañila'ahua cuna Espíritu Santo nú uliqui' Diose, para nú equie cuenda' Espíritu Santo ria'ahua beya' luye nú uliqui' Diose lua'ahua lunú chiqui' nze'canu. 13Nu bee nucua' neca nú sete'ahua bee bene, pero lacane lunú necatsia elliebacu'ahua, sino que Espíritu Santo neca enu rlube' lua'ahua nú xneca sete'ahua bee bene. Nu scua sete'ahua lunú neca cuenda' Diose lubee bene enu nehuañi cuna Espíritu Santo. 14Pero bee bene enu la nehuañi cuna Espíritu Santo la chili arqui' lunú neca cuenda' Diose, xne para li'ibeei necane nú la zibi'. Enze'e la ri'ibeei beya' lunú neca cuenda' Diose, xne hasta cuna elietsa' Espíritu Santo rri'i bee bene beya' lunú neca cuenda' Diose. 15Pero bee bene enu nehuañila cuna Espíritu Santo equie cuenda' Espíritu Santo rri'illa beya' luye lunú neca cuenda' Diose, nu ni'tucu bee bene enu la nehuañi cuna Espíritu Santo la ri'i beya' xiquie nú rri'i benecua' beya' lunú neca cuenda' Diose. 16Lu ichi' Stichia' Diose rni: “Lecati nu'lu elliebacu' Diose para nú nilla lu Diose nú xi ri'inu.” Pero lia'ahua equie cuenda' Espíritu Santo neca tucu necatsela elliebacua'ahua cuna Jesucristo nu Diose.

will be added

X\