1~Corintios 16

1Nee equie cuenda' bee dimi nú rqui'ña quiete'sa'hua para nú ri'ihua elietsa lubeelá bee sa'ahua enu nzeli arqui' Jesucristo, uquiete'sa'huane tucu nú unibiya'a luhua nú ri'ihua lubee sa'ahua enu nzeli arqui' Jesucristo lu iliu Galilea. 2Rqui'ña nú cada domingo dete' cada tucuhua lle'na dimi equie bichia riña'hua calutse nú uri'ihua ana tucu xmana, para nú la ri'ihua scua chenu riñalá luhua. 3Nu chenu riñaa, xe'la bene enu cañihua para nú che za'na dimi cua' eyeche Jerusalén, nu xe'lane cuna tucu carta nú ixiule'e ti neca beella. 4Nu tunu rqui'ña nú nzelaa, che nzelayua beella. 5Rluti dete'xua lu iliu Macedonia chela riña lu eyeche Corinto para nú nzelabi'ya li'ihua. 6Talabese ya'na cuna li'ihua tucu tiembu. Diqui tiembu nú nucuaa, che chu du' inzahua li'á elu riala nza'a. 7La niarquia nú nzelabi'ya li'ihua chiucu chunatsia bichia, sino que niarquia nú xee nzela luhua tunu zela Diose nú acane scua. 8Pero nee rqui'ña nú ria'na eyeche Efeso hasta nú riña eliñi pentecostés. 9Xne ca'a eyeche Efeso nu' beya' yene' bee bene Stichia' Diose nu se'ca nú huaxi bee bene chili arqui' Stichia' Diose, añinzuca nú huaxi bee bene rlee lua equie cuenda' Stichia' Diose. 10Chenu riña Timoteo luhua uri'ihua nú tsu nze'ca arqui'lla, xne le'ca riña' Diose nú rri'á rri'illa. 11Enze'e nia luhua nú ni'tucuhua la huachuhualla, sino que uri'ihua elietsa lulla, nu udu' inzahualla para nú riñalla elu nzucu'quiealla ca'a sin nú chenu arqui'lla cuna beelá bee sa'ahua enu nzeli arqui' Jesucristo enu nze'tayulla. 12Nu chiqui' uzequiaa lu sa'ahua Apolo nú chenulla bee sa'ahua enu nzeli arqui' Jesucristo, pero lá zelalla achalla nee, pero chálla chenu ri'illa ana. 13Ucua'a tsiñiahua nu utsuta' arqui'hua lunú nzeli arqui'hua Jesucristo. Uriqui'hua lu xitse nú secahua nu utsuta' arqui'hua. 14Nu ye nú rri'ihua ñia utsu arqui'hua ri'ihuane. 15Bee sa'a enu nzeli arquia'ahua Jesucristo, li'ihua nediya'hua nú Estefanas cuna yebee bene'lla, li'ibeella rlutilá uchili arqui' beella Jesucristo lu iliu Acaya, nu li'ihua nediya'hua nú xneca rri'ibeella elietsa lubee sa'ahua enu nzeli arqui' Jesucristo. 16Enze'e nia luhua nú uri'i casohua bee bene enu rri'i xi rri'i bee benequie' cuna ye beelá bee bene enu rri'i xi rri'i beella, nu cuna bee enu rri'i elietsa nú reca riña' Diose. 17Chiqui' ñia utsu arquia chenu uriña Estéfanas cuna Fortunato nu Acaico xne tucu nú ñia nzu arquia lubeella. Le'ca scua ñia nzu arquia luhua. 18Li'ibeella udu'beella ana arquia cuna nú rdu'beella ana arqui'hua, nu bee bene enu rri'i scua ulu'cuhua ula'na lubeellla. 19Yebee sa'ahua enu nzeli arqui' Jesucristo lu iliu Asia quie', xe'la beella saludo luhua. Nu Aquila nu cuna una'lla Pricila cuna ye beelá bee bene enu nzeli arqui' Jesucristo, bee enu rietesa' ni'beella, xe'la beella saludo luhua lunú neca'ahua bene' Jesucristo. 20Ye bee sa'ahua enu nzeli arqui' Jesucristo xe'la beella saludo luhua. Nu li'á nia luhua xitse hora nú xa'cahua sa'hua, uni'hua Diose lubeella tucu nú rialane. 21Li'á Pablo, li'i e'cua rquie'a letra quie' luhua para nú ri'á saludar li'ihua. 22Tunu nu' bee bene enu la zeca Jesucristo, li'illa rialalla castiya' Diose. Nu Jesucristo la lea' nú nze'tanu. 23Nu Jesucristo ri'i nú cha nze'ca lu cuenda' yehua. 24Nu lunú tucutse bene' Jesucristo neca'ahua chiqui' se'ca yehua. Amén.

will be added

X\