1~Corintios 15

1Bee sa'a enu nzeli arquia'ahua Jesucristo, ellu'cu' arquia li'ihua bee bedichia' nze'ca' Jesucristo nú unila luhua, bee bedichia' nze'ca nú uchilila arqui'hua nú nzuta' arqui'hua lu. 2Ullu'cu' arqui'hua nú equie cuenda' bedichia' nze'ca cua' utsila'alahua equie cuenda' stulahua, tunu neli nú nzuta' arqui'hua pero tunu la neli nú nzuta' arqui'hua lue lecaxi zibi' nú uchili arqui'huane che. 3Rluti uzetea li'ihua lunú rluti ungaa. Unia luhua nú Jesucristo unguti equie cunda' stula'ahua tucu nú rni lu ichi' Stichia' Diose. 4Nu uyachi'nu nu che uhuañi zecanu bichia rriuna, tucu nú rni lu ichi' Stichia' Diose. 5Chenu uhuañi zecanu che ulube'lunu lu Pedro nu luze'elá ulube'lunu lubee apóstol'nu. 6Nu le'ca luze'elá ulube'lunu lu texcua'a bee bene enu nzeli arqui' li'inu, nu neca máse de quiniento beella. Nu'beella enu ungutila, pero le'ca esquie nu' huaxi beella enu nehuañisca'. 7Nu le'ca esquie ulube'lunu lu Jacobo nu cheelá lu ye bee apóstol. 8Nu li'á neca xi neca tucu endu'me' enu udetela hora nú ala, xne ulube'lunu lua hasta últimolá. 9Nu li'á menula neca equia luquela beelá bee apóstol, nu ni' la yala nú chiulea apóstol xne uri'á nú nehuana ulle'ca bee bene enu nzeli arqui' Jesucristo. 10Pero lunú chiqui' nze'ca Diose enze'e necaa lunú necaa, nu la xle'e uhua'a arqui'nu li'á xne máse uri'á riña'nu luquela beelá bee apóstol, añinzuca nú la neca li'á enu rri'i sino que cuna elietsa' Diose rri'ine. 11Nu lecaxi ri'i tunu ti udixiule'e Stichia' Diose luhua, tunu neca li'á urre neca stucu bee apóstol, xne tucutse Stichia' Diose sete'ru li'ihua nu uchilila arqui'huane. 12Nu nee lunú uzete'laru li'ihua Stichia' Diose nú rni nú Jesucristo uhuañi zeca lu eluti, ¿xiquie nú nu'hua bee enu rni nú la huañia' bee bene enu unguti? 13Xne tunu la huañia' bee bene enu unguti, nucua' rni nú lá huañia' Jesucristo lu eluti stucu bese che. 14Nu tunu lá huañia' Jesucristo lu eluti, che lecaxi zibi' lunú sete'ru li'ihua, nu le'ca esquie lecaxi zibi' lunú nzeli arqui'hua li'inu che. 15Nu tunu scua necane, che la neli neca nú rniru equie cuenda' Diose che xne unilaru luhua nú li'inu uri'inu nú uhuañi zeca Jesucristo. Nu tunu laca neli nú huañi zeca bee benenguti, che laca neli nú uhuañi zeca Jesucristo stucu bese che. 16Xne tunu la huañia' bee bene enu unguti, che le'ca lá huañia' Jesucristo lu eluti stucu bese. 17Nu tunu lá huañia' Jesucristo lu eluti lecaxi zibi' nú nzeli arqui'hua li'inu che, nu le'ca lasca' la'ahua lu stulahua che. 18Tunu scua necane che hasta bee enu ungutila unitilulila beella, añinzuca nú uyali arqui'beella li'inu. 19Nu tunu lu iliulabequietsia nelluaquia'ahua lunú nellua'aquia'ahua equie cuenda' Jesucristo, che lunú nzeli arquia'ahua li'inu neca'ahua bee bene enu máse riala hua'a arqui' ye bee bene. 20Pero lunú neli neca nú Jesucristo uhuañi lu eluti, nu li'inu necanu enu primero uhuañi lu eluti. 21Nu scua tucu nú uyu'u eluti lu iliulabe quie', equie cuenda' tucu bene, le'ca scua equie cuenda' tucu bene uyu'u nú huañi zeca bee bene enu ungutila. 22Scua tucu nú uyu'u eluti nú rati ye bee bene equie cuenda' Adán, le'ca scua equie cuenda' Jesucristo rlu'cu bee bene enu nzeli arqui' li'inu stucu elunehuañi. 23Pero yeene acane tucu nú rialane. Jesucristo neca enu primero uhuañi zeca lu eluti stucu bese, chenu riñazecanu stucu bese lu iliulabe che huañi zeca bee benenguti enu nzeli arqui' li'inu. 24Nu chenu ri'i Jesucristo ana luye elurnibiya' nú nu' lu iliulabe quie' cuna elusticia cuna poder, chela dete' cuendanu lunú rnibiya'nu lu Diose Pa liñibe. 25Pero rqui'ña nú nibiya' Jesucristo hasta nú ri'i Diose nú ri'inu ana lubee enu rlee lunu. 26Nu enu nitilunu último neca eluti. 27Lu ichi' Stichia' Diose rni nú Diose udete' poder lu Jesucristo para nú nibiya'nu lu yeene, pero la ni nucua' nú le'ca rnibiya'nu lu Diose, xne Diose neca enu udete' poder lu Jesucristo nú nibiya'nu. 28Nu bichia nú nibiya' Jesucristo lu yeene, che dete' cuendanu elurnibiya' nú udete' Diose lunu nu che nibiya' zeca tucutsia Diose lu yeene nu cuna lu Jesucristo. 29Neequie tunu rnihua nú la huañia' bee bene enu ungutila. ¿Xiquie nú rrinzahua equie cuenda' bee bene enu ungutila? Nu tunu la huañia' bee bene enu ungutila lecaxi zibi' nú rri'ihua scua che. 30Nu tunu la huañia' bee bene enu ungutila, hasta lia'ahua enu sibia'ahua lu Diose lecaxi zibi' nú yebichia rlu'cua'ahua peligro nú atia'ahua. 31Xne li'á nia luhua bee sa'a enu nzeli arquia'ahua Jesucristo nú yebichia rlu'cua peligro nú atia, neli nú rnia luhua scua, tucu nú neli nú chiqui' ñia nzu arquia equie cuenda'hua, li'ihua enu necala bee bene' Jesucristo. 32Nu nee tunu lu iliulabequietsia sibi' lunú rri'á, che lecaxi zibi' beenú uri'inu bee bene Efeso li'á, li'ibeei enu nelachi xi nelachi bee nañi dañi. Xne tunu la huañia' bee bene enu unguti enze'e máse neca nze'ca nú ria'ahua tucu nú rni bee enu rni: “Te da'cua'ahua nu te diya'ahua xne ye'etsia ungutila'ahua.” 33Pero li'á nia luhua nu la zelahua nú ti zequienu li'ihua equie cuenda' bee nucua'. Xne tunu rri'i casuhua lunú rri'i bee bene enu la ri'i tucu nú necane, nucua' rnitilu lunú xneca nehuañihua. 34Enze'e uri'ihua elliebacu' tucu nú necane nu la ria'hua dula xne nu'hua enu se'caa nú ni' la chulu nze'ca Stichia' Diose, enze'e rnia scua luhua para nú tu'hua. 35Pero tal vez nu'hua enu rri'i elliebacu': “¿Pero xneca huañi zeca bee benenguti che? ¿Nu xneca naa cuerpo nú lu'cu beella?” 36¡Pero elliebacu' cua' la zibi'i! Xne li'ihua nediya'hua nú chenu rdu'ni bene tucu ebichi che rliñii nu chu ruchu ebichi'i. 37La neca huañi nú rquieni bee bene sino que ebichi'i rquieni bene, tucu nú rri'inu bene trigo urre tatse stucu ebichi. 38Pero chenu rliñii che necane tucu huañi tucu nú unibiya'la Diose nú necane, nu cada ebichi nú rquieni bene, chenu ru'cue che rlube' nú xine. 39Scua tucu nú urene rnaa cuerpo' bene lu cuerpo' bee nañi nu urene rnaa cuerpo' bee bela lubee iñi. 40Nu le'ca urene rnaa beenú nu' liñibe nu beenú nu' lu iliulabe nu le'ca esquie urene ñia rnaa, nú nu' liñibe nu urene ñia rnaa nú nu' lu iliulabe. 41Le'ca scua urene rnaa ellie' bichia luquela guu nu le'ca urene rnaa ellie' belaa, hasta bee belaa urene rnaa ellie' tucu belaa, lu stucu belaa. 42Le'ca scua acane lu cuenda' bee bene enu huañi zeca lu eluti, cuerpo' bene nú riachi' ruchue, pero cuerpo nú lu'cu bee bene stucu bese leca' bichia nú uchune. 43Cuerpo' bene nú riachi' ruchue, pero chenu huañi zeca bene lu'cu bene stucu cuerpo nú ñia rnaa nu leca' xi zeca. Cuerpo nú riachi' leca' juersa'e, pero chenu huañi zeca bene che chiqui' lu'cu zeca bene juerza. 44Riachi' cuerpo nú rlu'cu bene lu iliulabe quie', pero chenu huañi zeca bene lu'cu bene tucu cuerpo nú zibi' liñibe. Xne scua tucu nú rlu'cu bene tucu cuerpo lu iliulabe quie' le'ca scua lu'cu bene stucu cuerpo liñibe. 45Lu ichi' Stichia' Diose rni nú rluti Adán ulu'cu elunehuañi lu iliulabe quie'. Luze'elá uriña Jesucristo, li'inu enu rliqui' elunehuañi' bee bene. 46Rluti lu'cua'ahua sa' cuerpo nú ulu'cu Adán lu iliulabe quie', chéla lu'cua'ahua sa' cuerpo nú ulu'cu Jesucristo liñibe. 47Adán ungache' yuu enze'e necalla bene lu iliulabe, pero Jesucristo uriña enza liñibe. 48Yebee bene rlu'cu cuerpo tucu nú ulu'cu Adán cuerpo lu iliulabequie', pero chenu riña bichia nú lu'cu bee bene tucu cuerpo sa' cuerpo nú rlu'cu Jesucristo liñibe. 49Xne scua tucu nú rna'ahua le'ca scua unaa Adán lu iliulabe quie', nu le'ca scua na'ahua tucu nú rnaa Jesucristo liñibe. 50Nee ixiule'a luhua bee sa'a enu nzeli arquia'ahua Jesucristo, nú cuerpo'ahua nú rlu'cua'ahua lu iliulabe quie' nú neca be'la nu rene leca modo chu'une liñibe elurnibiya' Diose. Xne cuerpo' bene nú rnitilu, leca modo chu'u elu nu' cuerpo' bene nú leca xunga nitilu. 51Pero niarquia nú ri'ihua beya' tucu nú lasca' ixiule'a luhua nú lá ri'ihua beya', nú la atiye'ahua, pero ri'i Diose nú che'e xneca naa ye'ahua nu lu'cua'ahua stucu cuerpo. 52Scua aca chenu yene'ahua chii trompeta, che terratutsia tucu nú riacu' nu ria'la i'culu bene scua terratutsia che'e nú xneca rna'ahua, chenu yene chii trompeta ze'e huañi zeca yee bee benenguti, nu che leca' xunga atibeella, nu lia'ahua hora ze'e che'e xneca rna'ahua. 53Xne cuerpo nú rlu'cua'ahua rqui'ña nú che'e xneca rnae cuna stucu cuerpo nú la nitilu. Xne rqui'ña nú che'e cuerpo'ahua nú rati cuna stucu cuerpo nú leca' bichia nú ati. 54Nu chenu uche'ela cuerpo nú rlu'cua'ahua nú rnitilu cuna stucu cuerpo nú la nitilu, nu chenu uche'ela cuerpo'ahua nú rati cuna stucu cuerpo nú la ati, bichia ze'e uyalu tucu nú rni lu ichi' Stichia' Diose elu rni: “Ulaxu eluti xne uri'ila elunehuañi ana. 55Nu le'ca uyalula stucu luguare lu ichi' Stichia' Diose elu rni: “Eluti, ¿ca nza nú niarqui'lu ari'ilu ana? ¿Nu ca nza nú nehuana seca bee bene rri'ilu?” 56Lunú nehuana seca bee bene rri'i eluti necane equie cuenda' dula, nu equie cuenda' ley rri'i bee bene beya' nú rnibiya' dula lubee bene. 57Pero che'tsala Diose Pa liñibe, enu rri'i elietsa lua'ahua nú rria'ahua ana lubee nucua' equie cuenda' nú unguti Jesucristo. 58Enze'e bee sa'a enu nzeli arquia'ahua Jesucristo scua tucu nú se'ca li'ihua nia luhua, nú utsuta' arqui'hua lunú nzeli arqui'hua Jesucristo nu la llaca'hua. Nu ye ye'e ula'nahua nú ri'ihua riña' Diose xne li'ihua nediya'hua nú la ri'i xle'ehua riña' Diose.

will be added

X\