1~Corintios 14

1Ula'nahua nú zecahua bee sa'hua nu chiqui' una'cuhua lu Espíritu Santo para nú liqui'nu xi riala ri'ihua pero máse na'cuhua lunu nú liqui'nu nú ri'ihua beya' para nú zete'hua stichia'nu lubee bene. 2Bene enu rni stucu dialu nú la ri'i bee bene beya' xi rni, nze'ta bedichia' cua' lu cuenda' Espíritu Santo. Nu tucutsia Diose rdichia'nulla bedichia' cua' nu lecati bene rri'i beya' nú rnilla. 3Pero bee bene enu rixiule'e Stichia' Diose lubee bene, rri'illa elietsa lubee bene para nú xneca riala nú chenala bene inziu' Diose, nu rdu'lla ana arqui' bee bene, nu saalalla arqui' bee bene enu nehuana seca. 4Bene enu rni stucu dialu nú la ri'i bee bene beya' xi rni, rri'i nucua' elietsa lu li'itsialla. Pero bee bene enu rixiule'e Stichia' Diose lubee bene, rri'illa elietsa lubee bene' Diose para nú xneca chenala beella inziu' Diose. 5Ala' niarquia nú yehua nihua stucu dialu, pero máse neca nze'ca tunu ixiule'ehua Stichia' Diose lubee bene. Xne máse neca equie nú ixiule'e bene Stichia' Diose lubee bene luquela nú ni bene stucu dialu nú la ri'i bene beya' xi rni. Urre tunu acalla ixiule'ella lubee bene xi rni dialu nú unilla para nú zibi' lunú unilla lu ye bee bene, 6xi neca tunu nzelabi'ya li'ihua bee sa'a enu nzeli arquia'ahua Jesucristo nu nia luhua tucu dialu nú la ri'ihua beya' xi rni che lecaxi zibi' nucua' luhua luhuare nú nia luhua Stichia' Diose, luhuare nú nia luhua lunú ulube' Diose lua nú nia luhua urre luhuare nú zeteahua lunú recaa, urre luhuare nú zeteahua lunú riala zeteahua. 7Xi neca tucu bee icu' musica, flauta, urre arpa tunu la ula nze'ca benene la ri'i bene beya' xi instrumento bee nucua'. 8Le'ca scua tunu la bixia nze'ca tucu sundado trompeta lu xuu, xneca ri'i beei beya' para nú nucua'a tsiñiala beei para nú chue beei lu xuu. 9Nu nee le'ca scua tunu li'ihua nihua lubee bene cuna tucu dialu nú la ri'i bee bene beya' xi rni, ¿xneca ri'i beella beya' xi rnihua lubeella? Nu che lia xle'e unihua lubeella. 10Li'ihua nediya'hua nú nu' huaxi bee dialu lu iliulabe, pero yeene nu' xi rnii. 11Pero tunu tucu bene ni lua tucu dialu nú la nia nu la ri'á beya' xi rni, che necaa tucu bene istu para bene ze'e, nu neca bene ze'e tucu bene istu para li'á. 12Enze'e scua tucu nú chiqui' niarqui'hua nú lu'cuhua elliebacu' nú enta lu Diose cuna elietsa' Espíritu Santo chiqui' una'cuhua lu Diose para nú liqui'nu elliebacu'hua nú ri'ihua lunú xi riala ri'ihua para nú xneca chenala bee bene' Diose inziu'nu. 13Enze'e bene enu rni tucu dialu nú la ri'i bee bene beya' rqui'ña nú nacu'lla lu Diose para nú ri'inu elietsa lulla para nú acalla ixiule'ella lubee bene xi rni lunú unilla. 14Xne tunu li'á nacua lu Diose cuna stucu dialu rene nu la ri'á beya' xi rni che tucutsia espíritua nediya' xi rnia pero li'á ni' la ri'á beya' xi rnia che. 15Enze'e lunú rqui'ña ri'á neca nú nacua lu Diose cuna espíritua, nu ri'á beya' xi rnia. Le'ca scua chenu rulaa lu Diose rqui'ña nú tsi'a bee nucua' nu ri'á beya' lunú xi rulaa. 16Xne tunu rnilu bedichia' nze'ca lu Diose cuna tucu dialu nú la ri'ilu beya' xi rni che leca modo ni bene enu nzu cuna li'ilu “Amén” chenu ulaxu udete'lu che'tsa lu Diose. Equie nú lá ri'illa beya' xi unilu. 17Mase nú ñia udete'lu che'tsa lu Diose, pero lecaxi uri'i nucua' elietsa lu bene enu nzu cue'tselu para nú ri'illa beya' xneca chenalalla inziu' Diose. 18Rdetea che'tsa lu Diose nú li'á reca huaxi dialu lu yehua. 19Pero mase nú scua necane chenu nzua elu riete'sa' bee sa'ahua enu nzeli arqui' Jesucristo para nú nia lubeella, nu para li'á máse nza nze'cae tunu nia masia ayu' bedichia' lubeella bee bedichia' nú rri'i beella beya' para nú zibi'i lubeella nu zete' beellae lu stucu bene, luhuare nú nia lubeella chi'i mili bee bedichia' nú la ri'i beella beya' xi rni. 20Bee sa'a enu nzeli arquia'ahua Jesucristo la ria'ahua elliebacu' xi rri'i bee endu' lla'na elliebacu'. Pero acahua xi neca bee endu' nú la ri'i beei beenú necha neca, pero chenu rri'ihua elliebacu' uri'ihua elliebacu' xi rri'i bene uxu elliebacu' lunú unguxulahua. 21Lu ichi' Stichia' Diose rni: “Xe'la bee bene enu rni stucu dialu, bee bene enu laca bee bene ca'a para nú nibeella lubee benequie'. Pero ni' scua la zucu' beella stichia'a uni Diose.” 22Enze'e lunú rni bene huaxi dialu, necane tucu seña para lubee bene enu la chili arqui' Stichia' Diose para nú scua chili arqui'beella Diose. Nu la neca nucua' tucu seña lubee bene enu nzelila arqui' Diose. Pero lunú rixiule'e bene lunú neca cuenda' Diose neca nucua' tucu seña para lubee bene enu nzelila arqui' Diose. Nu laca nucua' tucu seña para lubee bene enu lachili arqui' Diose. 23Pero ni' scua chenu riete'sa'hua para nú yene'hua Stichia' Diose nu che quixie yehua nú nihua yelu clasia' dialu nú lecati rri'i beya' xi rni, nu tunu nucua'anuhua bee bene enu apenatsia uchili arqui' Stichia' Diose urre bee bene enu la chili arqui' stichia'nu, ¿che xie' la ri'i bee benecua' elliebacu' nú tala vese ichia lucu secahua la? 24Pero tunu yehua rixiule'ehua Stichia' Diose elu riete'sa'hua nu nucua'anuhua bene enu apenatsia uchili arqui' Diose, urre bene enu la chili arqui' Diose ze'e, che chenu yene'lla xi rnihua, che ri'illa beya' nú necalla tucu bene enu rlu'cu dula, nu che le'catsia li'illa ri'illa beya' nú ti necalla. 25Nu scua ri'illa beya' nú xneca nehuañilla nu tsulliquilla nacu'lla lu Diose, nu le'ca nilla nú neli nú nzu Diose cuna li'ihua. 26Bee sa'a enu nzeli arquia'ahua Jesucristo ye beenú rnia luhua rnine luhua para nú ri'ihua beya' nú chenu riete'sa'hua para nú yene'hua Stichia' Diose, yehua ri'ihua lunú recahua rri'ihua, ti enu rula canto lu Diose, nu ti bee enu sete' Stichia' Diose lubee bene, nu ti bee enu rixiule'e lubee bene nú xi ulube' Diose lulla, nu bee enu rni stucu dialu nú la ri'i ye bee bene beya', nu ti bee bene enu rixiule'e xi rni dialu nú uni benecua', pero luye nú rri'ihua rqui'ña nú zibi'i nu ri'i elietsa lubeelá bee sa'hua nú xneca chenala beella Stichia' Diose. 27Tunu nu'hua enu rni dialu nú la ri'i ye bee bene beya', rqui'ña nú ni chiucu chunatsiahua dialu cua' bee enu recatsiae, nu tucua tucuahua nihuane, nu rqui'ña nú nu' enu ixiule'e lubee bene nú xi rni dialu nú unibeella. 28Pero tunu leca bene enu ixiule'e lubee bene xi uni bee bene enu uni dialu cua', che máse neca nze'ca nú la nibeellá dialu cua' lubee bene. Mejora li'itsia beella nediya' beella cuna Diose xi rni nú unacu' beella lunu cuna dialucua. 29Nu bee bene enu ixiule'e lubeelá bee bene xi ulube' Diose lubeella rqui'ña nú chiucutsia beella urre chunatsia beella ixiule'e beella lubeelá bee bene, cada chenu riete'sa'hua nu beelahua saca tunu neli lunú rni beella. 30Pero tunu tucu bene enu nzucu ze'e saca, nu hora ze'e lube' Diose lulla tucu nú lube' Diose lulla, che rqui'ña nú zaca bene enu rni para nú aca ixiule'ella lubee bene xi ulube' Diose lulla hora ze'e. 31Yehua nu' beya' ixiule'ehua Stichia' Diose lubee bene, lunú ulube' Diose luhua, pero tucua tucuahua rquiña nú ri'ihua scua para nú aca beella, nu chu'u ana arqui'beella, li'ibeella enu riene' nú rnihua. 32Ulu'cu cuendahua nú bee profeta, la yala nú nibeella chenu la yala nibeella, sino que nibeella chenu riala nibeella. 33Xne Diose niarqui' nú xcua'a xcua'a ri'i bee bene para nú huañi nze'ca bene cuna sa'bene. Scua tucu nú recae ye bee luhuare elu riete'sa' bee bene enu nzeli arqui' Jesucristo. 34Hora nú riene'hua Stichia' Diose, leca modo nú nu'xi ni bee una'a tucu nú uni Diose nú ri'i beenchu hasta hua'tu. 35Tunu nu' xila niarqui'hua nú ri'ihua beya', mejora nú ni'hua nu unedichia'hua lu niyu'hua, xne netue tunu nedichia' tucu una'a hora nú riene' ye bee bene Stichia' Diose. 36Ullu'cu' arqui'hua nú la neca li'ihua enu primero uri'i beya' Stichia' Diose, nu le'ca la neca li'itsiahua bee enu primero nediya' Stichia' Diose. 37Tunu nu'hua enu seca nú necala profeta, urre seca nú Espíritu Santo udete'la elliebacu'lla, nu che chu ri'illa beya' lunú rnia lu cartaquie' nu necane tucu nú unibiya' Diose nú ri'ihua. 38Pero tunu la chili arqui' profeta quie' lunú rnia luhua lu carta quie', le'ca la chili arqui'hua lunú rnilla luhua. 39Scua tucu nú unila luhua bee sa'a enu nzeli arquia'ahua Jesucristo, una'cuhua lu Diose para nú liqui'nu elliebacu'hua para nú ixiule'ehua stichia'nu lubee bene, nu la cahua tunu ni tucu bee sa'hua tucu dialu nú la ri'ihua beya'. 40Pero lu ye nú rri'ihua uri'i nze'cahua, uri'ihua tucu nú riala ri'ihua chenu riete' sa'hua, para nú yene'hua Stichia' Diose.

will be added

X\