1~Corintios 13

1Xne tunu recaa rnia xitse bee dialu rene nú rni bee bene iliulabe cuna nú rni bee ángele liñibe, pero tunu la zeca bee sa'a che necatsia xi neca tucu icu' nú rquiee urre xi neca tucu platillo nú chiqui' fuerte nza bi'i. 2Nu tunu li'á neca profeta, nu tunu alu'cua elliebacu' para nú ri'á beya' ye elliebacu' nú enta lu Diose nú lasca' ri'i bee bene beya', urre alu'cua elliebacu' nú chiqui' reca urre tunu chiqui' nzeli arquia Diose hasta nú aca nia lu tucu dañi nú lluna'e luhuare elu nzucune, nu zucune stucu luhuare pero tunu la zecaa bee sa'a lecaxi zibi' nú rri'á scua che. 3Nu le'ca tunu ritsia ye nú rlu'cua lubee bene enu seca elitsi nu zelaa nú tsiqui' bee bene li'á, pero tunu la zecaa bee sa'a, lecaxi zibi' nu rri'á scua che. 4Eluseca neca nú rlu'cu bene paciencia sa'bene, nu rri'i nze'ca bene lusa' bene, nu la yea arqui' bee bene, nu la zucu' aya bene li'illa, nu la aca nelliñia bene. 5Nu lacalla bene enu grosero, nu lacalla bene enu rri'itsia elliebacu' lu cuenda' e'cutsia nu lacalla bene enu nelachi nu la ri'illa nú biñi arqui'lla lubeelá bee bene. 6Nu lacalla bene enu xila' chenu nu' xi seca sa'lla sino que xila'lla chenu nehuañi nze'calla. 7Eluseca neca, nú rriqui' bene sa'bene, nu nzeli arqui' bene nú rni sa'bene, nu la tsu chiucu arqui' bene lusa' bene, nu la llaca' bene sa' bene. 8Eluseca, lecaxi bichia nú laxue, pero bee profeta enta bichia nú laxu beella nu le'ca enta bichia nú laxu bee bene enu rni stucu dialu rene, cuna nú laxu nú reca elliebacu' bene. 9Xne nee tunu rria'ahua beya' lle'na, pero huaxisca'lá rri'i nú ria'ahua beya' nu tunu neca'ahua profeta' Diose le'ca huaxisca'lá rri'i para nú ria'ahua beya' equie cuenda'nu. 10Pero chenu riña bichia nú ria'ahua beya' yeene, che leca' xi zibi' lunú reca'ahua nee. 11Chenu ungaa endu' unia xi rni bee endu' nu uri'á elliebacu' xi rri'i bee endu' elliebacu', nu neca elliebacua xi neca elliebacu' bee endu'. Pero chenu uru'cua utsana arquia lunú necaa endu'. 12Le'ca scua la ria'ahua beya' yeene, xi neca chenu la lañi' nze'ca'ahua lu tucu huana, pero chenu riña bichia nú riña'ahua elu nzucu Diose che ria'ahua beya' yeene. Nee lle'natsia beenú rri'á beya' pero chenu riña bichia nú riñaa elu nzucu Diose che chuluanu xi nu'lunu li'á. 13Nu' chuna beenú leca bichia nú laxu: Tucue neca nú nzeli arqui' bene Diose, nu stucue neca nú nzucu lua'ahua nú xi liqui' Diose lua'ahua, nu stucue neca nú seca bene sa'bene, pero lu yuna bee nucua' máse neca equie nú seca bene sa'bene.

will be added

X\