1~Corintios 12

1Nee nia luhua lunú rliqui' Diose lu cada tucua'ahua lunú riala ria'ahua equie cuenda' Espíritu Santo, xne la niarquia nú huañia'ahua sin nú ri'ihua beya' equie cuenda' bee nucua'. 2Li'ihua nediya'hua nú chenu lasca' chuluhua Stichia' Diose, chiqui' uyanalahua bee enu rni bee bene luhua nú neca diose nu la ni. 3Enze'e nee niarquia nú ri'ihua beya', nú titse bene enu nii nú lecaxi sibi' Jesucristo, tunu rni bene scua nucua' rlube' nú la nzu Espíritu Santo cuna li'illa. Nu le'ca ni'tucu bee bene leca modo nii: “Jesucristo neca enu rnibiya' lua.” Tunu la nzu Espíritu Santo cuna li'illa. 4Nu' yelu beenú utsula Diose lia'ahua nú ria'ahua, lia'ahua enu nzelila arquia'ahua Jesucristo, pero enu rliqui' nucua' lua'ahua neca tucutsia Espíritu Santo. 5Mase urene urene riña' nú uliqui' Diose lu cada tucua'ahua nú rria'ahua, pero lu tucutsia li'inu sibia'ahua. 6Mase urene urene lunú reca'ahua rria'ahua pero tucutsia Diose neca enu rri'i elietsa lua'ahua. 7Lu cada tucua'ahua rlube' Diose lunú xi reca'ahua cuna elietsa' Espíritu Santo para nú ria'ahua elietsa lubee sa'ahua. 8Xne cuna elietsa' Espíritu Santo nu' bee bene enu unguti'la' elliebacu' para nú ni lubee bene, le'ca nu' bee bene enu unguti'la' elliebacu' para nú ri'illa beya' nú xneca zete'lla bee bene. 9Nu equie cuenda' elietsa' Espíritu Santo nu' bee bene enu la nzuchiucu arqui' lunú nzeli arqui' Diose. Nu le'ca nu' bee bene enu unguti'la' poder nú rlu'cu Diose para nú ri'i yecalla bee bene enu riti. 10Nu le'ca nu' bee bene enu udete'la Espíritu Santo poder lu para nú ri'illa yelu clasia' bee milagro. Nu le'ca nu'bee bene enu udete'la Espíritu Santo elliebacu' nú reca, para nú ixiule'ella Stichia' Diose lubee bene, nu nu' bee sa'ahua enu udete'la Espíritu Santo nú reca elliebacu' para nú ri'illa beya' tunu neli urre laca neli lunú rni bene enu rni nú rixiule'e Stichia' Diose. Le'ca nu' beella enu udete'la Espíritu Santo elliebacu' para nú ni yelu clasia' dialu, nu le'ca nu' beella enu udete'la Espíritu Santo elliebacu' para nú ixiule'e xi rni tucu dialu cua' nu xi rni stucue. 11Pero tucutsia Espíritu Santo rri'i elietsa lubee bene nú rri'i bee bene ye beenú rri'i bee bene, nu Espíritu Santo nediyala' xi riala dete'nu ri'i cada tucu bee bene. 12Cuerpo' bene mase nú tucutsia necane pero huaxi parte rlu'cune. Le'ca scua lia'ahua enu nzeli arquia'ahua Jesucristo mase nú huaxi neca'ahua pero neca tucutsia'ahua cuna li'inu. 13Xne ye'ahua urinza'ahua equie cuenda' tucutsia Espíritu Santo, para nú aca tucu necatse'ahua cuna beelá bee sa'ahua, mase nú neca'ahua bene Israel urre laca'ahua bene Israel, mase nú neca'ahua esclavo urre laca'ahua esclavo, pero neca tucu necatsela'ahua xne ye'ahua nzula Espíritu Santo cuna lia'ahua. 14Cuerpo' bene laca tucutsiae sino que huaxi parte rlu'cune. 15Nu tunu ni cuchiu' bene: “Lacaa tucu parte cuerpo' bene xne lacaa ya bene.” Pero laca equie cuenda' nucua' nú laca'e tucu parte cuerpo' bene. 16Nu le'ca esquie tunu ni diaca bene: “Lacaa tucu parte cuerpo' bene xne lacaa i'culu bene”, laca equie cuenda' nucua' nú laca'e diaca bene. 17Xne tunu diqui cuerpo' bene necatsia i'culu bene, ¿chequie xneca yene' bene che? Nu tunu diqui bene unga diaca bene, ¿xneca lia' bene che? 18Pero nediyala' Diose cá riala zucu ye lunú neca cada tucua parte cuerpo'ahua, tucu nú niarqui'nu nú acane. 19Xne tunu tucutsia parte neca diqui cuerpo lacane tucu cuerpo che. 20Pero tucu nú unilá luhua mase nú huaxi parte neca cuerpo'ahua pero tucutsia neca diqui cuerpo'ahua. 21Leca modo ni i'culu bene luya bene: “La qui'ñalu.” Nu le'ca leca modo ni lluca equie bene lu cuchiu' bene: “La qui'ñiahua.” 22Mase nú huaxi bee parte cuerpo'ahua nú se'ca'ahua nú lle'natsia sibi', pero bee nucua' neca nú máse sibi'. 23Nu bee parte cuerpo'ahua nú rtua'ahua mase la aca achee lu cuerpo'ahua bee nucua' neca nú máse rri'i ucua'ahua xne rla'na'ahua nú xi utua'ahua para nú lecaxi na'ahua. 24Nu bee parte cuerpo'ahua nú ache, bee nucua' neca nú la chenu xe'ta' arquia'ahua equie cuenda'. Pero máse rqui'ña nú chenu arquia'ahua equie cuenda' bee parte cuerpo'ahua nú la achee para nú lecaxi llua'ahua, nu scua ureche' Diose lia'ahua. 25Para nú la ria'ahua elliebacu' nú nu' parte cuerpo'ahua nú la zibi' sino que diqui cuerpo'ahua rri'i elietsa lu sa'e. 26Chenu rcuu tucu parte cuerpo' bene, che diqui cuerpo' bene si' nú rcu, nu chenu tucu parte cuerpo' bene ñia seca che diqui cuerpo' bene ñia seca. 27Nu nee le'ca scua lunú neca tucu necatse'ahua cuna Jesucristo, che ye'ahua neca'ahua xi neca tucutsia cuerpo para li'inu, nu cada tucua'ahua neca'ahua xi neca tucu parte cuerpo ze'e. 28Leta'ahua enu nzeli arqui' Jesucristo ucañi Diose rluti bee apóstol, che chu ucañinu bee profeta, luze'ela ucañinu bee ulaxcuela enu sete' stichia'nu, nu cuna bee bene enu rri'iyeca bee bene enu riti, nu cuna bee bene enu rri'i bee milagro nu cuna bee bene enu rri'i elietsa lubeela bee bene. Le'ca ucañinu bee bene enu nibiya' lubee bene enu nzeli arqui' stichia'nu, le'ca ucañinu bee bene enu rni huaxi dialu. 29Laca ye bee bene neca apóstol nu le'ca laca ye bee bene neca profeta' Diose nu le'ca laca ye bee bene reca sete' Stichia' Diose lubee bene, nu laca ye bee bene reca rri'i bee milagro. 30Le'ca laca ye bee bene reca rri'iyeca bee bene enu riti, nu le'ca laca ye bee bene reca rni ye clasia' bee dialu, nu le'ca laca ye bee bene reca rixiule'e xi rni tucu dialu urre stucue. 31Pero la'nahua nú lube' Diose lua'ahua ta nú mase neca nze'ca riala ria'ahua, li'á rlubea luhua tucu inziu nú máse neca nze'ca.

will be added

X\