1~Corintios 10

1Bee sa'a enu nzeli arquia'ahua Jesucristo, niarquia nú ri'ihua beya' nú bee bene'ahua enu udetela bee enu uya nzenu Moisés, yebeella utse beella e'ya xcabe nú uxe'la Diose lubeella, nu yebeella udete beella lu inzatu' nú lee nelu. 2Scua unga achee nú yebeella neca beella bee bene' Moisés xne yebeella uyanala beella Moisés e'ya xcabe ze'e, nu udete beella cuna Moisés lu inzatu'. 3Nu le'ca yebeella udacu beella elubacu nú uxe'la Diose enza liñibe. 4Nu le'ca yebeella ungüe' beella inza nú udete' Diose lubeella nú uliñi tetsu' tucu quiee. Nu nucua' rlube' nú nzula Jesucristo cuna li'ibeella catse elu uyanzee beella. 5Pero añinzuca nú scua necane, huaxi beella lá ri'ibeella tucu nú riu' arqui' Diose, enze'e unguti beella luyuu achi elu udete beella. 6Yebee nú ulle'ca beella scua necane tucu ejemplu lua'ahua, para nú la niarquia'ahua ria'ahua nú necha neca tucu nú uri'i beella. 7La yala nú lu'cuhua ula'na lubeenú seca bee bene nú neca Diose tucu nú uri'i huaxi bee bene'ahua enu udetela, tucu nú rni lu ichi' Stichia' Diose: “Ucua'a beella udacu beella nu ungüe' beella, nu che chu utsuli beella nu uri'ibeella lunú la yala ri'i beella.” 8Nu la yala nú ria'ahua eluhuexe tucu nú uri'i huaxi beella. Xne equie cuenda' nucua' unguti ala chechuna mili beella tucutsia bichia. 9Nu le'ca la ria'ahua nú lee Diose lua'ahua tucu nú uri'i huaxi bee benecua', nu equie cuenda' nucua' udacuquie' be'la li'ibeella nu unguti beella. 10Nu le'ca la yala nú nia'ahua nú necha rri'i Diose, xne scua uni bee bene'ahua enu udetela, nu che ube'ta tucu ángele enu unguuti li'ibeella. 11Ye bee nucua' ulle'ca bee benecua' enu udetela nu nequiene lu ichi' Stichia' Diose para nú ria'ahua beya' nú la neca nze'ca nú ria'ahua tucu nú uri'i beella, lia'ahua enu nehuañi tiembu quie' nú yamero laxu iliulabe. 12Enze'e bene enu seca nú nzuta' arqui' lu Stichia' Diose, rqui'ña nú bi'yalla li'illa para nú la ri'illa dula. 13Ye bee prueba nú secahua la necane prueba nú la zeca bee bene yebee bene seca prueba. Pero Diose la tsana' arqui' li'ihua nu la zelanu nú zecahua bee prueba nú la riqui'hua. Li'inu ri'inu elietsa luhua, para nú ri'ihua beya' xneca ri'ihua nú riqui'hua lunú xi secahua. 14Enze'e bee sa'a enu nzeli arquia'ahua Jesucristo, li'ihua enu chiqui' se'caa uchiu'u chuhua nu la lu'cuhua ula'na lubee nú seca bee bene nú neca Diose. 15Li'á nediyaa nú li'ihua necahua puro bee bene enu rri'i beya', enze'e le'ca li'ihua bi'yahua tunu neca nze'ca lunú rnia luhua. 16Chenu rria'ahua tucu nú uri'i Jesucristo, chenu udacuxenu último exe, nu chenu rdiya'ahua viño nú unga le'yala rellu'cu' arquia'ahua rene'nu nú uri'chia chenu ungutinu equie cuenda' stula'ahua. Nu chenu rda'cua'ahua pá tucu nú uri'inu ultimo exe, nucua' neca tucu seña nú tucutsia neca'ahua cuna li'inu. 17Mase nú huaxi neca'ahua, pero tucu nú rle'e tucutsia pá nú rritsi' luye'ahua scua rlube' nú neca tucutsia'ahua cuna Jesucristo. 18Li'ihua nediya'hua xneca rri'i bee bene Israel li'ibeella racubeella mii nú rdete' beella u'na lu Diose nu nucua' rlube' nú neca tucunecatse beella cuna Diose. 19La nia luhua nú neca equie bee enu seca bee bene nú neca diose, urre máse sibi' u'na nú rdete' bene lubee diose cua'. 20Xne bee bene enu rri'i scua la necane nú rdete' beella u'nacua lu Diose enu nehuañi sino que chenu rri'i beei scua rdete' beei u'na cua' lu beze'lu, nu li'ihua la niarquia nú aca tucu necatsehua cuna beze'lu. 21Leca modo nú ri'ihua scua, xne tunu rri'ihua scua neca tucu necatsehua cuna beze'lu, nu che chu acuhua pá nu hue'hua viño nú necale'yala, para nú aca achee nú le'ca neca tucu necatselahua cuna Jesucristo. 22¿U xie' niarqui'hua nú lee Diose luhua la? ¿U xie' másela rlu'cua'ahua poder luquela Diose la? 23Yee bee nú nu' beya' ri'i bene, pero laca yeene neca nze'cae. Mase ye nú nu' beya' ri'i bene, pero laca yeene sibi'i para nú ri'i bee bene elietsa lusa' bee bene nú xneca riala nú chenalalla inziu' Diose. 24Nu la yala nú ria'ahua elliebacu' lunú neca cuenda' e'cu'tsia'ahua sino que teria'ahua elliebacu' lunú neca cuenda' beelá bee sa'ahua. 25Chenu sihua mii liñi i'ya, la nedichia'hua cá uchiu'u micua', para nú laza' arqui'hua chenu acuhuane. 26Xne iliulabe cuna ye nú nu' lue neca stene' Diose Pa liñibe. 27Tunu tucu bene enu lachili arqui' Stichia' Diose zene' li'ihua nú acuhua eta ni'lla, tunu niarqui'hua nú chahua uquiahua. Udacuhua ye nú liqui'lla luhua nu la nedichia'hua lulla cá uchiu'e para nú la za' arqui'hua chenu acuhuane. 28Pero tunu nu' tucu sa'hua enu ni luhua nú elubacu nú rliqui' benecua' racuhua udete'llae u'na lubee diose'lla, che la acuhuane equie cuenda' bene enu udixiule'e luhua para nú la za'a arqui'lla equie cuenda' elubacu cua', mase nú nediya'hua nú Pa'ahua Diose liñibe rnibiya' luye nú nu' lu iliulabe. 29La nia luhua lunú xi rri'ihua elliebacu', lunú rnia luhua neca nú rri'i stucu bene elliebacu'. Pero tala bese nu'hua rri'i elliebacu': “¿Pero xinu leca modo ri'á yebee nú nediyaa nú laca necha neca equietsia nú seca stucu bene nú necha necane?” 30Tala bese nihua: “Li'á nediyaa nú rdetea che'tsa lu Diose equie yebee nú racua, ¿nu xiquie nú lixiu sa' arqui'hua lua?” 31Pero li'á nia luhua nú sia equie cuenda' bee elubacu nú racuhua, nu cuna equie cuenda' nú rue'hua cuna ye beelá beenú rri'ihua, uri'ihuane equie nú rlu'cuhua ula'na lu Diose. 32Ubi'yahua xneca nehuañihua para nú sia bee bene Israel nu bee bene enu laca bee bene Israel, nu bee sa'ahua enu nzeli arqui' Jesucristo la ri'ibeella elliebacu' nú necha neca equie cuenda'hua. 33Li'á rla'na nú ñiatsu arqui' ye bee bene lua. Nu la la'naa nú cha nze'catsiae lu cuendaa, sino que rla'natsia nú ri'á elietsa lu huaxi bee bene para nú tsila'a bee bene.

will be added

X\