Apocalipsis 10

1Bahuiä stee xangl Dios ni rajp yäḻrnibeduxh, siädjiäjtni xhaguibaa, li yu'ni neṉ bäj, yejcni dejd xquitgubijdx, luxh lojni najc si'c gubijdx. Reni'ni najc si'c tio'p pilajr bajl. 2Ca'ni te librbäze', naxhal libre'ga. Bazujni ni'ni ladbee loj nisdoo, bazujni ni'ni ladbäjgw lo yuj, 3dxejc guredxaduxh anglga si'c rbedxa' beedz. Dxejcru gunii guigajdz guzii sigajcsa. 4Che gulujx gunii guziiga, narä rlazä nucuaä lo guijtz nani guniireni, per biejn diagä xse' tej ni gunii xhaguibaali, najni loä: ―Guluchedzu'tz rediidxga nani gunii reguzii, na'c gucuaaluni. 5Angl nani suj ni'ni loj nisdoo näjza loj yuj, guläs ṉaani ladbee nez xhaguibaa. 6Guniliini diidx con laj GuebDios ni nabajṉ par tejpas, ni guläxtiej xhaguibaa näjza guiraa ni tre' xhaguibaa; ni guläxtiej guedxliujre näjza guiraa ni tre' lojni; ni guläxtiej nisdoo näjza guiraa ni tre' neṉ nisdoo. Räjpni: ―Diru redxejre gaclaa. 7Che guidzujṉtis dxej ni agojl goḻ ni najc rgajdz xangl Dios ni ca' trompe't, dxejc abaza' rextidxxhiga'tz Dios, si'c ni basule' redade' ni gunii xtidx Dios agujc xchero. 8Dxejc gunisac xse' nani gunii xhaguibaali, stehuält biejn diagä caniini loä, najni: ―Huij, te xca'lu libre' ni naxhal ni yu' ladzṉaa angl ni suj te laad ni'ni loj nisdoo, stelaad ni'ni lo guedxliuj. 9Dxejcti hua'ä lo anglga, räpä lojni: ―Guniidxlu libre'ga. Laani najni loä: ―Anire, cua'ni, gudajwni. Sun nanḻaani xque'lu, niluxh ro'lu sajcni nejxh si'c dzujn. 10Dxejcti cua'ä libre'ga lo ṉaa anglga, dxejc gudauäni. Ro'ä guyu'ni nejxh si'c dzujn, luxh che gudäm̲äni, lacti guc nanḻaani xque'ä. 11Dxejc najni loä: ―Nanab chasulesaclu xtidx Dios xcuent nani churu gac loj xhidalduxh bejṉ, näjza guejdx, näjza renani rnii garen-garen xtiidxreni, näjza loj reṟeii.

will be added

X\